Kan en liam mai dawn em ni

Tun August ni 13 (Nilaini) chawhnu her kha a ni a, Aizawlah chuan ruah a sûr nasa hle. I-Day pualin Vanapa Hall-ah self help group (SHG) ten UD&PA kaltlangin Exhibition an nei mêk a, tlawhtu mipui pawh ruahsur kârah an ṭhahnem hle a ni.

Vanapa Hall hnuai lam aṭangin a bul step-ah kan chho a, Exhibition kal turin nihliap nen kan hmanhmawh ve hle. Chutah le! Step zatve kan kal chuan ṭhalai paruk/pasarih vel chu foot-path hnuai hulhliap behchhanin step zau lai chu an lo hnawh khat tlat mai. Pakhat chu a bânah syringe hmangin a lo inchiu mêk a, mi dang pawhin inchiu an lo tum ve bawk.

Kawnga kal pangngai tan hmuh a hrehawm a, a hmutu nih pawh a nuam chiah lo. "Khawngaihin kan lo kal tlang lawk mai..." ka ti a, hawihhawm takin min kian hlawm a; chawhnu her chauh a la ni bawk a, veivak an tam bawk nen a hlauhawm lutuk lo. Zan emaw, tlai thim thet thet te, zing kar te chu ni se a ralmuang viau lo ang.

An tam tial tial

Independence Day a lo thleng a, August ni 15 chu mi tin chawlh hun a ni a, Aizawla Lammual lamah erawh urhsun taka hun hman a ni thung. Treasury Square lama kal ni tin ta na nâ nâ chuan Lammual kan tlan pêl a, Aizawl hmar lam aṭanga Lammual gate pui pelh chiaha city bus stand waiting seat-ah chuan heroin vanga rui thlep tih hriat ngawih ngawih mi pathum chu an lo inngheng, a ṭhen muhil rial mai!

Hemi zan vêk hian a hmun pangngaiah hian mi pasarih lai chu an rui zawi an lo awm leh nghe nghe bawk. Aizawl Lei hnuaiah drugs ngawlvei riak leh inchiu an awm ṭhin tihte pawh report a ni a. A bik takin Zawlkhawpui lûn lai SBI Main Branch leh a chhehvel, Zodin te phei hi chu zan lamah chuan drugs hmangsualtute thuneihna a ni zawmah awm asin.

Bawngkawn lamah pawh kan nau hna thawka kal ṭhin chuan drugs ngawlveite an inchiu ualau thei hle tih a sawi. A nihna takah chuan zu hi kan han sawi châmchî a, zu in mite hi ualau taka zu an in lai hmuh tur a tam lo hle. Kan en liam mai mai dawn em ni!? Number 4 hmanga inchiute’n khaw êng an zah lo leh mipui nawlpui an zah lo sâwt ta lutuk hi chu a pawi a ni.

Tlangkawmna

Ṭawngṭai Bethel Camping Centre (ṬBCC) a hun laiin kan sêl chiam a, a seltu mipui leh activist inti, ‘Evan da leh’ tih ṭawngkam hial hmang duhtute khan heng drugs ngawlveite chhanchhuahna leh ṭanpuina atan hian eng nge an tih ve, tih hi zawhna ni rawh se.

Kan khawtlang hi a dam lo a, number 4 (heroin) a tam em em a, a hmangsualtute'n ualau takin khawpui lùn laiah chhûnlâwnah pawh an ti hreh si lo. Ṭhenawm hnai leh hmuh phak lawk lawkah heroin zuar an awm reng bawk. Heti ringawt hi chuan kan dinhmun hi a chhe chak lutuk a, beihpui kan thlak thar leh a ngai a ni.

'Hawh u, i din thar leh ang u.'

"Mi tichaktuah chuan engkim ka ti thei a ni"

- Philippi 4:13

~ Zoa Tlau, Buannel Cabin