KAWNG CHHIA HI
Mipui mimir ngaih dan tlanglawn takah chuan kan kawngte hi a chhe tual tual emaw tih mai tur a ni. Kan kawngte hi, amah ngau ngau hi chu a te tual tualin a chhe tual tual lo mai thei a, mahse, mipuite hian a chhia kan ti tual tual tih erawh a chiang hle. A chhiat tual tual dan leh a chhan hi kawng tam takin a sawi theih ang a. Technical thil tam tak awm thei zingah, khawvel hmun dang leh a chhunga chengte hmasawn dan aṭanga teha a tlin lohna lo zual tual tual hi a chhan bulpui, a kaikuang, rilru lam khawih chin fel ngai chu a ni ang.
Tun hma a tluk tak lohna nia an sawi zingah, motor lian ke tam tak neite an lo tlan tak vang tia sawi te pawh a awm a. Motor lian tlanna chauh chhia chu ni se, ‘a ni thei mai awm mang tak e’ a tih theih ang a. Mahse, motor ke pali nei bakin a rah ngai reng reng loh zawng zawng nen a chhe deuh vek mai chu a nih hi! A chhan nia an sawi lan ngai lem loh, Motor kawng enkawltu department JE chin tawh phawtin In ropui tak an neih deuh vek vangte pawh a ni zawk maithei. Hman ata tawh, PWD S.A kan tihte pawh kha High School Headmaster te aiin an in a ropuiin an khawsak a sang zawk fo va. Nula ho pawhin pasal atan an duh zawkin, Kohhran upa nupuiho pawhin makpa atan an it zawk deuh fo ṭhin rah kal zelte pawh a ni maithei bawk.
Mipui lamin mite hmasawn dan kan hmu a, mite kawng kan hmu a, mi motor ang kan duh ve bawk si a. Chutih laiin, kan ram hruaitute erawh chuan ‘Hmân’ nen an teh tlat a. PWD lama kan mithiamten, an thiamna zawng zawng hmanga kan kawng chhiat chhan ni bera an hriat chu, hmana motor aia lian a tlan tak vangte leh kan lung ṭhat tawk loh vang tih te a ni tlangpui a. Mahse; hmana motor aia lian a tlan takah chuan motor lian dáwl tura siam mai àwm, kan rama lung a ṭhat tawk loh chuan a ṭhatna hmun aṭanga lung lak mai àwm tih hi tunlai mite hnialna chu a ni tho tho vang. Tunlai car man to duh ve tho kan hruaitute hian tunlai kawng hi zir ve rawh se!
Engpawhnise, kan hruaitute hian Mizoram tun hun teh nan hmana Mizoram hmang lovin, khawvel hmun danga ‘Tun’ hi hmang ve hram hram se la. A ni lo berah pawh kan ṭhenawm state-te ‘Tun’ hi hmang ve hram teh se. Mahni leh mahni inteh hi chu Pathian lama lawmthu sawina chhan tur atan chuan a ṭha viau a, khawvel intlansiakna atan chuan a laktlak vak loh. Khawvel intlansiaknaah chuan mi dangte ‘tun’ leh kan ‘tun’ hi teh a ṭul tlat ṭhin a ni. Tun hun hi hman hun nena teh chuan lawma nuih deuh sang rengna tur hlir hi a ni mai a, mahse; voters ten ṭhenawm state te tun hun hmanga kan tun hun an teh ṭhin avangin, tlinga inngai hi kan tling lo leh mai ṭhinte pawh a nih awm hi a!
Kan ram hi a chhengchhe viau na a, sik leh sa a mumal em em hi kan vanneihna a ni pakhat a. Pa mawl ber tan pawh fur ruahtui lo awm hun, khaw vawt lo thlen hun, nipui lo thlen hun a chhut sual theih loh. Khasiho khan sik leh sa hi an simplify ṭha ve riau mai ṭhin a. Thla a lo sik khan an in chung rawng an hnawih deuh sung sung ṭhin. An ramah ruahtui a tam avangin rawng hnawihna hun ṭha lai, ruah tlak loh rei deuh lai kha an hre ràn mai. Chu chauh a ni lo, thla a lo sik chuan thlasik khaw vawt hnuaiah, záwngte lukhum nen kawng siamin an PWD labour te an ri tlaivar ṭhak ṭhak mai ṭhin a, kawng an nei ṭha kumkhua mai. Keini'n fur laia kawngpui kan nawr vak mai ṭhin hi thil mak tak a ni. Financial Year thar leh fur innan vangte hi nge maw ni dawn ni! Financial Year khat atana sum ruahman hian kawng siamna hun ṭha thlasik thleng a daih lo ṭhinte a lo nih phei chuan, financial management-ah kan la hlawhchham char char tihna a ni ang a, thil zahthlak tak a ni ang.
Kawng chhiat chhan sawi fiah thiam sorkar emaw, kawng chhiat chhan min hrilh fiah thiam mithiam emawte hi kan mi mamawh ber berte an ni lo vang a, kawng ṭha siam thei sorkar, kan ram leilung mila kawng ṭha siam dan thiam mithiamte hi kan ramin a mamawh chu a ni zawk ang. Phai ramah, chirh dum chungah lei vung an chhun páwn chawp pawh ke sawmparuk neiho zo khawpa an siam ruh theih chuan, kan ram, tlang ram lei ruhsa leh chhûn páwn chawp pawh ngai lo, lei sakhal rin nghal theih hi chu i ram ruh thei ve hram hram teh ang u! Kawng chhia hi sawi mam theih a ni lo. Tun hmaa a chhia a nih pawhin tunah ṭha tawh rawh se, kan hmaa miten an tiṭha lo a nih pawhin tuna mite'n i siam ṭha ang u. Kan Biak in a ṭha thei viau si a, kawng chhe deuh hi kan inhmeh miah lo. Vaihovin kawng siamna turin Biak in kan sa emaw an tih phei chuan kan baptist thei tawh nang!
- Rev. Jh. Za Hluna (Paula Pu)