Ui vulh ve ka duh
Ui vulh hi kan pi leh pute hun lai aṭang daih tawhin Mizote chin dan a ni. Tun hmain Mizote’n ui kan vulh kha chu Mizo ui dik tak kha a ni a. Pasalṭhate’n an ramchhuahnaah an hruai a, sa tam tak an kah theih phah ṭhin. An ramkalna a piangah ui khan a zui a, ramhnuaiah pawh an nun a tihlim ṭhin. In lamah in nghaktu an awm loh pawhin ui khan in a lo vêng a, ran vulhte ramsa lakah a lo veng him a, leikapuiah a lo bawk vâng ṭhin.
Zopa kaihza liak pha chin chaw ei dawhkan hnuaiah chaw nawi tlaa inhnangfâk thei, hmul tawi, rimchhe lo, zun leh ek inthiar fihlim, inlengte lo ngura bauh ve mai mai lo, ‘Ven thiam, huaisena’ kha hmuh tur an awm ta lo. Tunlaia ui vulhte chu ram dang ui an lak luhte a ni a, an pianzia leh nunphung hi kan ram leh Zo fate nunzia nen a inmil thei lo. An hmul a seiin an rimchhia a, an thin a rim hma a, mi ngur leh bauh an awlsam a, mi seh maite pawh an hrât bik. Khawlaia kal velte leh ui vulhna ina lengte tan an ṭihbaiawm bik a ni.
Miin ui a lo vulh chuan ni rei lo teah a chûlnêl ṭan a, a mit fûkna ber a lo ni a. A pu nen chhun leh zanah an inhnaih chilh tâk reng avangin a rilru latu a lo ni a, an chhungkaw member zingah awm angin an ngai a, ei tur tui ṭha ṭha an pe a. Nimahsela, ui vulh chu ‘ran’ a nih miau avangin ni khat thil thuah bo thei, talh theih, hralh theih, vuak hlum theih, ho têa thi thei a ni. Chutiang hun a lo thlen chuan ui an buaipuina zawng zawng chu holam maiah a chang zo leh ṭhin.
Ui chu a pu bulah awm reng mah se, rilru nei lo, ṭawng thei lo a nih miau avangin damlo ICU-a awm, unconscious enkawl ang main a rinthuin a enkawl a. A puin a duhsaknate chu a hriatpui phak loh avangin ni tla chuan thawnthu tawi ang lekin holam takin a liampui leh ṭhin. Ui vulhtu chuan a vulh hma aiin a vulh hnuah a thil buaipui a ho zawk a ni tih a inhmu ang. Chuvangin, ui vulh lotu chuan ‘Ui ka vulh ve duh’ a la ti lo.
Ui vulhtu chuan mawhphurhna nasa tak a nei. Ui chu amahin pawnah a chhuah chuan mite’n ui ni lovin a vulhtu an sawisel nghal a. An zun leh ek khawlaiah hmuh a nih phei chuan ṭhenawmte’n tenawm ti chungin an lo thian ṭhin a ni tih chu ui vulhtu inthlahdahte chuan an va hriatpui ngai lo.
’Beware of Dog’ tih chu tute phairam zinin an rawn copy a, ‘Ui a awm fimkhur rawh’ tih an tar ve a, chu chuan an ina lên mamawhte a hnar a, Mizo society nen a inrem thei lo. Ui hi kan vulh a nih pawhin mite nun hnawt chêptu leh khawlai tibawlhhlawhtu a nih loh nan kan khuahkhirh a ṭul a ni. Inlêngte lo ngur a, lo bauh ṭhin ui chu in chhungah pawh thlun zel a him ber.
- H. Neihchungnunga, Durtlang