MZP inthlan leh politics
Tun hnaiah Mizo Zirlai Pawl hruaitu an thlang dawn tih kan hre ṭheuh awm e, helam hawi ngaihven ṭhin chin chuan. MZP inthlang hi a hautak em em tih an sawi ṭhin a ni. Tun hma deuh kha chuan vai supplier leh contractor te hi candidate lam hian campaign fund an demand pawp pawp ṭhin a, vaiho pawhin survive tumin pawisa hi an ren lem lo va, vai aia MZP inthlana insengso ṭhin chu politician an ni tih hi mipui nawlpui chuan kan hre kher lo mai thei a ni.
Tunah hian line-up chiang tak ṭhuang hniha awmin, pakhat hi MNF lamin an phûrpui a, MNF ṭhalai hruaitute an campaign suau suau tih a ni. He mi group hian pawisa an hnianghnar thawkhat a, voter-te pawh an veivahna senso tumsak an inhuam thu phone maia hrilh lovin, voter-te khuaah an zin kual zar zar a, ṭan an la nasa hle niin an sawi. MNF ṭhalai lamin an support MZP hruaitu kan neih chuan tuna ZPM sorkar tan an hnawksak dawn hle a ni. Mipuiin lo chhinchhiah ula, MZP lama MNF group puihna dawng hi an tlin chuan kawngzawh, bandh leh 'bâng rawh se' tih kan hre nasa ang tih hi a sawi lawk ngam.
Lehlam pawl hi political party back up tu nei mumal si lo anga lang hian ruling party hian an support hle niin a lang tlat bawk. Congress hi Zoram politics lamah hian MLA pakhat chiah an neih avangin reh ruihin an lang a, mipui number zat chhiar tur a nih chuan an la ṭhahnem a, MZP inthlang tur bikah hi chuan a phusa ber ṭhin party an ni chungin an reh danah hian an inhnamhnawih lo a nih hmel. MNF an phûr a, ZPM inthup tak chungin an inrawlh ve tho va, Congress chu an ngawi a ni.
ZPM tan hian MZP inthlang lo phûrpui chiam hi a ṭul ka tih pui lo va, MNF tan ve thung erawh chuan MNYF Zirlai Wing ang hialin MZP hi an kaltir theih dawn avangin an duh zawng tih tlinna tura pawisa lo sen pawh hi thil uihawm a ni lo a ni. MNF ṭan lam an chak chuan kum 2028 inthlan hma chu zirlai pawl hmanruaa hmang hian sorkar a beih ngar ngar theih tawh dawn a ni. Hei hi politics-ah chuan thil pawimawh tak a ni.
India ram mai ni lo khawvel huap pawh hian zirlai pawl hi politics boruak siam theitu an ni. Hei hi tunah hian MNF hian an hmu fuh hle a, term hmasaa an MLA zingah khan MZP hruaitu hlui hi 10 dawn an awm e tih a ni a. Tun MZP inthlan pawh hi an tih fuh chuan nakina MNF lama seng luh tur leh tuna sorkar nêktu tur a nih avangin a pawimawh a ni.
ZPM hi ruling an nih avangin MZP inthlanah hian tute emaw hi lo support viau se, an support lam hi an chak loh si chuan MZP versus ZPM tih kan hmu chho char char dawn, ZPM hi fing takin Congress ang hian ngawi se a ṭha ber mai. Zirlai pawl inthlan leh politics hi chu thil kal kawp reng mai a nih avang hian politics hrethiam chin chuan a phênah thil a inphûm tih an hmu thei ang. MNF hian chu chu an hmu fuh hle niin a lang.
He mi hnu hian Central YMA pawh an inthlang leh ang a, hei chu politics rim nam tawh lo se Mizoram tan a ṭha ang. MZP inthlan lo awm tur hi titi lêngvâkah chuan MNF lam support pawl versus support-tu nei lo anga lang a ruka ZPM lam âwn pawl inbeihna a ni dawn a ni. Kei chuan mimal takin MZP inthlan hian Zoram politics hi a tibuai phak ka ti lo va, inthlan boruak hi chu political party hian an lo tuipui zawk a nih hi.
- Lalṭanpuia