Dan bawhchhia in harhna kan chhim?!

Tunlaiin harhna thlipuiin kan Zoram khawvel a nuai vel a, Kelkang kal tawh zat pawh nuai chuang fe an ni ta. Mizoram chhunga kohhran mai nilo, Zoram pawn aṭangin mi tam takin an chhim tawh a ni. Hmanni deuha, zingkara Zonet Zing Daifim hunah khan Kelkang kalte leh an lirthei hman zat an puang zel a; nikhat chauha Kelkang kalin lirthei an hman zat kha Aizawl City Bus 61 leh mimal lirthei ṭhahnem tak a ni.

Aizawl City Bus Owners Association chuan nitin lirthei 40 vel an chawlhtir ṭhin a. Mahse harhna chhima kal an tam si a, chawl awm lovin an service deuh vek zel tih chanchinbuah te kan hmu awm e.

Aizawl khawpuia chengte chuan City Bus hi kan teivahna pui ber a ni. Hetia a tlem tak thut vang hian bus a tawt a, stand-ah a ding zing tho si nen passenger tan a ninawm ṭhin. City bus leh Town Bus te hi Inkhawmpui nikhua (KṬP Conference, MṬKP Inkhawmpui, PYD Conference, YMA General Confernce etc) ah kan hmang rim hle a. Tin, thingtlangah pawh bus hman tur a awm loh vangin Pick-up, 207, 407 leh LPK ang chi hi kohhran leh YMA inkhawmpuiah kan hmang nasa a ni. Tun ṭum harhna chhima kal zingah pawh hian bus hman tur awm lohna khua te chuan a chunga kan tarlan te khi an hmang vek a ni.

Inkhawmpui or thil tihpui nikhuaa city bus leh town bus te khawdanga hman chhuah anih hian a tuartu te chu mipui an ni. Hei hian a lantir chu City Bus leh Town Bus nilo, mipuiin an hire theih lirthei (Bus) dang kan mamawh tihna a ni. A chhan chu hetiang hmanga inkhawmpui harhna kan chhim hian dan bawhchhia in kan hmang a ni tlat. Hlim takin harhna chang haw takin City Bus-ah zai ṭhup ṭhup mah ila dan bawhchhe haw kan lo ni tho, dan mit aṭang chuan.

City bus or town bus te hi a hming putna ang Khawpui chhungah chauh tlan phalna pek an ni. State Transport Authority hian Aizawl City Bus permit a pek hian Aizawl chhungah chauh service thei turin permit a pe a; mah se mamawhna vang emaw hriat loh vangin Champhai, Lunglei, Shillong etc ah te kan hmang ṭhin. Kohhran thil te, YMA angte in kan hmang chhuak a, mission field tlawh emaw inkhawmpui tur emaw harhna chhim tur emaw pawhin hmang mah ila dan bawhchhia in Bus kan hmang tihna a lo ni.

Tin, bus hman tur awm loh vanga Pick-up, 207, 407,LPK ah te mihring (passenger) kan inphur ṭhin hi dan phalloh bawk a ni leh a. Pick-up ah ch<angin accident palh ta ila dan angin engmah claim theih a ni lo. Chutiang bawkin Aizawl City Bus hmangin khaw dangah kal ila, vanduaina tawk ta ila engmah cliam theih a ni dawn lo a ni. City bus/town bus hmangtute ang thoin dan bawhchhe chungin thingtlang te pawhin khawmpui leh harhna kan chhim a lo ni.

A chunga kan sawi tak aṭanga lang chiang tak chu passenger phur thei lirthei (Bus/city ride) tih tam a ni. Transport department hian hman deuh khan JNNURM hnuaiah bus an dawng/lei nual niin ka hria a. Khangte kha khawpui chhungah service tir se, city bus te hi dan ang ngeia khaw pawna hire theihin permit pe ta zawk se a va ṭha awm ve. Anih loh pawhin car rental a awm tho si a, hetiang deuh hian ṭangtlangin mi hausa te hian hire theih tur lei se a ṭha viau mai lo maw?

Inkhawmpui nasa hnam kan ni a; dan lo anga bus hire reng ngailo hian dan ang ngeia hire theihtur bus neih a hun hle a ni. Zirlai pawl, college, club, ṭhianho, YMA section, chhungkua, KṬP/ ṬKP/ PYD/ CṬP/ SAY a group ang te leh sunday school ang te pawhin bus hmanna tur hi a awm reng si a, dan ang thlapa bus hire theih tur neih hi MLA bial 60 awmna state tan chuan a ṭul tak zet niin ka hria