EYE DONATION

Kan taksa bung hrang hrang te hi an pawimawh em em vek a, chung zingah chuan Mit hi a pawimawh ber berte zinga mi a ni.

Eye donation chu kan thih hnu atana kan mitdarthlalang (Cornea) phal taka kan pek hi a ni. Mit pek chu Eye Bank team in rang takin mitthi awmna hmun aṭang chuan an la ṭhin. Eye bank ah hian Cornea (Mit Darthlalang) chu dahṭhat theih a ni. Eye Bank hmasa ber hi kum 1940 khan New York (USA) ah din a ni a, Mit pe tura intiam hmasa ber chu Dr. Paton a ni. India ramah pawh 1943-ah Eye bank kan nei ṭan a, Eye donation hmanga Corneal transplant (Mit Thlak) hmasa ber chu kum 1960-ah Indore (MP) ah neih a ni. Mizoramah hian 31st July, 2008-ah Eye Bank hawn niin a kum leh 25th September 2009-ah Eye Donation hmangin Civil Hospital mit Doctor leh Sri Sankaradeva Nethralaya, Guwahati ten nen ṭangkawpin 1st Corneal Transplant tih a lo ni ta a. Mizoram Eye Bank hi Eye Bank Asociation of India member niin Transplantation of Human Organ Act, 2011 hnuaia register fel thlap a ni.

Eye Donation lo hlawhtlinna atan hian Central Sorkarin ruahmanna siamin kum tinin Eye Donation Fortnight (25th August to 8th September) hman ṭhin a ni a, hemi chhung hian nasa lehzualin hma lak ṭhin a ni.

Mizoramin Eye Bank kan nei ve ta a, he kan Eye Bank neihchhun hian mi inphalte inpekna lo chuan hna a thawk thei lo a, Mit Donate-phal an awm a ngai a ni. Tun dinhmunah pawh Mizoram Eye Bank a mit thlak ngai in-register te hi mi 391 an awm a, Civil Hospital-in mit Transplant an tih tawh hi mi 87 an ni a, waiting list, kan koh nghak mek hi mi eng emaw zat an awm bawk. Tin, Synod Hospital, Durtlang hi Eye Donation Centre niin, mit thlak ngaite pawh an thlak thei tawh a, an thlak nual tawh bawk. Tin, Eye Care Hospital-ah pawh mit thlak ṭhin a ni. Hemi bak ah hian cornea hi SSN, Guwahati ah thawn ṭhin a ni bawk a, Mizoram aṭangin a hmangtu turten an ûm thla mai ṭhin bawk.

MIT PEK CHUNGCHANGA HRIAT TUR PAWIMAWH TE :

• Mitthi mit chu a thih aṭanga darkar 6 chhunga lak tur ani.

• Mi tu pawhin mit an pe thei, mipa emaw hmeichhia emaw, kum eng zat pawh, eng blood group pawh eng sakhua pawh ni se.

• Miin Cataract (Mit naute paw) a nei emaw tarmit vuah a ni emaw pawh ni se, mit a pek theih.

• Thisensang leh zunthlum pawhin mit an pe thei.

• Mitthi mit lak chhung hi minute 15-20 vel chauh a ni. Mit lak vang hian mitthi hmelah danglamna a thlen lo. An chhungte tan pawh hmuh hrehawmin a awm dawn lo a ni.

• Mitthi chuan a dam laiin mit pe turin intiam lo mah se, a chhungten a thih hnuah a mit chu an peksak thei.

• Eye Bank Team chu mitthi awmna apiangah rang takin an kal ṭhin, in a ni emaw, hmun dangah pawh a ni thei. Heng phone no. ah te hian Eye Bank eng lai pawhin biak pawh theih an ni. Ph. 9436354701ṭ03892324564 Toll Free.

• Mit pe tura I intiam tawh a nih chuan I chhungte I hrilh hre tur a ni, tichuan I chungah thihna a lo thlenin I duhnate chu tihpuitlinin a lo awm thei ang.

• A rang thei ang berin Eye Bank phone vat turin kan ngen e. Eye bank Team te chu rang takin an lo kal ang a, mit chu awlsam tein minute 15-20 chhungin an la ang a, mitthi hmelah danglamna a awm lo vang. Tin, mitthi thisen 10ml chu test turin lak a ni bawk ang.

• Mit lak a nih hnuah chuan ngun taka enfiah a ni a, darkar 96 chhungin (a preserveṭdah ṭhatna azirin) hman ṭhin a ni.

• I mit I donate chuan mitdel pakhat ni lovin, pahnih tan mit varna thlentu I ni thei a ni.

• Mit lâk hi lei emaw hralh emaw a thiang lo.

Mitthi mit pek a nih dawnah chuan heng te hi hriat a ṭul a ni :

• Phone 9436354701ṭ0389 2324564 (Toll Free)–ah hian thih Darkar 6-8 chhunga mit lak a ngaih avangin a hma thei ang berin Eye Bank phone vat ang che.

• Fan emaw AC (air conditioner) off tur.

• Mitthi lu chu lukhama kam sân tur.

• Puanṭrawmawlṭlapua huhin mitthi mit chu khuh tur.

Statistics as on 23ṭ7ṭ2025

• Registered for Eye Donors (Pledges)– till date 9193

• Registered for Eye Transplant (Recipient) – 391

• Corneal Transplant till Date – 593 (CHA + SSN + Eye Care Hospital + Synod Hospital, Durtlang)

• Cornea Collection till date – 1321 corneas (CHA)

• Eye Donor (Mihring) Zat – 665

- Dr. Lalnuntluangi Khiangte, State Programme Officer (NPCB&VI), National Health Mission, Mizoram