Kohhranin fiahna hmanrua a dodal dan tur!

Mihring hmasa ber Adama a siam zawh hlim khân, Eden Huan lai takah 'A chhia leh ṭha hriatna' thing dah duh tlat Pathian zia leh Zoram kohhran leh ringtute'n kan rama fiahna hnawl bo, dah bo kan tum daih dan hi chu, Pathian leh Lal Isua thisena din kohhran inkâra palai hna thawktu Thlarau Thianghlim zirtirna kalh tlat a nih duh hmel ta riau a nih hi.

Lal Isua lahin amah zuitute kha, "Chinghne zinga beram angin ka tirh che u hi," tiin, fiahna hmanrua ber chinghnia lak bosak daih lam a hawi der lo. Zoram kohhran leh ringtute erawh chu, zu in mite fiahna hmanrua zu dah bo tumin kan phe sek a. Ruihhlo hmanga fiahna hmachhawn hlau zek zek ni awm fahranin, ruihhlo do rêm kan tum thûl! Do tur zawng an ni, mahse, khawvel awm chhûng do rêm mi an ni ngai dâwn lo.

Hlep rûkna leh ei rûkna, kut tling lova sum thawh chhuah hmanga thangṭhat lak tum râna kohhran leh khawtlâng tâna insengso ṭhinte lakah erawh, dawhtheihna kan ngah leh êm êm lawi a! Ei rûk thubuai vanga dãn ro rêlnain thiam loh a chantirte ngei pawh Zoram kohhran zingah phuar ngam kan awm miah lote hi ngaihtuah chian chuan, a zahthlak fu lo maw?

Chutih laiin, Pathianin a huat ber mai, mipat hmeichhiat hman khawlohna leh mawngkawhurna hmanga fiahna erawh, a thlawp zawng ni awm takin sawrkar lamin 'Use condom' tia he lama ninhleite inven nâna a hmalakna ualau tak pawh hi sawisel kan tum leh hauh si lo. Zu leh ruihhlo fak mawi kan tumna lam a ni lo. Baibul zirtirna milin engtia lo hmachhawn tur nge tih lam kan sawi tum a ni zawk.

Sum thianghlim lo tih hriat chian êm êm kan hnawl phal leh lo bawk. Tun hnaiah kohhran lian pahnih khatin sum thianghlim lo an dawn dâwn tawh loh thu an chhuah ngam ta chauh mai pawh a! Rawngbawlna thûk zawk leh zau zawk, mawhphurhna lian zawk leh rip zawk a chungah nghah ngam a ni dâwn em tia a mite fiah ngei ngeitu Pathian hian kan rama ringtute fiah nân zu, ruihhlo, sex, sum thianghlim lo leh bawlhhlawhte hi a hmanraw leklam langsar zual an ni reng dâwn a.

Henga mite fiahna hmanrua hnawl zawng leh la bo zawngin, Pathian hi Eden Huan ata tawh a che duh hlek si lo a. Chutih lain, a kohhranhote zawkin Pathian mite fiahna hmanraw hrang hrangte ûm bo tumin, mawngvawmba ang sekin kan phi chéng a ni si. Hengte hian kohhran hi huaisenna min pe thei si lo a nih hi.

Pathian chuan amah ringtu tak takte leh a hranpa taka a rawng bawl tura a koh, a thlante chu fiahna a pal tlangtir ngei ngei tawp mai a ni. Fiahna tâwk ngai miah lo mi piangthar a awm theih loh! Tin, vawi khat mai a fiah ngai bawk hek lo. A khât mawi tâwka a mite fiah hmang Pathian a ni tlat a ni.

Eng vang nge, eng nge a chhan? Ringtu nun kawng leh rawngbawlna kalkawng hi a chhawrdawh, inkhaidiat tiin a sawi theih awm e. Bulṭanna hi sâng tak leh dinhmun pawimawh tak aṭanga ṭan nghal ngawt an awm ngai tlat lo. Hniam tak aṭangin bul kan ṭan a, fiahna hmangin dinhmun sâng zawk leh pawimawh, mawhphurhna thûk zawkah chhawr tlâk kan ni dâwn em tih hriat nân, tlem tê chungah a rinawm tluan thei em tih hriat nân kan hmaah fiahna a chhawpsak ziah ṭhin.

Tih tur a pêk, mawhphurhna a tuk a tihlawhtlingin a chanvo a hlen thei reng em tih hriat nân, fiahna tenau aṭangin fiahna hautak tial tial hmangin, eng ang taka Pathian tâna mi rinawm, mi rintlâk nge a nih tih Pathianin a hre duh tlat a ni. Chutiang fiahna pal tlang Hebrai bung 11 chhova mite ang kha Zoramin a mamawh ngawih ngawih an ni ta a ni.

Zu hi do tur a ni a, ruihhlo pawh tihrêm tuma do bur tur a ni. Ei rûkna leh hlemhletna pawh do a, hnualsuat ngei ngei tur kan ni. Amaherawhchu, heng Pathian fiahna hmanruate hi râlpui phiar taka phiar a, hmelma hlauhawm leh lian ber ni awm taka kohhran berin a chhuah ta mai hi chu kan ti dik lo a ni.

Zoram kohhrante hian heng fiahna hmanraw hrang hrangte hi, Pathian ṭihna nena lo hneh ṭhin zawk tur kan nihzia kan sawi uar tur a ni zawk dâwn lo'm ni? Kan kiang hnaivaiah, kan khawi ilo kalna hmunah leh puipunna hmunahte heng fiahna hmanruate hi awlsam taka ban theihin awm reng mah se, Pathian hminga hnawl ngam zawk ṭhin tura kan infuih a hun ta tak zet a lo ni e.

I Petera 1:5-7 kan en chuan, "Chhandamna, hun hnuhnunga lang tura peih sa chu hmu turin, rinna avangin Pathian thil tih theihnaa ven chu in ni. Chu miah chuan nasa takin in hlim a ni, tunah (a ṭul chuan) thlemna tinreng avangin lungngai rih mah ula, in rinna fiahna, rangkachak meia fiah hnu pawha boral ṭhin aia hlu zawk chu Isua Krista inlãr hunah chuan fakna leh chawimawina leh ropuina tur a lo nih theih nân," tih thu kan hmu a ni zawk si a!

- Lalremliana Pachuau