2025 Parliament Monsoon Session leh a behbawm politics
Kamkeuna
Kum 2025 Parliament Monsoon session hi July 21-ah ṭan niin, August 21 thleng a awh ang. Session hi la zo mah se, monsoon session neih tawhah chuan boruak sosan leh inauh buai tamna ber session-te zinga mi a tih theih awm e. A chhan hrang hrangte tarlan kan tum dawn a ni.
Parliament session neih dawna tih dan phung angin, session ṭan hma ni Pathianni, July 20 khan sorkar laipui chuan all-party meeting a huaihawt a, eptu pawl aiawhte nen rorelna muanawm tak leh thawhhona ṭha neih dan turte sawi hona hun an nei a. All-party meeting-ah hian eptu pawl intelkhawm INDIA bloc chuan session neiha ngaihtuah tur hrang hrang ṭul an tihte an tarlang nghal. Chung zingah chuan Operation Sindoor kalpui laia US President Donald Trump-an inkahhai puang tura a tih vanga inkahhai puan ni anga sawi awm chungchang te, tun hnaia Bihar-a electoral roll revision chu ngaihtuah tur an sawi zingah hian an tarlang tel (hei hi kan chai ber tur a ni) bawk. Tin, sorkar laipui chuan eptu lamin ngaihtuah ho tura an thil ngiat hrang hrangte ṭha taka ngaihtuah a nih theihna turin session neih chhung hian thawh hona ṭha leh muanawm an duh thu an tarlang nghal bawk (a hlawhtling lem hlei lo va).
Kumin monsoon session neih mekah hian Lok Sabha-ah Income Tax Bill thar pharh a ni a, Bill hi kum 60 chuang hman tawh Income Tax Act of 1961 thlakna tura tih a ni. Bill thar pharh tur zir chiang tur member 31 thlan chhuah awmna kaihruai turin BJP leader Baijayant Panda chu Lok Sabha chuan a ruat nghe nghe. Bill thar tur hi tuna kan hman lai 1961 Income Tax Act chanve vela tlem leh hriatthiam awlsam tura duan a ni. Section 536 awmin, tuna hman laiah hian Section 819 a awm thung. Chapter awm zat 23 a ni a, hman laiah hian 47 a awm (He Bill thar Income-Tax and Taxation Laws Amendment Bills, 2025 hi August 11-ah opposition ho nawrh buai lai leh awm loh laiin put luha pass a ni).
Bihar leh Special Intensive Revision
Tunlaia boruak nei lian em em Election Commission of India (ECI)-in kumin kum tawp lama assembly inthlan nei tur Bihar-a Special Intensive Revision (SIR) hmanga electoral roll ennawn mek chuan sawiselna nasa tak a dawng mek a. Rahul Gandhi chuan ECI chu Bihar-ah SIR hmanga vote ru angah a puh bakah, poll body chu a vaiin BJP Election Chori Branch (Election Theft Branch) tiin a sawisel. ECI hian roll ennawnna hi kum 22 hnua a neih lehna a ni nghe nghe. ECI demna thu hi Rahul chuan X kaltlangin a tarlang bawk. Eptu party-te chuan roll ennawnna kalpui mekah hian citizenship document an neih loh avangin India mi ngei maktaduai tam takte chuan an dikna chanvo an nei dawn lo niin an sawi. Heng a hnuaia point 11-te hi SIR-in document-a a pawmte chu a ni:
1. Sawrkar hnathawk mek emaw pensioner (Central Govt./State Govt./PSU)-te hnen aṭanga eng identity card emaw, pension payment order.
2. Mahni ngei a ni tih finfiahna card/certificate emaw, document ni 01.07.1987 hma lama India sawrkarin a pek chhuah (government/local thunietute/bank/post office/LIC/PSUs)
3. Birth certificate
4. Passport
5. Matriculation/educational certificate a lem ni lo, rintlak ngei board/university aṭanga pek chhuah
6. Permanent Residence certificate
7. Forest Right Certificate
8. OBC/SC/ST emaw caste certificate
9. National Register of Citizens
10. Family Register
11. Land/house allotment certificate
SIR kalpui dan fel lo vanga petition thehluhte Supreme Court-in hearing a neih hnuah August 12 khan ECI chuan tihsual awmte siamṭhat a inhuam thu a lo sawi tawh a. SC hian SIR chungchangah thil fel lo a awm a nih chuan a inrawlh tur thu a sawi bawk. Justices Surya Kant leh Joymalya Bagchi ṭhutna bench-a hearing neih hmasa berah hian SIR khingtu aiawh senior advocate Goap Sankaranaryanan chuan, “Voter tam tak tihbo an nih chuan inrawlh in lo intiam tawh a, mipui nuai 65 chu August 1-a draft roll tihchhuahah khan tihbo ngei an ni,” a ti. Poll body aiawh senior advocate Rakesh Dwivedi chuan, “Draft roll chauh a la ni a, booth level officer-ah siamṭhat theih a la ni,” a ti ve bawk.
Khingtu lam aiawh senior advocate Kapil Sibal chuan, roll ennawnna constituency lian lo aṭangin mi 12 thi anga chhinchhiah chu an la dam tih hriat chhuah a nih thu a tarlang. Dwivedi chuan, thil dik lo awm avanga chhui chianna phutte chu an hming pe turin a ngen zui ve bawk. Hetih laiin, Sibal chuan Bihar-a mi cheng tam zawk chu mi rethei niin, document ECI-in a phut anga nei lo an nih thu a sawi thung. Hearing neihnaa tel activist Yogendra Yadav chuan Bihar-ah kum 2003 khan roll ennawnna neih a nih thu a sawi a, Justice Kant chuan hemi hun laia roll-a awmte chuan roll-a awm turin document an neih kher a ṭul tawh loh thu a sawi lang. Advocate Prashant Bhushan chuan poll panel-in draft roll aṭanga paihte paih an nih chhan kimchangin an kawl thu bench hmaah hian a tarlang bawk.
India Bloc MP leh Special Intensive Revision
Eptu party intelkhawm INDIA bloc MP-te chuan July 23 khan Parliament complex-ah ECI-in Bihar-a electoral roll ennawnna, SIR a kalpui mek an duh lohna an lo lantir a. Eptu MP-te chuan roll ennawn mek chu titawp vat tur leh roll ennawn chungchang hi Parliament in pahnihah sawi ho ngei an phut bawk. Hemi ni, Parliament rorel inkhawm hmaa lungawi lohna lantirnaah hian eptu party hrang hrang – Congress, DMK, TMC, Samajwadi Party, Shive Sena (UBT), JMM, RJD bakah Left party MP-te an tel. BJP kaihhruai sorkar demna thu leh, SIR an duh loh thu pawh an tarlang nasa hle a ni.
INDIA bloc hruaitute chuan meeting an lo nei tawh a, he hunah hian Congress party president Malikarjun Kharge leh Lok Sabha Leader of Opposition Rahul Gandhi te pawh an tel. He meeting-ah hian Pahalgam beihna, Operation Sindoor, Donald Trump-in India-Pakistan inkahhuai a puantir nia a sawi leh, Bihar-a SIR kalpui mek bakah thil dang pawimawh zawhna an neihte chhang tura House-ah Prime Minister chu awm ve ngei tura nawr an rel bawk. Bihar-ah hian kumin kum tawp lamah assembly inthlan neih a ni dawn a, inthlan dawn hnaivai taka electoral roll ennawn a ni leh, nihna finfiahna atana Aadhaar number pawm tel a ni lo chu eptu lam hian an sawisel nasa hle. Supreme Court-ah pawh thlenin, July 10 khan Court chuan ECI hnenah Aadhaar, voter ID leh ration card-te chu roll ennawn meknaa nihna finfiahna tur document hman tur zingah pawm turin a ti tawh a, hemi chungchang hi July 28-ah ngaihtuah leh tur a tih a ni nghe nghe.
Supreme Court leh Special Intensive Revision
Parliament monsson session neih mekah rorel mumal thei loa eptu member-te au buai chhan pakhat, Bihar-a SIR kalpui mek chungchang chu August 12 leh 13-ah Supreme Court-in hearing a nei dawn tih July 29 khan a puang a. Bihar-a SIR kalpui chungchangah hian Supreme Court-ah petition eng emaw zat thehluh a ni tawh a, complaint thehluhah hian roll aṭangin mi nuai 65 paih an ni tawh tihte tarlan a ni. Hetih lai hian, ECI chuan hming paihte hi awmna hmun sawn leh mitthi tawhte an ni tih a sawi thung. SC hian hearing neih remti mah se, roll ennawn hna kalpui mek erawh a khap lo.
Rashtriya Janata Dal (RJD) MP Manoj Jha aiawhtu senior advocate Kapil Sibal chuan, roll aṭanga paih takte insawifiahna hun siamsak turin a ngen a. SC chuan SIR kalpuinaah dik tawk lo hmanga inpaihna a thleng tak zet a nih chuan Court a inrawlh ang a ti.
West Bengal leh Special Intensive Revision
ECI chuan July 31 khan West Bengal chief electoral officer (CEO) Manoj Agarwal chu state chhunga SIR kalpui tura rang taka inbuatsaih turin a hriattir a. West Bengal-ah hian nakum 2026-ah assembly election neih tura ruahman a ni. West Bengal-a SIR kalpui tur hi Bihar-a kalpui mek, eptu pawl lamin nasa taka an dodal leh an sawisel mek a ni. SIR hmang hian voter tam tak paih a, NDA sorkarin a hlawkpui theih tura kalpui niin an sawi. ECI-in hriattirna a tihchhuah hnu hian chief minister Mamata Banerjee chuan state chhunga district magistrate zawng zawng nen state administrative headquarters Nabanna-ah meeting an nei nghal a. District magistrate meeting-ah hian SIR kalpuina atana camp buatsaih dan te, campaign lo dawnsawn dan leh, state-a chengte’n harsatna an tawh chinfel dan tur video presentation an en ho a ni.
CEO Agarwal hnenah hian booth-level officer (BLO) leh supervisory booth-level officer ruat turin ECI chuan a hriattir a, ruat chhuahte chu Commission hnena thehlut nghal turin a ti bawk. BLO atan hian sorkar hnathawk nghette chauh ruat turin a hrilh a, CEO chu booth-level agent (BLA), party hrang hrang aiawh ruat tura hriattir an ni. CEO hian August 1 khan party tinte chu an aiawh hming pe turin a hriattir nghal bawk. State CEO office chuan BLO leh BlA chu chenna in hrang hrangah kalin, SIR chu mipuite an hrilhfiah dawn a, a pawimawh dan leh kalpui a ṭul dante an hrilh dawn a ni, a ti. BLO-te hian an mamwhphurhnate an hlen ṭhat loh chuan ECI-ah hriattir an ni dawn tih a tarlang bawk. Mamata Banerjee chuan district magistrate-te nena meeting-ah hian sorkarin programme a ruahman tawh chu kal tlangpui turin a hriattir a, ‘Our neighbourhood, our solution’ tih hmanga hmalakna chu August 2 khan an ṭan a ni. He programme hi sorkar hmalakna leh chinfel ngai buaipuina tura tih a ni a; hemi hnuaiah hian August 2–November 3 thleng camp buatsaih tum a ni.
Eptu party leh National Sports Governance Bill 2025
Parliament monsoon neih mekah eptu pawl hruaitute chuan August 6 khan Lok Sabha Speaker Om Birla hnenah National Sports Governance Bill, 2025 leh National Anti-Doping (Amendment) Bill, 2025 chu Joint Parliamentary Committee (JPC) hnenah ennawntir leh turin an ngen a. Eptu party hruaitute’n Speaker hnena lehkha an thawnah hian bill pahnihte hi pharh a nih hmaa ennawn leh ṭul nia an hriat thu an hrilh. Lehkha thehluhah hian, “Bill pahnihte hi ram tana nghawng lian tak nei a nih avangin, uluk zual zawka ennawn leh a nghawng theih tur awmte thlir chungin Joint Parliamentary Commmentary-ah ngaihtuah ni se kan duh a ni,” an ti. Speaker hnena lehkha thehluhah hian party hrang hrang aiawh mi 12-in hming an ziak a ni.
Sports bill thar hian India rama sports huangah nghawng lian tak a nei dawn a; inrelbawlna leh kaihhruaina mai bakah, ram chhung sports hmelhmang thlenga a nghawng theih dawn avangin eptu party hruaitute hian uluk zawka ngaihtuah hi an phût bawk. National Sports Governance Bill hian national sports body leh an hnathawh theihte a nghawng dawn a, National Anti-Dopping Bill erawhin infiamna huanga dan phal loh damdawi lam hmanna tur khapna a thuam chak dawn a ni.
Congress party leh Sports Bill
National Sports Governance Bill, 2025 hi August 11 khan pawm a ni a; hemi kaihhnawihah hian Congress party chuan sorkar dodalin, a bei chhunzawm zel a. Bill thar a pawm chungchangah ram chhunga sport inrelbawlna huangah thuneitu sangte chauh dah pawimawh a ni leh dawn a ni, an ti a, an duh lo bur a ni. Sports Bill pawm chu Rajya Sabha-ah ngaihtuah ve an duh thu Jairam Ramesh chuan X kaltlangin a tarlang tawh. Congress general secretary in-charge of communications Jairam Ramesh chuan Board of Control for Cricket in India (BCCI) chuan duhsak a hlawh dawn tih sawiin, RTI hmang pawhin hmalak theih a ni leh dawn lo niin bill pawm thar a hmuh dan a sawi. Parliamentary Standing Committee on Education, Women, Children, Youth, and Sports chairman Digvijaya Singh chuan Lok Sabha speaker hnenah July 11 khan Sports Bill chu pawm a nih hmain zau zawk leh thûk zawka zir chiang tur committee chu din tura ngenna lehkha a thawn a, mahse, a ngenna chu hnawlsak a ni tih Ramesh chuan a sawi.
Hengte avang hian committee din ngei ngei a ngaih thu a sawi a; mahse, Modi sorkarah chuan ngaih pawimawh a ni lo fo a ti. Hun rei tak aṭanga nghah tawh National Sports Governance Bill, 2025 chu Independence hnua India-a sports dinhmun siamṭhatna tur lian ber a nih thu Sports minister Mansukh Mandaviya chuan a sawi a. Amaherawhchu, August 11 khan hun reilote chhung sawi hona neih a nih hnuah leh eptu pawlin SIR vanga lungawi lohna an lantir chhungin ‘voice vote’ hmanga pawm a ni zui ta tho a ni. A awmziaah chuan, eptu ho awm loh laia bill hi passed a ni tihna a nih chu. Hei hian nghawng lian tak a nei chho zelin a rinawm a, dodalna pawh a la awm chho zel dawn niin a lang.
ECI versus 2024 Karnataka Parliament inthlan
Congress party chuan kum 2024-a Karnataka Parliament inthlanah vote lem tam tak awmin, BJP an chak theihna turin vote lem siamnaah ECI a thawhpui nia a sawi hnuah, he thil thleng duh lohna lantirin ram pum huapin kawng hrang hrangin nawrh huaihawt an tum a. Congress MP-te hian Parliament-ah vote lem/vote ruk chungchangah lungawi lohna pawh an lo lantir tawh. Hemi hnuah ECI nawrna turin programme siam chhoh an tum a; kawngzawh leh signature campaign-te neih an tum bawk. Party hruaitu, Lok Sabha-a leader of opposition Rahul Gandhi chuan vote lem chungchangah data tam an la nei dawn tih a sawi a, “Ram danpuiah mi pakhatin vote pakhat a nei tur a ni, he dan hi humhim zel kan tum. He dan kenkawh hi ECI tih tur pawh a ni,” a ti.
Vote lem siam duh lohna lantirin Congress hian August 22 – September 7 chhungin state headquarters tinah ‘Vote Thief–Leave the Throne’ tih thupui hmangin kawng an zawh dawn a, September 15–October 15 chhungin signature campaign neih an tum bawk a. August 14 zan khan ram chhunga district headquarters zawng zawngah ‘Save Democracy Torch Procession’ an huaihawt bawk. Congress party student wing National Students’ Union of India (NSUI) hruaitu Kanhaiya Kumar chuan party hruaitu, Rahul Gandhi chuan vote ruk a nih dan chiang takin ram mipui hmaah a pho lang a, kan ramah democracy chu rahbehin a awm tih a chiang hle a ni, tiin, “Congress party chuan vote ruk leh vote lem siam hi kan theihna zawng zawngin kan do dawn a ni,” a ti.
Congress party president Mallikarjun pawhin August 13 khan inthlanaah vote lem hmanga vote thlak a nih dan video a tichhuak a, ram mipuite chu dik lo taka BJP-in ram an lakna dodal a, ram danpui humhim tura aw chhuah turin a ngen. Mallikarjun chuan, “Vote thlak tura in dikna chanvote chhuhsaktir suh u. Zawhna zawt ula, chhanna pawh beisei nghal rawh u. Vote lem siam chungchangah aw in chhuah a ngai,“ tiin a sawi a ni.
Vote Chori leh ECI
Congress leader Rahul Gandhi leh eptu pawl INDIA bloc ten inthlan leh SIR kalpuinaa ‘Vote Chori’ (vote rukna) tia dik lo leh mawi lo taka an puhna awmte ECI chuan a finfiahna tarlan an phut thu August 14 khan thuchhuah siamin an tarlang a. ECI chuan an puhnate hi thil dik lo leh ram chhunga voter vaibelchhe tam tak zah lohna leh puhchhiatna a ni tih an tarlang a ni. ‘One person, one vote’ kalpuina dan chu kum 1951-52-a India-a inthlan kalpui hmasak ber aṭang khan hman a nih thu an sawi a, “Tu pawh vote vawi hnih thlak an awm tih an hriat chuan, affidavit nena intiamin a finfiahna commission-ah rawn keng rawh se,” an ti.
Rahul Gandhi chuan August 7 khan New Delhi-a thuthar lakhawmtute a kawmnaah, kum 2024-a Bengaluru Central Lok Sabha-a Mahadevapura assembly constituency inthlannaah vote nuai khat aia tam ruk a awm niin a lo tarlang tawh a; heng avang hian Congress-in hnehna an chang lo niin a tarlang tel. Heng thilte a nih avang leh eptu pawl hrang hrangten ECI an beih chhunzawm tak reng avang hian ECI lam chuan thil fel lo awm tihfiahna chu an phut thu an tarlang a, Rahul chu a thil hriatte chu ziaka tihchhianna thehlut turin an hriattir a ni.
Vote Adhikar Yatra
Lok Sabha-a Leader of Opposition Rahul Gandhi chuan mimal tinte vote chanvo neih humhalhna tura kawngzawh, ni 16 awh tur ‘Vote Adhikar Yatra/Voter Rights Yatra’ chu August 16, 2025 khan a nei ṭan a. Vote Adhikar Yatra hi assembly inthlan hmabak – Bihar state chhungah neih a ni dawn a, Sasaram aṭangin a ṭan ang a, ni 16 chhung hian km. 1,300 chuang kalin, district 20 chuang a paltlang dawn a ni. Kawng lakah rally, padyatra leh public meeting-te neih nghal a tum. A ruahman dan ang chuan, September 1-ah Patna-ah zoin, rally lian tham tak a nei zui ang. Rally-ah hian INDIA bloc-a tel party hrang hrang hruaitute pawh an tel dawn a ni. Rahul hian yatra hi democracy rama mi tinte dikna chanvo neih, ‘Mi pakhatin vote pakhat’ tih humhimna tura nei a ni tih sawiin, Constitution venhim a nih theihna tura a hmalakna hi thlawp turin mi tin a sawm a ni.
Pawan Khera (Congress Spokesperson) chuan Rahul-a yatra neih hi India ram democracy chanchina thil chhinchhiah tlak a ni dawn tih a sawi a. “Hetianga Rahul Gandhi a thawh chhuah chuan India democracy chuan phek thar a kai ṭhin a ni,” tiin, yatra chu ram mipui zawng zawng tan a nih thu a sawi. Bihar-ah hian assembly inthlan hnaivai tawh takah ECI chuan roll ennawnna SIR a kalpui a; hei hi tun Parliament monsoon session-a boruak lian ber leh ram pum nghawr nghing dawttu a ni. Rorel hlei thei lo assembly chhunga inauh buaina vawi tam lo thlentirtu a ni bawk. Hei hi Congress party bakah eptu party dangte pawhin an sawisel nasa hle. SIR kalpuina hnuaiah hian voter list aṭangin mi mtd 6.5 chuang paih nia sawi a ni. Hei hi inthlan neih tura vote tihchingpenna pakhat niin eptute chuan an au chhuahpui nasa a; a bikin hnam hnuaihnung leh tlem zawkte a nghawng nasa hle a rin a ni.
Bihar-a NDA sorkar chuan Rahul-a yatra chu a sawisel nasa hle a, deputy chief minister Samrat Choudhary chuan mipui rilru hruai kawi tumna a ni, a ti. Congress leh a thawhpui party-te chu ECI ngai pawimawh loah puhin, SIR chu langtlang taka kalpui a ni, a ti bawk. Hetiang boruak karah hian Rahul-a yatra hian engtin takin nge Bihar-a Nitish Kumar party Janata Dal (United) leh a thawhpui NDA sawrkar hi a nghawng buai dawn tih hi India ram mipui mit fukna a ni hrih dawn a ni.
Tlangkawmna
Kumin Monsoon Session tluka session boruak nei lian hi a tam kher awm lo e. India Constitution nghawr nghing dawt thei thil thleng a tam vangte pawh a tih theih awm e. Bihar-a SIR kalpui mek leh West Bengal-a nakum inthlan puala SIR hman a nih tur thute hian India ram mipuite zingah zawhna, rinhlelhna leh ngaihṭhat lohna tam tak nei an awm mek. SIR hian eng thil nge a kan kai ang a, eng ang takin nge India ram politics a rawn chhem alh dawn tih hi mi tam takin an thlir mek a ni.
Kum hmasaa Karnataka inthlana thil fel lo a awm nia hriatte pawh hian boruak a nei lian chho zel dawn niin a lang. He thil thleng mek avang hian mawhphurtu berte zinga mi ECI laka mipuite rinna a tlakhniam phah viau ang em? Mipuite rinna hi a tlahniam mek zawk em? Zawhna awm thei tak a ni. ECI hian mipuite rinna hi engtin nge an neih let leh ang tih hi mutmawh hnarmawha an neih a, theihtawp an chhuah a, an inseamṭhat leh vat a pawimawh hle awm e. Khawvela democracy ram lian ber–India ti-democracy-tu berte zinga mi chu ECI hi a ni awm e. Tin, India rama constitutional body pawimawh tak mai leh democracy ti-democracy-tu ber te zinga mi hi inseamṭhat ngai lai a awm a nih chuan insiam ṭha a, tih dik loh a lo nei anih pawn huaisen takin in pawm ngam se, mipui tam tak rilru pawh a dam zawk ngei ang.
- Dr. T. Lianhmingsanga
Postdoctoral Fellow,
Indian Council of Social Science Research,
Ministry of Education, New Delhi