Veng records fel tak neih kan mamawh tak meuh; LC/VC zingah khawi vêng/khuain nge hma hruai thei ang le?

Kan ram/vêngin a mamawh tak, thil chhinchhiahna (records) fel tak nei turin hma la peih han awm hlauh mai se, a va ṭha dâwn êm!

Thil record-na bu lian (ledgers) neih ni se, tah chuan:

(1) In number, a neitu, luahtute, phone no etc. nên ziah luh vek ni se.

(2) Eng hnam (community) nge, sakhua, hnathawh, awm ṭan hun leh eizawnnate record vek ila.

(3) Chhûngkaw member hming, eizawnna, qualification leh thawh neih leh neih loh te record vek ila.

(4) Vêng vawn fai leh thil dah dân, sanitation lamte leh record tur awm apiangte vawn ṭhat ni se.

(5) Vêng chhuahsan leh lo awm thar report/record ni se. In luah an nih chuan, in neituin report tura tih ni se. Kâr khat chhûnga thu záwm loa tih tur ti lo chu chawitir zât tur bi tuk, tu pawh ni se, chawitir zat zat ni bawk se.

Hêng bâka ṭul awm apiangte nên, bawhzui turin, local/village council, kohhran sanitation committee aiawh, NGO te nen ṭhut khâwm a, LC/VC kaihhruaina hnuaiah thutlûkna siamin, vêng thuneitute pawhin full sitting-in official resolution siam ni ngei se. A ṭul dân ang zêlin AMC member (concerned), bialtu MLA pun ni bawk ṭhin se. Lal lal laia mahni khua leh tui leh ram enkawl leh vawn fel hna ṭha taka an thawk ang khân, a kengkawh hmasa leh ṭhahnemngai veng thuneitute han nei hlauh mai ila (state tân hmalâk a la rem lo a nih pawhin) a ṭha ngawt ang le.

LC/VC body aiawh, NGO, political party aiawhte’n bial ṭhen vil bik nei se la (upa bial ṭhen ang deuh hian), record rintlâk tak neiin, thil engkim lang tlang takin kalpui a ni ang a, kawng tam takah ṭangkaina a tam dâwn chauh a ni. Mizoram vêng/khaw dang pawhin an entawn thuai mai ang. Kan ram zím tê hi lang tlang takin, record fel tak nen kan inawp thei mai dawn a ni.

Heta târ lan loh leh ṭul turte chu thuneitu ruatte hian an ngaihtuah mai ang a, sutkian dân tur a awm zêl mai ang. Tu nge he chona hi chhâng thei ang le?

Hei hi kamkeunaah ngai ila. A ṭula râwn tur mi fel leh sorkâr mi pawimawh tak tak lo ni tawhte kan ngah a. Kan ṭanrual chuan thil ṭha tak, ram pum huapa entawn tur bul kan ṭan theih ngei a rinawm a ni. LC/V/C, YMA, MHIP leh NGO ten hma han la phawt mai se a ṭhat a rinawm. Tangka ngai ang chu MLA/AMC bialtute fund aṭangtein a awm thei turah ngai ila; a ṭul chuan khawn mai ni se.

Hetiang records hi kan mamawh tulh tulh dâwn a ni.

- F. Malsawma