THE BIBLE SAYS SO!
Bible-in chutiang chuan a sawi a ni, tih hi Pathian lamah chuan kan ngaih pawimawh ber tur a ni a. Mahse, mi tam takte rilruah hian rinna hi Bible sawi anga kan pawm loh avangin thil awlai tê leh samkhai taka neih theih emaw kan ti a. Rinna chu nei kan inti a, mahse, kan rinna chuan a ṭha zawngin kan nun a siam ṭha zo lo hle si a nih hi. Thil awm reng tur pathum Bible chuan a sawi a–rinna te, beiseina te, hmangaihna te a ni (I Kor. 13:13). “Pathian lalram pawh a lo hnai ta, sim ula, Chanchin Ṭha hi ring rawh u,” kan Lal Isuan a ti a (Marka 1:15).
Sima Chanchin Ṭha rin chu Pathian lalrama luhna, chatuan nun neihna, piantharna a ni a. Rinna tak tak hi kan nei em tiin i lo inbih chiang teh ang u. Kum tam tak liam ta aṭang khan, tun thleng pawh hian chhandamna atan hian mihring lam rinna hi thil ṭul lo, thil ngai lo, kan rin lam a ni lo, kan inpek lam a ni lo tih thu hi thuhriltu ṭthenkhatte ka aṭangin kan hre fo mai! Bible erawh chuan Lal Isua rin chu chatuana nunna neihna a ni a ti si a (John 3:16), Lal Isua ring lote chungah chuan Pathian thinur a awm reng a ni a ti (John 3:36).
Lal Isua rin chu chatuan nunna neihna a ni a, Lal Isua rin chu he khawvel sualna chi tinrengte hnehna a ti tiin kan Bible chuan a sawi (John 3:16; I John 5:4). Kan rama sual chi hrang hrang lo pung chho zelah hian sual hnehna rinna neih chu a va pawimawh dawn em? Chutiang rinna–chatuana nunna leh khawvel sual hnehna chu nei tur chuan kan Lal Isuan a kawng min hrilh kha, “Sim ula, Chanchin Ṭha hi ring rawh u,” a ti (Marka 1:15).
Eng nge ni kan sim tur chu? Evi leh Adama te Pathianin Eden huan aṭanga a hnawhchhuahna chhan sual, Pathian thuhnuai ni lova mahni thu thua nun kha sim tur chu a ni! Pathian thuhnuaia awm duh lohna thinlung hi maw le! Anni nupa khan Pathian thuhnuaia awm chu an tana ṭha lo zawkah ngaiin anmahni thu dah lalin ei phal loh thei rah kha an ei ta. Anmahni thua an nung ta kha Setana thua nung an nih avangin Pathian chuan a hnawtchhuak ta a nih kha (Gen. 3:24). Kha rilru, Pathian thuhnuaia kûn duh lohna (helna rilru) kha i paih ang a, Pathian thu thua awm turin i inpe ang! Hei hi rinna chu a ni. Rinna hi inpumpekna a ni e!
Lal Isua chu i lal atan i pawm chuan i rin Pathian chuan a thlarauvin (Rom 8:2) i nunah hnehna nun a rawn din dawn a ni. Chu chu Bible sawi dan a ni. Rinna chu Pathian hnena pum hluma inpek hi a ni. Chu chu hnehna kawng a ni.
- F. Lal Thanzuala