HRIPUI KA KÃI VE TA

Thla 13 chauha upa, nikum December 2019  maia wuhan, China aṭanga rawn inlãr ṭan  ni mah se, tun thlengin Scientist-hote pawhin a zeizia, chetzia leh mize dik tak an man chiang hlei thei bik lo a ni ber mai  "Boruaka hrilêng a ni lo; khuh, chil, hnap, khãk per leh intawh, inhnaih chilha awm avanga inkãichhãwn theih chauh a ni" an tih laiin  Scientist rual 239-te chuan dam lo engemaw zãt atanga zir chianna an neih atangin "boruaka hrilêng a ni tel thei bawk" an tileh zel a. Khawvel ram pum ei leh bar dinhmun nghawngin hring nun kalsiam a  kham zo vek a, nunphung pangngaia khawsa thei lovin intluktlãnna leh lungngaihna chirhdûmah  min hnük lût a, mi maktaduai têl fê chu seol thlãn thimah a hnük liam tawh a;  khawvel hi a chauin a chuai zo ta a ni ber. Hetih lai mek hian UK-ah leh Europe ram thenkhatah  SARS-COV2 insiam danglam (mutated virus-new strain) chu tun December, 2020 thla tir  lam aṭang khan British Scientist- te'n an hmuchhuak leh ta zel a, an zir chian danin September 2020 aṭang  tawh khan mipuiin an inkãi darh ṭan tawh niin an sawi nghe nghe. Covid-19 hri lêng kan do mek aiin inkãi chhãwn a awlsam zawk a, thihpui pawh a awl zawk dawn nia ngaihna an nei leh zel a.  

Hetiamg hi ni mah se, Pathianin mihringte finna a pek angzia zelin scientist-te chuan a invênna damdawi (covid vaccine) hman tan theihin an rawn chhawp chhuak ta rup mai! India pawhin kan hmang thei ve thuai turah ngai ila. Covid-19 hi inkãi chhãwn awlsamin hlauhawm hle mah se, sahbawn phuan leh hand sanitizer, disinfectant, boruaksa leh tui sã, hmanga a inven theih leh lawi hi a vanneihthlãk hle. Hetiang hi ni lo phei se'ng chuan a manganthlak lehzual ngawt ang.

Donald Trump, Borris Johnson, Amit Shah, Amitabbachan etc te paw'n hripui an vei thu zak hauh lovin twitter kal tlangin an puang (confessed) ngam a. Kei pawhin hripui ka kãi ve tãkah chuan hming thup tih vel hnihne awm lovin Mizoram leh pawn, khawvel hmun hrang hranga ka zohnahthlakpuiten tangkaipui nan an hman theih tak mialin tiin hripui ka tawrh dan tlem han tarlan ka tum a ni. Hming thup duha thilpek petu leh mi ṭanpui ṭhintute'n an tih ṭhinna chhan ber ṭhin nia lang chu a ruka hmutu van Pathianin a hriatpui chuan a tawka ngai,  ngãwi renga chapona tel lova mite chhawm dãwl an duh vang niin a lang. 

He tih lai hian  a puang chhãwngtute hian puan tel loh mai ṭhin tur ni awm taka a lan laiin an intibengvar lutuk ni ngei tur a ni-"Hming thup telin...chuti khati..." an tihluihsak talh thin a, hei hian kan mizia a tilang chiang hlein a lang. Hripui kãite hming thup duh tlat ṭhinnate pawh hi thil fuh tak chu niin a lang lem lo,  a dawihzep thlak em? tih ngaihtuahna a awm thei bawk. HIV+; TB; Cancer leh natna khirhkhãn tak tak tuarte pawh an zak lova, an nihna an lantir ngam vek a, zêp theih lah ni hek suh.

Kan nu cancer natna vangin inenkawlna tha zawk beiseiin October 2020  khan   phairam lam kan pan a.  Hripui kai ve palh hlau rêng rêngin kan chhuahna apiangah hmai tuamna, hmai kãwr, lukhum, kutkawr leh hand sanitizer kan pai thlap a; kan haw veleh thawmhnaw zawng zawng hlipin tui saah kan chiaha kan su nghal zel a. Tuilum ngam tawka sain kan inbual thlap zel bawk. Kawng sira thil zawrh kan ei mai mai hek lo.  

Heti khawpa kan fimkhur hle chung hian kan nu cancer ber chuan damdawi in aṭangin hripui a rawwn kai haw ta tlat mai a. Covid -19 enkawl bikna Damdawi inah dah luh zui nghal a  ni a. Kan nu kai aṭanga incubation period tawp lamah kan han test ve chu min  puitu ka mãkpa nen hripui kan lo kai ve reng mai a lo ni a. Natna lan chhuahna hlaulhthãwnawm êm êm kan neih loh avamgin covid call centre lam ka'n call lahin -"ti khan inkhung ula a tawk mai " an ti sam êt mai si a, ni 22 zet kan inkhung hrang a, kan damlo hruai ber nen pawh kan inhmu thei ta lo, a ninawm duh kher mai!

Pathian malsawmna ropui tak avangin kan nu cancer ber  chu rei lo teah a negative ta hlauh mai a. A van lawmawm tehlul em! Hripui kan kai aṭanga a ni 10-naah kan han test veleh a, ka mãkpa chu a negative ta a, kei erawh thisen sãng (hypertention) nei ka nih avang leh kum upa lam ka nih ve tawh avangin ka la positive reng thung a. Dawhthei takin ka nghak leh fan fan a, ni 7 dang a vei leh chuan Pathian malsawmna ropui tak changin ka negative ve ta hlauh mai. A van lawmawm duh tehlul em!

Hetianga kan 3-a kan nega­tive leh vek theihna chhan hi kohhranho leh ṭhenrual ṭha, thawhpuite leh chhung leh khatte'n Pathian hnena min tawngtaisakna vang liau liau a ni. Lalpa chu fakin awm rawh se. Kan inkhung hran chhunga kan inekawl dan tlangpuite hripui kai ve palh te'n in lo ṭangkaipui theih tãk hlauhin ka rawn hlui ve duh che u a, in lo bihchiang ve dawn nia: 

1.    Opulence Global , Richmond Hill, ON Canada, L4B, ICS-iin antioxidant & immune system tichaktu atana a siam 'Fountain of Life drops' Norwegian Spruce tree aṭanga Lignan ectract nitin zingkar leh tlaiah drop 10 zelin kan ei. 

2.     A ṭul changin Nachhawkna parace­tamol 650mg or azy­thromycine 500mg kan ei zauh ṭhin. 

3.     Nitin tuilum a zing thei angin kan in a, kan hrawk kan kharak (garhle) bawk ṭhin.

4.     Nitin tuilum ngam tawka sain kan inbual ngei ngei bawk.

5.     Nitin Vitamin 'C' 650mg mum 1 kan ei ṭhin.

6.     Immune system thuam chak turin nitin theibuhfai, sunhlu, grep, cashew nut, almond, balhla, serthlum, apple, thingfanghma etc. kan ei ṭhin.

7.     Herbal cough syrup  a ṭul changin kan ei.

8.     Nitin Natural antibiotic heng purunsen, purunvar, sawhthing etc kan ei ṭhin.

8.     Zantin tuisa thei angin kan inur (steam bath)  ngei ngei ṭhin.

9.     Pulse oximetre, BP monitor & thermometre kan kawl reng a, nitin kan in check up ṭhin. 

Kan dam khawchhuahna chhan ber hi Pathian vang liau liau a ni. Hetih rual hian kan tih ve theih chin theihtawp chhuaha kan tih avangin Pathianin mal min sawm a ni. 

Khing kan inenkawlnate khi kan ṭhatpui avangin midangin an ṭhatpui ve vek ang ka tihna a ni kher lo. Ti ve turin ka rãwn bawk hek lo. Mitin mahni duhthlanna a ni e. Mi 3-in a rual deuhthawa hripui kan han kãi zet chu RT-PCR kan hmang rim  ngei mai! Hemi hma hian kan nu damdawi in luh dawn apangin hospital rules angin covid-19 kan test-tir ziah ṭhin bawk nen; test man chawi hnem a awl duh hle. Mahse, Manipur leh Mizoram angin test man a to ve lo hlauh a, a ziaawm khawp mai. New Delhi leh Jarkhan-ahte phei chuan kawng sirah lab- technician-te lo thuin a duh duhin  a thlãwnin an in-test tir a,  an awhawm bik hle. Hetih lai hian Mizoramah engvangin nge Test man Rs 2,500/- ṭhak ṭhak an lak reng bik? Lab-technician ka zawh chian chuan-"Vawi 1 test man Rs. 1,000 zel ni tawh turin Central Sorkain thupek a chhuah alawm" a ti.  Mizoram Sorkar hian lehkha a dawng ve awm tho si a, engvangin nge  test man a tih to  reng bik ni ang le?  tih zawhna lian tak a awm thei.  Lengpui Airport-ah leh covid check point hrang hrangahte RAT hmangin an endik a, mi pakhat zelah Rs. 500/- zel an la phawt a, ni 7 hnuah RT-PCR or TrueNat hmangin mi pakhat zelah Rs. 2,500/- zel an la leh a, an lo positive phei chuan ni 10-17 hnuah RT-PCR/TrueNat hmangin mi 1 zelah Rs. 2,500/- an la leh a, tichuan positve tan bik phei chuan mi 1 zelah Rs. 5,500/- zel an la tihna a ni a; test kid lah a to vak hmel loh tehlul nen mipui tan retheihna thlentu a ni mêk niin a lang.

March 23, 2020 aṭanga tun thlengin Janta curfew; total lockdown, partial lockdown, containment zone; No tolerance drive; zan curfew;  sunday apianga lirthei tlan chhuah khap; Nitin lirthei no kawpkim leh kim lo intlanchhawk ti rêng rêngin zoram mipuite econony ngaihtuah thei lêk lovin kan buai a, chutih laiin CM Relief Fund tam tak tak a lût reng bawk si, test mante chu a thlawna tih ve theih awm tak a ni a, mahse,  Sorkarin mipui phurrit min bel belh ta zel zawk niin a lang thei. 

Phai ramah chuan zan curfew, no tolorance drive, sunday apianga lirthei tlãn chhuah khap etc . tih vel a awm ve lo. Taxi driver ka zawhna min chhan danah chuan-" kan CM-in 'hna thawk rawh u, intodelh a tul, in thawh lohin enge in ei ang; kan chãwm vek seng hlei nem che u, mahse, SOP zawm tha ula a tawk mai' min ti a, chuvangin, zalen deuhin hna kan thawk char char mai" a ti. Mizoramah chuan  Sorkarin kawng tinrengin mipui min dang bet zawk niin a ngaih theih a, chua chhapah kawng hrang hrangin mipuite harsatna min siamzui ta zawk ni berin a lang. 

Hripui laka mipui himna ngaihtuah vang chu a ni teh meuh mai, mahse, hripui kaihhnawih lem lo phuah belh a ngah ta lutuk niin a lang. Chutih laiin-" ei leh bara intodelh tumin ṭan lak a ngai" an tileh lawi a, thawk thei lo turin kawng tinrengin min dang ping leh bawk si! *Thing lubula zawng dante* pawh kan ang zo ta. Khawvela  zan curfew reina ber state han nih te, sundaya lirthei tlan khapna awm chhun han nih te, covid-19 no tolerance drive reina ber han nihte leh RAT hmang tam ber leh covid test fee sãnna ber state han nih te,  chawhmeh thlai hring leh nitin mamawh tona ber state han nihte hi developed country, ram changkang nihna emaw kan ti ta a ni lo maw? 

Mahni hna theuh zalen tak leh ṭhahnemngai takin SOP zãwm reng chungin thawk ila, kan economy dinhmun kan siam ṭha ang a, Sorkar tan pawh a hahdam thlak zawk ngei ang. Hetiang ringawta kan kal chho zel a nih erawh chuan Zoram mipuite hi hripui avanga thi aiin riltama thi kan la tam zawk dawn niin a lang. Chuvangin, kan Sorkar chak tak hian bengsikin ngaihtuahna thar hmangin ruahmanna ṭha zawk duang chhuak se a duhawm hle.

NB: He article hi sorkar demna emaw,  sawi chhiatna ni lovin mipui ṭhatna tura keima hmuh dan leh ngaihdan constitution article 19(1)-in zalenna min pek anga ka ziah a ni e. 

- Dr. C. Lalrampana