Dan loa Mizoram lut ven a ngai

Tun hnaiah Assam state chhunga Bangladesh mi leh sa hnawh chhuah runpui kalpui niin an sawi a, hei hian Mizoram pawh a nghawng ngei dawn avangin dan loa lo lut tur uluk taka ngaihven a ngai dawn a ni.

Hemi chungchangah hian Central YMA Executive ṭhukhawm chu ṭhukhawmin he thil hi uluk takin an ngaihtuah nghal vat a. Sub-headquarters, group leh branch-te chu lo en uluk turin a ngen nghal a, sorkar pawh ILP pek chhuah kawngah uluk zawka kalpui turin a ngen nghal bawk a ni.

Bangladesh aṭanga lo lut ru hi state hrang hrangah an tam tih a hriat a, heng ho hian an awmna state-ah vote nei thei turin thiam takin hma an la a, hlawhtling pawh an tam ngiang ang. Heng ho hi Mizoramah pawh tam tak an lo lutin ei an rawn zawng mek bawk a ni. Heng dan loa lo lut, India khua leh tui nihna nei ta hi han dan vak ngaihna a awm lo a, sorkar tan pawh tih vak ngaihna a vang fu ang.

Mizote hi kan felin kan mâwl kawp a, hnam dang hna thawka lo lut turte kan sponsor nghal zel a. Kan chhawr loh hnuah pawh hmun dangah an awm a, hna an thawh pawhin sponsorship-ah kan la ṭang zui zelte hi kan makna a ni. Hnam hmelma kan ni tih kan inhre hauh lote hi a manganthlak tak zet ta a ni.

Hnam dang tel loin in kan sa thei lo a, Mizo zingah cement mistiri eng emaw zat awm ve tawh mah se, vai mistiri tel lo chuan indaih theih a ni lo a, kan la ruai zel dawn ni pawhin a lang. Amaherawhchu, fimkhur takin kan vai chhawrte chu kan enkawl a ngai tak zet a ni.

Nakin lawkah rel a rawn lut dawn a, a maka maka tamin vai an pung dawn. Dan loa khawsak kan phal tur a ni lo a, dan bawhchhetu chu kan in pawh kan luahtir loh ngam a ngai ang. Kan in veng seng lo ang tih a hlauhawm ngawt mai.

Kumin kum tir aṭang phei kha chuan Aizawl leh hmun hrang hrangah vai an pung nasa a, nikum lama kan hmuh ngai loh, two wheeler khalh pawh an pung nasa em em a, car changkang tak taka rawn lut an awm reng bawk.

Kan rama hnam dangte hi kan tawngpawng huat tur a ni lo a, kan mamawha kan chhawr tur leh kan thawhpui turte pawh an ni ang. Amaherawhchu, kan rama awm tur leh hna thawk turin dan zawm tur leh kenkawh tur a awm a, chu chu thuneitute hian a nihna ang taka an kenkawh a ngai a ni. ILP chungchangah pawh hian sorkar hian beng a chhit tam lehzual a ngai khawp mai a; thil hi enliam mai mai lo se a ṭha hle ang. Mizoram leh Mizo hnam himna tur hi ngaih pawimawh berah nei se a va duhawm em.

- Lal Rinmawia