Mahni um phak loh thu kan sawi leh ṭhin hi

Khawvel Kristian awm zawng zawngte zingah Zo fate biakina thusawi ropui tak tak kan ngaithlain, kan sawi ṭha ber ang. Maichama ding apiangin ringtu nun kawng a zawh fel ber a, a sawi ṭha ber a. Vawin aṭang, zanin aṭangin, tiin, heti khawpin kanin khawm tam a, he thu hi kan sawi tam ber a. Bul ṭan ngai reng, ringtu nausen, hnute hne, chaw rum ei thei lova châwm ngai, tarthi lek lek tawhte thlenga biakina lawi Zo fate hian tlakchham chu kan nei a ni.

Mizo Kristiante nun hi romei zâmin rei a daih lo angin, biakin pêla nun tak hmuh tûr hi a awm mawlh lo, varlam arsi ang mai kan ni. Diknate, rinawmnate, thil ṭha lo laka inthiar fihlim tura kanin fuihna zawng zawngte hian zawm a hlawh zo lo va; a fuihtu dang lo, ngaithlatu dang lo, vânlal nau ang a ṭahna ramah hian kan dang chuang lo ve. Khaw tin, veng tina sanitation kan din a, faina leh thianghlimna beipui kan thlak a. Eng emaw chen zawng hma pawh kan lain, kan sawn ve bawk. Mahni ha pawh tifai peih lo hian faina kan sawi ve fo erawh zah nachang i hre mawlh teh ang u. Nui sen ṭhaw chung hian mi dang fai turin kan hrilh vete hi zawng, záwngin a mawng khâk hmu loin a ṭhiante mawng khak a nuih tih zawng zawng kan phur mek a ni hi.

Mizote hian kan hmalakna zawng zawngah hian, a tam zawk hi chu kan hlawhchham fai vek a tih theih awm e. Lui dung, ram ngaw leh nungcha humhalhna kawngah pawh hian hmasawnna hmel lanna reng a awm lo tluk a ni. Mahse, hmalak erawh kan tihmakmawh a ni lawi si a. Kan sorkhawrte thu tiamna reng mai hi a ropui viau lo. Kan khelh tawk hi zu zawrh tum lo party apiangin sawrkharna an vuan a ni ta ber mai a ni hi maw. Ram ropui tak thlen zawng a la hla deuh a ni e. Zu leh drugs awm lohna hmun jail-ah pawh ngawlveite meuh pawhin an nghei thei alawm.

Zu leh drugs kal pel thei Kristian nih hi thil har tak pawh a ni lem lo. Milem be zingah ruihhlo laka fihlim hi an va tam si em. Naupan tet ata ruihhlo laka inhnamhnawih ve lo tûra zirtirna dawnga seilian zingah hian, kan sual buan tawkte hi ho deuh mai a ni. ‘Rawh’ leh ‘suh’ tih thu zawm duh miah lo Zo fate hian kan hring nun kawng hi kan zawh dik hlei thei lo va, mi nun kan en a, kan nun dan erawh kan inen let duh si loh avang hian kan boral mek a ni hi.

Chak lohnaa thuam, fel lohna hriamhrei kawrchung hain, rinawm lohna pheikhawk kan bun a, hlêmhletna silhfel inbel chungin kan um phak loh thu kan sawi a. Vân tuithawl leihbaw zo tûrin vân hnuai hming sak zingah hian kan awm lo va. Lo phun, lo phun tûr pawh hi kan ni nek lo ve. Thufing bung khat pawh ziak thiam lo hian fin hi zir phawt ila, ṭawngzul ringawtte hian mifing ṭawngkam a chhâk chhuak kher lo. A hun taka ngawih chuh leh a hun taka ṭawng chuh thiam mite hi an ni, mize ropui tak neitute chu.

Dawt sawi turin inngaihtuai buai chiam a ngai lo va, thu dik sawi turin huaisenna a ngai ve bawk e. Kan palzam maite hi mi dang tan harsatna a thlen fo, tihte hi i chhût ve ṭhin ang u. Ruihhlo zuarte pawh hian an duh a lawm, ti ngawt lovin, bianga thlan tui luangin chhungkua châwm turin inbuatsaih ila. Mi nunna suattu hmanga chhungkaw chawm hi zawng, a rah chhuah hi kan dam lai ngeiin kan hmu dawn si a. Ka sim thei lo, titu chuan, tum pawh a la tum lo hrim hrim tihna a ni. Chu chu ka meizial nghei thei lo, ka tih ka tih hian, a tilang chiang khawp mai.

Hlun lo tur rama chêngin, dam hlen tur ang main duhâmnain kan ṭânghma kan hâi a. Kan ṭhiante kuta sahrang kan hmu lian a, mahse, kan chana lâwmna rêng ka nei chuang si lo. Bawhchhiatna fahrinte nun hian tlâkchham a nei reng mai zawng a ni hi.

Mahni ûm phâk loh thu kan sawi leh ṭhin a nih hi.

- Zothansanga,

Chhiahtlang Kawnveng

PH : 9612333536.