Sawrkar hian a hun takah thil ti ṭhin se kan va duh tak em

Mihring kan nih chhunga hmasawnna innghahna bul pawimawh berte zinga pakhat chu ngaihtuahna leh ruahmanna fel tak neih hnu a, ‘A hunlai leh a hun taka thil kan tih ṭhin hi’ a ni ngei ang le. Kum 70 nih hnu high school class IX zir lai aṭanga zir chhunzawm leh a, MA pass tum chu a chhenfakawm teh ual tawh lo ang le.

Kan Aizawl khawpui pawh hi thil a awlsam lai leh a hun laiah kan sawrkar kal tate khan ngaihtuahna leh ruahmanna felfai nei lova a hun lai leh awlsam laia thil an lo tih loh rah harsatna namenlo kan hmachhawn a, mipuiin a rah kan seng mek zawng a nih tâk hi. Traffic jam buaipuiin ni tin kan intawksir huai huai mai a nih tâk hi. Traffic jam buaipuia traffic duty-te leh mipui nawlpui kan hun leh tha sen ral tawh leh, kan la sen ral zel tur ngaihtuah hian a man a va sang duh dawn tak em aw. Hei lo pawh hi harsatna kawng hrang hrang kan la hmachhawn dawn chauh a ang hle mai.

Mizoram hi District Council kan nih hun lai khan Sap ho ruahmanna hnuaiah kan district capital Aizawl hi district capital atan chuan a inhmeh tawkin a nuam tawk thawkhat hle mai a, district capital atan chuan a baka nuam a awm chuang hauh lo ang. Mahse, khawvel hmasawnna kal zel chuan Mizoram pawh hmaihṭhelh bik loin kum 1972 aṭang khan UT-ah kan han awm chho ve ṭan kha a nia. Mahnia rorelna khawl Assembly House-te nei hrang ve ṭanin Mizoram mipuite khan keimahni mi leh sate ngei kan aiawha roreltu tur leh sawrkarna chelhtu turte kan han thlang chhuak ve tan ta kha a ni a. Sawrkarna vuan a, kan aiawha roreltute khan UT/state capital tur atan master plan felfai tak lo siamin sawrkar khan ngaihtuahna leh ruahmanna lo siam tam deuh se la chuan tun ang em ema kan harsatna tam tak hi kan pumpelh ngei ang le. Rorelna fawng vuan tute khan kum hnih khat tal kha chu budget state capital Aizawl khawpui ruahman fel nan sum tlem a zawng tal lo dah ve se ṭha tur, a nih loh pawhin khawpui felfai zawka din nan project eng emaw tal kha lo siam ve ta se zawng tun ang ngawt hi chu kan ni bik hauh lo ang le.

State kan nih hnuah pawh kum tam tak a vei leh tawh a, sawrkarna chelh tawhtute reng reng kha vawi khat pawh Aizawl khawpui ruahman felna tur sum budget-ah dah awm thawm hriat tur a vang thei zawng a nih hi. Thil a awlsam lai leh a hun laia kan tih duh loh leh tih nachang kan hriat loh rah hi a kum têlin mipui nawlpuiin kan tuar zel zawng a nih hi.

Tunah hian harsatna a let tam takin tawk dawnin, hun tawh lo viauin lang mah se, tih loh ngawt ai chuan a la sâwt tho tho dawn a. Kum hnih khat tal hi chu thil dang kan hma sêng lo a nih pawhin, traffic jam tihziaawm nan kawng chêp lai leh junction hmun pawimawh zual lai hmunhma zauh nan mimal ram lei nan budget-ah hian sum tlem azawng tal han dah ve thei se a van ṭha dawn tak em. Kawngpui zauh nan ram lei chu kumkhaw daih thil ṭha leh lukhâwng nei a nih dawn avangin mipuite pawh hian kan hrethiam tlang khawp ang le.

Sawrkar hian a mi nawlpui leh a ram pum huap anga harsatna lo thleng tur laka lo inven lawkna turah hian ngaihtuahna leh ruahmanna fel tak lo siam lawk thiamin ‘a hun takah’ thil hi tih tum tawh ṭhin se la. Kan châk lakna, kan kawngpui avanga harsatna kan tawhna zawng zawngah hian sawrkar ṭha leh hmangchâng hria leh hmathlir thui tak lo nei lâwk lo chu a lo lang chhuak mai dawn a ni. Mipui nawlpui harsatna sutkianna a nih dawn chuan sawrkarin sum hman mai tur nei rih lo pawh ni se, a hun lai taka thil tih a nih theih nan a bâ thlaua thil tih ṭul pawh ni se, mipuiin kan hrethiam ngei ang le.

- HC Thanchungnunga