City bus leh bawk

Ni 13.8.2025 zinga ka fanute’n video viral pakhat min entir chuan ka thin a tier leh ta at mai a. City bus chungchang hi eng mah ka ziak tawh lo vang ka lo ti tawh nâ a, ziah leh a ngai ta a nih hi.

Sawrkar hmasa lam aṭang tawh khan city bus stand-a ding rei ṭhin lutuk hi ka lo sawisel fo tawh a. Smart city nih nen pawh a inhmeh loh thu te, state dang tih ve dan a nih loh thu leh hnam dang lakah a zahthlak thu te, bus-in stand-a passenger nghak lovin, a chuang turte chuan stand-ah bus an lo nghak zawk ang a, bus lo thlen veleh a chhuk tur an chhuk zawhah lâwn zung zunga kal leh mai theih a nih thute ka lo sawi tawh ṭhin. Tin, city bus hi tu thunun tur ber nge? Sawrkar, STA nge, AMC nge, ACBOA nge, tihte ka lo zawt tawh.

City bus stand-a ding rei ṭhin lutuk hi ka ngaimawh em avangin tun ZPM kalphung thar sawrkar intite hunah pawh hian an tihdanglam mai beisei takin ka lo ziak leh tawh a. Mahse, sawrkar tan ngaih pawimawh tham loh a ni ang e. Kan ram hmel lanna leh mipui tana awlsamna tur, public transport man tlawm ber hi anni pawh hian an term tawp thleng pawhin an tidanglam thei dawn lo a ni mai thei. A hmaa mite ang bawkin tih tur ṭul dang, khuallian nih leh hawn tur neuh neuh an la ngah a ni ang e.

Durtlang lam aṭanga sikul kal tur naupangte city bus hnunga an bet far mai han hmuh zet chuan ngaihtuahna a kal thui duh hle mai. Hmânlai thil deuh emaw, thingtlang khua leh mi ram khawi maw laia an tih dan ni awm tak a ni a. State capital, smart city meuha thil awm dan a ni si a. Sawrkar leh department hrang hrang te, a khawtlang ang zawng pawha ngaituah hmasak tur leh tih hmasak tur kan tih ṭhin lohzia leh, thu ṭha pui pui leh changkang tak tak mipui hmaa sawi fo ringawt chauh hi a tawk lohzia a lang chiang hlein ka hria.

Chu ai maha ka la huat chu, heng naupang mangangte institution dang bus-in an phurh ṭhin chungchanga Aizawl City Bus Owner Association-te thil tih dan hi a ni. He video viral comment-a kan hmuh ang hian, heng naupang mangangte phur ṭhintu institution–Women Polytechnic te, Mizoram Hindi Training College te, Hrangbana College -te leh a dangte hnenah ACBOA hian lo phur tawh lo turin lehkha an pe tih hi tak tak a nih chuan, an va zaktheilo ngai ve le. Eng hnam leh eng society nge kan nih tak? Khaw nge hmana Mizo, khaw nge hmana Mizo Kristiante kha? Hetianga anmahniin an phurh hman loh leh an phurh sen loh, naupang sikul tlai hlau mangangte an lo phur chu eng nge a pawina? A ṭha hle a ni lawm ni? Hetiang leh zel pawh kan îtsîk a nih chuan, private motor-a mi inphur ṭhin pawh hi kan îtsîk zel mai dawn em ni? Tu pawhin an motor-ah chuan an duh duh an phur ang chu. ACBOA hian khap theihna an nei em ni? Kan ramah hian ṭhatna te, felna te, diknate leh dan rorelnate hian awmzia a nei ta lo em ni?

Heta an sawi ang chuan, city bus-te hi Sihphir lam aṭangin an rawn khat vek tawh ṭhin a, a chang chuan stand ṭhenkhatah phei chuan an ding duh lo an la ti nghe nghe a ni. Chuti a nih ahnu, an chuang thei dawn nge dawn lo, eng hunah nge a lo thlen dawn, tih pawh an hriat hleih loh lo nghah ngawt ai chuan, a rem remah hunbi nei, tlai hlau chu an duh duh danin an kal mai ang chu. Lo nghak reng se, chuang leng leh si lo se emaw, motor chu chhiain lo thleng lawk thei leh si lo ta se, engtin nge an awm ang? Chu bakah, city bus-a tâwt deuha chuan ai chuan thâwl nuam deuha chuante pawh an duh ang chu.

Mi motor chuan dan tur leh mi phurh tur chungchangah hian ACBOA hian eng thuneihna nge an neih? Tun hma, mâwl zual lai khan taxi stand aṭanga taxi dang lo tlan laia lo chuan kha kha stand-a mite khan a haw ṭhin a. A driver emaw, passenger emaw chu an hau ṭhin. Intihbuai fe-na pawh a thleng tawh ṭhin. Engtikah nge an motor-a khat khawp passenger an awm dawn tih pawh hriat hleih loh nghah kha kan ba lo. Kan duh duhnaah kan chuang ang chu. Chutianga mi chungah emaw, ka tel venaah emaw thil thleng ka hmuh chuan ka hau hrep ṭhin. Chutiang ang vel chu a ni tuna ACBOA thil tih dan hi.

City bus chungchang ka ziah ṭhenkhatah phei chuan, pawisa min kîr tur hi conductor- te hian an theihnghilh der a, kîr loh dan ngawt an ngaihtuah niin ka hria, tih leh, pawisa kîr tur hi dil leh zak se min ti niin ka hria tihte leh, a lang a paua pawisa duhna tilang nasa ber chu city bus-te hi an ni awm e, ka ti nghe nghe.

Stand-a an din rei chhan hi ACBOA President ka zawt a, ani chuan, driver leh conductor te ti lo tura an hrilh nasat ṭhin thu leh, anmahni thua an lo tih leh ṭhin thu te, chutiang veng tura line supervisor leh assistant superviser an rawih thute min hrilh a. Tin, mipui pawhin stand-a ding rei chu an hnena report theih a nih thute a sawi a ni. Mahse, tun thleng hian an la ding veng veng ṭhin chu a ni a. Hei hi eng dang vang ni lovin, anmahni leh mahni an îtsîk vang, mi dang phurh ai phur ila, tih leh, kan phurh tur mi dangin an phur ang tih an hlauh vang mai mai a ni. Ram leh mipui lam ngaihtuah pha ve lo, ni khat thil thua bân mai theih driver leh conductor-te hian ni khat thil thua hlêp rûk tur neih tam loh an hlauh vang chauha hetia awm hi kan ni. Stand-a ding reng lova tih dan chu a awm ang, mahse, a ti theite’n an ti duh si lo. Smart city-ah hian city bus-te chu driver leh conductor-te thu thuin an tlan vel a nih ber hi.

Mite’n engah mah an ngaih ve loh, sawi fo pawha sâwt si lo, hetiang thu ho tê tê sawi fotu nih pawh hi a zahthlak a. Ka sawi tawh lo vang ka ti nâ a, tun hnaia video viral pakhat avang hian kan sawi leh ta hram a ni. Mahse, bus chhunga lungawi lo phun sur sur chu ka hre fo si.

- K. Hmingthankaia