TONS CONGRATS A. LALCHHANDAMA (Mike Lalmanzuala Vindicated?)
‘A chiang lo Lelte, va lâm leh rawh.’ Andrew Lalchhandama, IIS a chiang e. A chiang lo chu, Zoram sorkar thuneitu lian hote lawmpuina news (media)-a kan hmuh tam lélú ang hûin UPSC meuhin Indian Information Service (IIS) atana a thlan dan, selection process kha maw le! UPSC kan ringhlel hauh lo. A selection pawh chuti tho.
Hman hmanah tawh, 1964 khan, Lalfakzuala kha 1965-a IAS a tlin hma khan, IIS-ah a lut hmasa a, a hnuah ama fanu ngei Baby Zoremsangi chu 1995 UPSC hnuaia Combined Competitive Exam (tuna Civil Services Examination – CSE an vuah tak) for Central Civil Services 1995-ah a tling a. He hna ṭha tak a thawh lai hian accident-ah vanduaina tawkin 1997-ah kan chân ta a nih kha.
IIS-ah hian chutiang UPSC exam-a lut pahnih, Lalengliana leh H. Thangkhuma, regular recruit 1966/67 kan nei. C. Lalsangliana pawh All India Radio aṭangin IIS-ah a lut bawk. An in senior khalh zar zar ṭhin nghe nghe.
Hetianga pafaa hnathawh inzui hi ka rilruah an ‘special’ riau mai a, sawi nuam ka tih zawng tak ni mai loin, an chhuanawm ka ti em a, kan chhep kual leh ta pek a nih hi. F. Pahnuna leh a fapa Lalrinliana Fanai te IAS (RR) ve ve pawhin an rawn zui a. Chutiangin, Vanhela Pachuau leh a fanu Grace Lalrindiki Pachuau te IAS (RR) an awm ve ve leh. An pate pathum (3) hi Mizoram sorkar Chief Secretary meuh an lo ni ṭheuh tawh bawk. A la hma zaw ber zawk awm e.
Maj. Lalhmingliana, IFAS zeta IAS khan fapa Lalhuma, IAS (RR) a nei. Haflong (Assam) lam chhuak Zo–Vumkhawsei Changsan, IRS (RR) aṭanga IAS (RR)-in fanu IAS (RR) leh fapa IFS (Foreign Service) a nei; an chhuanawm ropui mang e. DHANICS aṭanga IPS (RR) C. Dothanga hi sawi hmaih phal chi a ni lo. A fanu Christina Zothanpari, IAS (RR) sang zet maia tling, a pasal medical doctor Franklin Laltinkhuma, IAS (RR) bawk, a nuṭâ David Z. Chawngthu, IRS (RR) te nen, unau chhuanawm takin pa chhuanawm tak an nei.
Aizawl Post, 15th August chhuakah Dr. R. Lalthangliana’n Andrew Lalchhandama a lawmpuinaah ST quota pakhat awm chhunah UPSC-in A. Lalchhandama, IIS atan an thlang hi a lawmpui takzet tih thu a chuang a. UPSC result pangngai chhuahna kha a rei tawh ang reng bawk si a, val hi ka lo chiang lo ta pek a. Chuti chung chung chuan, kei ve luklak ‘Lawmpuina Congrats chu a ton-a tons’ zuk nia! Kg emaw, quintal emaw lek a ni teuh lo, tons!
Eng nge Mike Lalmuanzuala ropui taka sawi lan ve kher a ṭulna? E le, IAS (rtd) a nihna ngawt aiin Rev. Thansiama nena ‘Mizote kan pawnlânzia a thûk’ titu, kan zinga ṭhahnemngai taka la awm a nih vang hian maw le! An tidik ve alawm.
UPSC-a kan tlakhniam dan i chhût ve ngai a nih chuan, kan chhuanthar chhuan em emte hian an tlakchham lian em em mai chu, hriatna chînchhuak leh kimchang, Sapṭawnga ‘depth and thoroughness’ hi a ni ka ti ngam thak zak! An inquisitive tawk ka ti hlawl lo! Kum 10 chuang kan NIL tawh.
Chuvangin, nang, Andrew Lalchhandama, IIS thar, kei kum 90 val, Chalkhawpui hian ṭhahnemngaihna hmingin ka zawt a che. UPSC hnuaia IIS ni tura i exam leh interview te, a selection process-te step by step-in min hrilh ta che, mipui hriatthiam theih nanah.
A tawp berah chuan, nangmah leh i chhungte tan, kan ram leh hnam tan, ṭha tak leh ṭangkai taka thawk turin kan duhsak che a ni e.
- F. Lalremsiama, Chaltlang, 8415994340