Pathian Duhzâwnga Ṭawngṭaina

Pathianin min khawngaih a, kum thar duhawm tak kan lo thleng leh ta reng mai. Pathian malsâwm hi kan va han ni bik tehlul êm! Min hruaitu Pathian hnênah lâwmthu sawi ila; Lalpa chu fakin awm rawh se! He hun thar hi kan zavaia tâna kum hlu leh hriatreng tlâk, kum malsâwm a lo nih ngei theihna turin Pathian duhzâwnga ṭawngṭaina nên bul ṭan thar leh ṭheuh ila. Pathian hnên ata lâwmman ṭha ber chang turin tiam chin lam chu i pan zêl ang u.

Mihringte hi hmasâwn tura siam kan ni. Pathian hi tih tawh lam chauh thlir ṭhin ni se la chu, mihring nunah hian hmasâwnna a awm ngai lo vang a; ṭhan duhna leh tumna pawh kan nei kher lo vang. Rahbi thar duhawm zâwk kai tur leh kan nun hluia kan tihsual tawhte thil ṭha zâwka thlâkthlengna remchâng kan neih theih nân he hun thar hi Pathian duhsakna avânga pêk kan ni. 

Chutiang chuan kan tum ber chu hmasâwn a, hlawhtlin a ni a; chu nun siamtu chuan kan hma huna kan tih turte hi nghâkhlel takin a lo thlir ve rêng a ni. Kan tuh bâk seng tur kan nei ngai dâwn lo a ni tih erawh kan hriat thar fo a ṭha ang. Hun liam hnu chhuangtute’n Pathian lung an ti-awi zo ngai dâwn lo. Hei hi mi sual ber aṭanga mi ṭha zâwk nia inngaite thlenga kan vânneihna a ni. He khawvêl leh chatuan thleng pawha nun duhawm leh malsâwm nei turin bulṭanna ṭha siam thar leh ṭheuh ila. Kan lo dai sual tawhte hriatsak reng kan ni dâwn lo chauh ni lovin hunin a liampui tâk kan thil ṭha tih tawhte ngei pawh khân min chhandam ngawt dâwn lo. Kan hma hun engkim tâna kori tu tur zâwk chu he hun thar hi a ni. 

Kan nun hlui avânga beidawng mai tur kan ni lo. Hlimin lâwm phawt ila, beiseina thar leh ngaihtuahna tharte nên hmalam pan zâwk tur kan ni. Kan hlimna tur atâna mawhphurtu chu keimahni chauh hi kan ni a; a ṭha thei ang bera nun hmang zêlin; tih tauhna leh vuivaina te bânsanin, a êng zâwnga thlir thiamna neih tum tlat ila, hmasâwnna kawngah thui tak min hruai ngei ang. Ringtute hi siam kan nihna Kristaah chauh zâwk thil ṭha ti thei niin; sual kalsana keimahni leh mi dangte tâna malsâwmna ni tura buatsaih lâwk kan ni reng a. Krista ni thlenga tihfamkim kan nih theihna tura hna ṭha thawk zêl tur kan ni. Pathianin mawhphurhna min pêkte hlen chhuak turin theihna min pe ṭhin bawk, a fa duh takte kan ni rêng a.

Sumin a lei phâk loh chawlhna leh zahawmna te hmu turin kan nihna dik tak hi kan hre tur a ni a; kan lungawipuiin kan hmingṭhatpui ber tur a ni. Kan tumna leh duhna rilru a dik a, kan thlen tumna hmun a dik a, kan kawng zawh a sual loh chuan kan hlawhchham ngai lo vang. Dikna hi hnehtu a ni a, hlawhtlinna hi rim taka thawkte chanvo a ni. Pathian ṭihna avânga khawvêl mite anga ti ve lo kan ni tur a ni a. Kan neih loh avânga ṭap mai lovin kan neihte avâng zâwka Pathian hnêna lâwmthu sawi ṭhin tur kan ni.

Kan lama ṭang Pathianin hnehtu ni turin min din a. Hrehawmna lo thleng ṭhinte hian mamawhtute phatsanna remchâng min pe lo va. Mi, an dinhmun leh nih mêkna aṭanga rahbi thar kaitir hi hnehtute chanvo niin, thilsiam dangte tâna Pathian hmanrua ni tur kan ni. Pathian hi amah hmangaihtute ṭhatna tura engkima hna ṭha thawk ṭhin a ni. Tisa leh thlarauah kan mamawh ang tak malsâwmna thar kan chan theih nân nun leh thiltiha amah hmangaih bertu kan nih a ngai a. Kan nun hruaitu lo ni zêl se; Pathian leh a thute hi hriat fiaha rin chauh tur ni lovin rinnaa fiah zâwk tur a ni; ani chu a rinawm a. Pathian hmangaih bertute’n an tisual ngai lo! 

Jabeza chu Pathian hnênah mal­sâwmna dilin a ṭawngṭai a; a hun lai khawvêla thil ṭha ber ber a dil a ni (I Chro. 4:10). ‘Pathian duhzâwnga ṭawngṭaina’ tiin sawi a ni ṭhin, lei lama nihlawhnaah tâwp mai lovin sual ata chhandamna a dil a ni. Pathian a lungawi a, ṭawngṭaina hlawhtling kan hmu ta! Kum 2021-ah hian Pathian duhzâwnga ṭawngṭaina nên nun duhawm zâwk leh hlawhtling kan lo neih thar leh ṭheuh theih nân min hruaitu Krista lo ni zêl rawh se... 

- H. Lalroluahpuia