DRIVER ṬHENKHAT RILRU HI

Kan kawt kawngpui alkatra luan hi fûr chhia avangin hmun ṭhenkhat a khuar leh ṭhin a, chumi chu puitu (helper) tel lovin cement, balu leh rawra chawhpawlhin keima'n ka hnawhkhat zauh zauh ṭhin a. Cement la nêm laia ni 2/1 chhunga lirtheia chîl pherh a nih loh nan thing leh leirawhchantein ka chhinchhiah hual a, hemi bak hi motor lian kal theihna khawpa la zau a la ni a; mahse, chuti chung chuan (ṭum khat chu) lirtheiin an lo rap pherh darh vek mai a.

Kan awmna lai hi traffic jam ṭhinna khawp pawh a ni lo, Aizawl daifêm pawl a ni a. Mahni tih theih ve zawng tlem te te theih ang anga kan lo tih ve tihchhiat a ni a, a bul ka ṭan ṭha leh hian lirthei khalhtu ṭhenkhat rilru a tilang a, lirthei khalh an fimkhur lo tihna pawh a ni thei ang.

Ka thil tih tlem ka'n sawi tak nâin, kei aia ti ṭha hi mi dangte pawh an tam ang. Entir nan, tual upa pakhat leh a nupui chuan kawngpui sira tui luankawr, tui luang thei lo khawpa kum eng emawti chhung leiin a hnawh khah chu an an paih fai vek a ni. Hemi atan hian kar khat vel chu tha an seng ngeiin a rinawm.

Lirthei khalhtu ṭhenkhatte hi chuan kawngpuiah engte nge awm tih ngaihtuah lovin motor an khalh ṭhin tih a lang a. Chu chu tuna kan sawi atan chauh hian ni lovin, kawngpui tan zawng emaw, a eng lam hawi zâwng pawha naupang, mi ang lo leh mi chak lo zawkte kawnga an kala an him nan, lirthei khalh fua fua loh a pawimawh tih hi hriat ni rawh se.

- Jeff Tandy V.L. Hlawndo