AIZAWLAH MIZO ṬAWNG A BO

Aizawl khawpuia kawngpui pêng ṭhuam leh lirthei kal dan tur kawhhmuhna thuziak tar hi han en ila, Mizo ṭawng reng reng a awm lo mai hi eng nge a chhan ni ta ang. Aizawl khawpui hi Mizote khawpui a ni a, Mizo ṭawng hmang lo leh hmang thiam lote chu tlemtê an ni a, chuti chung chuan kan khawpui kawngpuia lirthei kal dan tur hriattirna tar reng reng hi sap ṭawnga ziak vek a ni mai a, Aizawlah Mizo ṭawng a bo a ni ber mai. Kawngpuia lirthei khaltu tam tak hi chuan Mizo ṭawnga ziah ni se la an hrethiam zawk ang. Sap ṭawnga ziah hi an ziah chhan sap ho hian lirthei an khalh lah chu kan hmu ngai mang bawk si lo. Kum tam tak kal taah khan Aizawl hmar lama damdawi in tur an sak lai khan sap (vun ngo) pakhat chuan lirthei a khalh ṭhin a, tunah lah chuan hmuh tur a awm tawh lo leh nghal.

Kan rama hmun nuam leh mipuiin kan tlawh tamna hmun eng emaw zatah hian mipuite hriattirna thuziak hi Mizo ṭawng tel lo a, sap ṭawnga ziak a tam em em a. Mizoram a nih angin, a mi chengate Mizo kan ni bawk a, mipui hriattirna thuziak reng reng, Mizo ṭawngin ziak hmasa ila, a hnuaiah emaw, a bulah emaw, sap/vai ṭawngin emaw ziak ve ta zawk ṭhin ila; a fiah ṭha ang a, kan hnam hi a zahawm phah sawt ngei ang.

Sakawrhmuituai tlanga thing hming khi a kungah an tar thliah thliah a, a ṭhat em em rualin, an tar dan erawh khi chu siam ṭhat theih ni se la a ṭha ngawt mai. Sap ṭawngin an ziak hmasa a, a hnuaiah Mizo ṭawngin an ziak leh a; Mizoram a ni bawk a, Mizo ṭawngin han ziak hmasa ta zawk se, a hnuaiah sap ṭawngin ziah ni leh ta zawk se la tiin ṭhahnemngaih thuah duhthu ai ang kan han sâm vel a nih hi.

Mizorama pisa hmunpui berah khuan kawng kamah Tlaizawng phun tamna deuh hmun a awm a, amaherawhchu, Tlaizawng hming reng reng hmuh tur a awm lo a, lianpuiin sap ṭawngin an ziak a, sap ṭawng hmang tan chuan a fiah ṭha ngawt ang.

Ram dang han ti ila, India ram hmun dangahte hi chuan anmahni ṭawngin an ziak hmasa a, thil dilna lehkhaahte pawh vai ṭawng leh sap ṭawngin an ziak mai a; a ṭha em em a, sap ṭawng hmang lo tan harsatna a awm lo. Ṭum khat chu motor khalh phalna (driving license) tihnun nawn leh dilna lehkha hi sap ṭawng veka ziak a ni si a, a diltu khan sap ṭawng a thiam si lo a, a ziak dik lo a, cheng sangsarih (Rs 7,000) a chawi phah der mai a, a lainatawm ngawt mai. Mizo ṭawng leh sap ṭawnga ziak ni se la chuan Mizoramah hian sap ṭawng thiam loh avangin pawisa a chawi lo tur.

Sawrkara lehkha thehluh ngai leh ziak sa, a chhanna dah khah ngaiahte hi chuan Mizo ṭawng leh sap ṭawngin ziah ṭhin ni se la a ṭha ngawt mai. Mizorama sawrkar hna latute (MPSC) hian an thuchhuah leh hna dilnaa tling tharte hriattirna hi Mizo ṭawngin an chhuah ta fo mai a, a lawmawmin a ṭha ngawt mai. Pawl sawmpahnih zirlaibu ṭhenkhat sap ṭawng chauha awm ṭhinte kha Mizo ṭawnga siam a ni ta te hi a va han hlu tehlul em. Mizote hi i Mizo zel teh ang u.

Mipuite hriattirna thuziak reng reng hi chu Mizoram chhungah hi chuan Mizo ṭawngin ziak hmasa phawt ila, a bulah sap ṭawngin ziak chauh ṭhin ila, Mizo ṭawng nunna atan hian boruak ṭha kan siam pung zel tihna a ni ang. Aizawl khawpuiah hian Mizo ṭawng hi zak lo leh inthlahrung lovin tual han lêng zel se la; Aizawl khawpuiah Mizo ṭawng hi bo lul suh se.

- H.Lalrindika (Marina)