Politics hi! Mak leh harsa tak a lo ni e
Mizoram in politics kan hmelhriat ve na hi alo rei ve ta viau mai. Mizo Union leh party penhleh ṭhenkhat, rital tawh pawh a awm nual reng a ni. Tuna kan la neih party zingah MNF hi a upa ber a, INC-in a dawt a. Lalna leh thuneihna erawh chu INC in an chang tam ber a, MNF in an dawt ve thung.
Mizoramin state thuneihna puitling kan chan ve 1987-2025, kum 36 chhung ringawtah pawh INC chuan kum 20 thuneihna changin ro an rel a, MNF erawh chuan kum 16 leh a chanve zet ro an rel ve bawk.
Heng kum 36 leh a chanve zet chhung a ram leh mipui tana an duh dan kalphung leh an hmalak dan, budget pawisa an hman dan leh an tih theih chin chu Zoram mipui hian kan hre chiang thawkhat hle a ni ang e. Kum 2023 Assembly inthlanah an tlin zawh loh takah chuan opposition an ni ta ve ve a. An inlal chhawk chhung khan opposition pawh an in nih chhawk tho si a, an chiauhiar lutuk ngai pawhin kan hre ngai lo va, hmalak dan tur tharte pawh an duang ve nual ṭhin kha a nia sin maw le!
Tun ṭuma zet erawh hi chuan ram leh mipui tana hmalak dan tur thar ngaihtuaha duang chhin hman lêk lovin sorkar kal lai hmalakna hrim hrim sawi buangbâr a, dâwt leh thutak sawi pawlh a chirhthehah an inel ringawt mai a. Chutiang hmanrua zawng reng reng chuan an taima em em ringawt mai hi a mak a ni.
Sawhthing leh thlai thar lei chungchang hrim hrimah te hian han phunchiar viauin han sawichhe chiam ṭhin mah se, an hunlai ve vea thil thleng leh an sûlhnu kha mipuite’n kan thlir kir lo thei lo va, min remind zel a ni mai si!
"Sawisel suh u, sawisela in awm loh nan..." tih pawm awm pui pui te hi a bengchheng chhengah an ṭang lehnghal a. Politics hi chu a makin thiam a harsa ngang zawng a lo ni e. Party senior ber nih ngawt leh thuneihna chang rei ber nih te pawh hi ṭhatpui leh finna a lo ni lem hauh lo ve!
- Pa Thanga, Aizawl