KUTDAWH

Kan pi leh pute hunah kha chuan Mizote zingah kutdawh an awm ngai mang lo va, eng emaw harsatna bik neih avanga kutdawh ngai an awm pawhin lal hnenah kalin kutdawh an ngaihna chhante an thlen a, lal chuan an khua leh tuite hnenah hriattirna tichhuakin, kutdawhte chu ṭanpuina lo pe turin tlang an autir ṭhin.

Chuti ang zelin tun hnu deuhah pawh kutdawh ngai khawpa mi an awm chuan khawtlang hruaitute’n emaw lehkhate siamsakin, chu lehkha keng chuan kut an dawh ṭhin. Mi tu pawh, kutdawh ngai khawpa an awm chuan an zak em em a, inthlahrung tak siin, loh theih lohna vang zawk chauhin kut an dawh ṭhin a ni. A hnu zelah pawh kutdawh, mi hmuhsit leh endawng an nih zel loh nan theih tawpa hna thawkin kutdawh nih tawh loh hram an tum ṭhin.

Tun hnai deuh aṭang khan Mizote zingah kutdawh hmuh tur an awm leh ṭhin a, a ṭhente phei hi chuan hrehawm tia zak awm pawhin an lang lo; eizawnna chi khat anga ngaiin kut an dawh ni mai awm a ni. Hei hi eng nge a chhan ni ang le? Kan Mizo nunphung kha chu a ni lo hrim hrim mai a, Mizote khawtlang inkaihhruaina dan pawh a ni ngai hek lo. Tunlai mite hi kan rilru a piang sual zo tawh zawk em ni ang le, hetia ei zawnna chi khat ang maia kutdawh nih hi kan zah tak loh mai ni? Tun hma angin kutdawh lo turin chhungkhat laina kan inchhawmdawl ta lo zawk em ni ang? Nge, tunlaia kutdawhte hian chhungkhat laina an nei lo em ni zawk le?

Mizote hi kan nunphungah chuan kan chhungkhat lainate’n emaw kut an dawh chuan kan mualphonaah ngaiin kan zak em em ṭhin a, kan chhungkhat lainate zingah kutdawh awm lo tur pawhin ṭan kan lain kan intuamhlâwm ṭhin. Chu loah pawh, kan ṭhenawm khawvengte zingah kutdawh ngai hial an lo awm pawhin an ṭhenawm khawvengte’n an ṭhenawmte chunga an tih tur hlen zo lohah inngaiin a zahthlak an ti bawk ṭhin kha a ni a. Chuvangin, chhungkhat lainate’n emaw, ṭhenawm khawvengte’n emaw kutdawh ngai an awm pawhin kut an dawh tawh lohna turin inpeizawnin ṭan an la ṭhin a ni si. Tunlai hian kutdawhte chhawmdawl turin kut an dawh tawh lohna tur hian an chhungte emaw, an ṭhenawm khawvengte emaw ṭan lakna hi khawi veng leh khuaah emaw a awm reng reng em le.?

Tuna a lan danah hi chuan kan rama kutdawhte hian chhungkhat laina an nei lo emaw, ṭhenawm khawveng an nei lo emaw tih mai awl tak a ni. Chhungkhat laina zingah kutdawh an awmin kutdawh tawh lo turin chhawmchhuah kan tum ta lo zawk nge ni ang a, kan ṭhenawm khawvenga kutdawhte pawh kan en liam mai mai tawh zawk ni ang le?

Hetianga kan kal zel chuan phairama vaiho ang maiin Mizoramah hian kutdawha ei zawn kan zak lo tial tial ang a, kutdawh pawh kan tam tial tial mai ang tih a hlauawm. Chuvangin, tun hma aṭanga Mizote kan lo hming ṭhatna ṭhin, kutdawh awm lohna ram ni zel tur hian ṭan kan lak a ṭha lo maw? Kan chhungkhat lainate zingah emaw, kan ṭhenawmahte emaw kutdawh an awm em tiin inen chiang ila, kutdawh an lo awm a nih chuan kut dawh tawh lo turin leh eizawnna dang ngaihtuahpuiin ṭan i la teh ang u.

- Hausanga Hauzel