THE BIBLE SAYS SO!

Rinna hi rinthu a ni lo va, a dik a ni tih awiha pawm ringawt pawh a ni lo va, Lal Isuaa innghahna a ni. A thu-ah mai ni lovin, min chhandamna hna thia tho leha a siam zawh tawh hriatthiama awih mai pawh a ni lo, Lal Isua hnena inpumpekna a ni (Johana 5:39,40). Inpekna hi a pum (whole) a nih loh chuan inpekna a tling lo. Thil nung lo (non-living thing) chu a phel pawh a pek theih a, mihring, minung erawh chu a phelin a pek theih loh. A puma pek loh chu pek loh nen thuhmun reng a ni (cf Jakoba 2:10). 95%, 97% emaw 99% pek emaw a awm thei lo. Mihring chu 100% pek tur a ni a, a nung ngeia pek tur a ni (Rom 12:1; cf Jakoba 2:10).

Hetiang hi Bible zirtir dan a nih avangin Zorama piangthar intiho ṭhahnem tak hi chu an che sual dawn! Chhandamna hna a tih zawh tawh hi chu kan hria a, kan awih bawk a. Kha a tih zawh tawh kha i chhandamna a la ni lo. A thawh zawhsak tawh che avangin Lal Isua hnenah i inpumpek tur a ni (Rom 12:1, Johana 5:39, 40). Lal Isua (person) ngei kha chhandamtu che a ni zawk; a tih zawh tawh ni lovin! Hei hi Pathian lalrama luhna, piantharna chu a ni (Johana 3:3,5).

Fapa tlanbo anga simna tak tak nei pha lote chu hemi dinhmunah hian an tawp hmak ang! Lal Isua tih zawh tawh an hria a, khami va chang (appropriate) tur khan Amah i luh chilh a ngai a. Chu chu rinna, inpumpeka Lal Isua kuta i luh kha, Bible-in rinna a sawi chu a ni. Hetah chiah hian i nunah Thlarau Thianghlim a lo lut ang a, chung lam aṭanga pianna (anothen) kha a lo thleng ang! I nun thuk berah khan khawih i ni tawh ang! Pathian anga siam nun zu nei ta che a (Ephesi 4:24). A va ropui em! Johana 17:3 thu kha i chhungrilah a thleng ta bawk a, chutiang mi chu an kir mai mai tawh ngai lo!

Kan ram evangelism hi tihdik a ngai. Simna thu kan sawi hreh em em a, kan Lal Isuan chanchin ṭha hrilna apianga thupui ber pakhata awm tura a sawi zingah simna hi a tel asin! Chu chu ngaihdamnain a zui ang (Luka 24:47). Fapa tlanbo sim em ema a kir ang khan, sim zawr hnapin kan kir tur a ni. Sim lote tan chuan Lal Isua hnena inpumpek hi a theih loh. simte erawh chuan, “Amah chauh chu ka ring lo thei si lo” an ti si! Sim, rin, anothen! Chu chu a order a ni.

- F. Lal Thanzuala