THE BIBLE SAYS SO!

Nokidema kha kan Lalpa khan Pathian lalrama luh theih dan tur a hrilh a, chu chu pianthar a ni. Pianthar tiha ‘thar’ tih hi Grik ṭawngah chuan ‘anothen’ a ni a; chu chu (1) a bul aṭanga a tawp thlenga thar tihna te, (2) piang nawn leh tihna te, (3) chung lam aṭanga piang, Pathian aṭanga piang tihnate a ni (Barclay).

Tichuan, piangthar tih chu chung lam aṭanga piang, Pathian hrin tihna a ni ta a ni. Ngaihdan leh pawm dan tihdanglamna narân mai ni lo, thil hriatthiam tharna mai ni lo, mihring thil tih ni lo, Pathian thiltih, Pathianin min hrin thar lehna a ni. Piangthar tak takte chuan Pathianin a hrin thar lehna hi by experience-in (mahni ngeiina tawn, tawnhriatna tak takin) an hre ṭhin a. He chung lam aṭanga Pathianin min hrinna hi a taka chang lote nun chuan a pawh ṭhin lo.

Chung lam aṭanga pianna, Pathianin min hrinna, mahni ngeiina tawn hriatna tak zeta hre tawhte chu an chhungril nun thûk berah Pathian anga siam tharna an tawng ta a. Tihian Bible chuan a sawi, “…mihring thar, thutak felna leh thianghlimnaa Pathian anga siam an ni,” a ti (Eph 4:24). Chutiang daiha buatsaih chu an nih tawh avangin Bible chuan “Tupawh Pathian hrin chuan Pathian chi amahah a awm reng avangin thil a tisual ṭhin lo,” a lo ti ta a ni (I Johana 3:9).

Bible hmun dangah chuan, “Thil ṭha ti atan Krista Isuaah chuan siama awmin, ama kut chhuak kan ni si a,” tih a ni (Eph 2:10). Pathian hrin tak meuh hi chuan thil an tisual ve mai mai tawh lo! Zu rui fo mai, inngai fo mai, duhâm fo, dâwt sawi fo, eiru fo mai leh sual ngai ti fo ṭhinte hi an la piangthar lo a ni e! Hetiang mi hi Mizo-ramah kan tam lutuk!

Pathian hrin nih avanga thil tisual ṭhin tawh lo, thil ṭha tia inhmang tawh zawkte chu Pathian lalrama lut theite an ni. Piantharna kawngkaa i luh chiah khan mahni thua awm tawh lohna ram a ni, Lal Isua lalna ram a ni a, mahni inphatsanna ram a ni tawh a, Lal Isua lal berna ram a ni ta. Fapa tlan bo anga inchhira simte lo chuan (Luka 15: 17-19) he lalram, piangtharte chenna ram hi an awm duhna ram a ni hauh lo! Mahni thu, ‘It’s my life’ kha an lawmna a ni a, kha kha Setana lalram dik tak chu a ni si! Hremhmun candidate ‘sure’ takte an ni!

Sual hi eng nge ni? Pathian thua awm duh lohna thinlung kha! Piangthar dikte chuan mahni thua awm hi an duh tawh lo va, ‘Ka nunah nangin thu nei la, ka lawm a kim tawh ang,’ tih hi an lawmna a ni. Chu chu Pathian lalram nun a ni. Chung lam aṭanga hrin (anothen) tawhte chu, ‘Thutak felna leh thianghlimnaa Pathian anga siam an ni tawh’ (Eph 4:24; I Johana 3:9). Hei hi kawngka zîm, mi tlemtête kal duhna, mahse, nunna kawng ni si a ni e (Mat. 7:13,14).

- F. Lal Thanzuala, PH; 9436141242