*HE KUMTHARAH HIAN*

*I ro phum ruk kha lai chhuak la, phum tur nei lo hnenah, phum tur i ngah lehzual theih nan hman tum ang che. Bible chuan, sem darh chu pun lehzualna, a ti si a. thuf.11:42*: Yangoon pa hausa zinga chhiar tel phak, Pu Rinchhan hausakna thuruk hi kan awih zawng a ni ve em? " Keimaha ka sumdawn chuan, bumna te ka tawng thin a, LALPA sumdawng dun ang, ka ti a, Pathian nen kan sumdawn atangin, malsawmna ka dawng a ni" a ti. USA a Mizo pem ten, an Biak In sak tanpuina atan dollar 2,5000, an rawn dil a. Khawpui zawka awmten tanpuina an dil ta mak chu, a ngaihdan a ni vak lo. Mahse zan lamah a mu thei ta hauh lo mai a, dollar nuaih khat a pe  ta zawk. Pathian nen an sumdawng dun tih a hre chiang khawp mai.

*Biakbuk tel lo ringtu kawng i la zawh a nih pawhin, i bulah i biak Pathian chu a awm reng tih hriain, in inhlat lo tih hria ang che.*: Kumin kumtluan pawh hi kan la inkhawm thei lo maithei. Mi thenkhat chuan kohhran hruaitute kan dem lek lek ta. S.Korea hri darh chhan pakhat chu, Kristiante inkhawmin an inkaidarh kha a ni tlat, dem pawh an hlawh khawp mai. Mal tlat nunah hian lungawi i tum phawt mai ang u.

*Kutdawh thinlung pu reng lo la, i ram tan i tih theih tawk ti ve tawh ang che.* : Khaw pakhat a Party Unit hruaitute chu, an hruaitu zinga mi, tu emaw Aizawl kal hlek se, a kal ve lo khan an lo thik ringawt zel mai a ni awm e. Sum awlsam hi kan zawng ruai hlawm mai. Kan ram thil tha hi hai chhuah tumna rilru i nei tawh zawk ang u.

Ram hruai hna chelhtute pawh hian, hlawk hman loh hlau reng renga, kum 5 hman ral tum lo hian, ka ramin min ko a ni, tih rilru i pu tawh zawk ang u.

Hmasawnna hi thutthluan nen a inrem lo tih hria la, i pen apiangin hma i sawn a nih chuan, i pen zauh zawng kha teh fo zawk ang che.

*Thinchhiatna hi sim tum aiin, mi zaidamte nun zir a awlsam zawk tih hria ang che.*: Mi thinchhe mi hi an awm a. An pian kenah ngaihsak a tul lem lo, thinchhiat hi hlawkna a tlem khawp mai. Zaidamte nun hian mi a hip zawk. An nun hi zir theih a ni. 

Ram hruaitu thinchhia nih lek phei chu, hnawk an siam tam. Mi chhiatna pawh an thlen thei. Tul lova sum senna pawh a hring chhuak a. Ram hruaitu ni tur chuan, mi zau tak nih a ngai asin.

*I thenawmte kawngka i kik loh chuan, i thenawmten i kawngka a kik beisei bik suh.*: Sap ho chuan thenawmte an pawh ve meuh lo, chu nun chu kan copy ve tan ta. Thenawmte tlawh miah lova nung hi, mi eng emaw zat kan awm tawh. A Mizo zia lo, thenawmte bai insuah hnam kan ni hi. Mizo society-ah kir leh tawh ang u.

*Miin i kawngka an kik hun a awm a, mi kawngka i kik hun pawh a awm ang.*: Mi puih ngai lova nung reng thei turah inngai suh, sum i ngah a, thil tha pawh i nei ṭeuh a ni thei e. I khati kumhlun dawn bik lo. I thil neih a hlui tawh lai khan, i thenawmten a thar an nei ve mek a nia. An kawngka i kik hun a la thleng ngei ang.

*An vawmna che lung hmang khan, an vawm leh hun chia i inphenna tur, lung bang tha tak i siam thei tih hria ang che.*:  Israel fate khuan, tuarna rapthlak tak tak an lo hmachhawn tawh. Mi sala tang reng renga an awm hnuin, Hitlera khan Juda mi maktaduai 6 ngawt a that a. Mahse khu thlaler ramah khuan, ei sen loh thawk chuak thei khawpin, ralthuam tha tha nen, anmahni lo awp bet thintu, Persia (Iran) chu, vau chher chher ngam khawpin an ding chhuak tawh.

Mi min beihna hi din chhuah nana hman tum tlat chuan, thil theih a ni tih hi i nunah seng luh tum ve rawh. A beitu zawk nih ai chuan, mi beih tuartu zawk hi an dingchang fo a nia.

Kumthar chibai vek ule.