AMC traffic jam solution mipui tan pawm harsa

AMC-in tun hnai­ah Aizawl traffic tihziaawmna atan hma a la nasa hle a, hetihlai hian a hmalak dan erawh mipui hrem tumna a nih avangin pawm a harsa hle.

Kumin March 1 aṭanga hman turin khawpui chhunga sumo stand te khaw pawn kawngpui zau laiah a sawnchhuak a, ruahman lawk leh buatsaih lawk loh a nih avangin sumo service neitute leh mipuiin vawiin thlengin an la pawm lo a, an la zawm lo bawk a nih hi. Dan hi mipui ṭhat tlanna atana siam a ni a, thil awlsam aṭanga harsa zawkah dan hmanga innawr luihna hi mipuiin an pawm ngai lo ang. Hunthar veng lei tlahniam aṭanga Aizawl tlak lama sumo chhuakte chhuahna a ruahman pawh tunah chuan a hman tlak ta lo. Kan sorkarin sumo terminal pangngai tak min la siamsak thei lo a, khualzin mite tana remchang a awm hma chuan khaw pawn kawngpui zau deuh lai aṭanga sumo chhuahtir hi mipuiin kan pawm ngai lo ang.

Hetihlai hian sumo neitute leh AMC hian an pahnih inkara inepnaah mipuite hi hmathehah hmang lo hram rawh se.

Kan state chhung leh pawna khualzin tam zawkin sumo service kan hmang a, kan mamawhna a sang a ni. Hei hi AMC hian hria sela, mipuite aiawhtu an nih angin mi zawng zawngin kan ṭhatpui theih turin dan lekkawh rawh se. Mipui mamawhna hi sumo service neitute pawhin zah se la, sorkar laka helna remchang emaw dan zawm duh loh phah nan te hmang lo ngam rawh se. Mipuite himna atana sorkarin dan a siamte zawm ṭha se, sumdawng an nihna aiin mipui rawngbawltu an nihna dah pawimawh thiam chuan mipuiin an thlawp zel ang.

Tun hnaiah AMC-in Aizawl khawpui chhungah Green Line Express service tir a tum thu a sawi a, hetihlai hian public transport chungchang erawh State Transport Authority thuneihna hnuaia awm a ni bawk si a, AMC hian mipui bum a tum nge a lo tithei ve reng? Mipuiin thudik kan hre duh e.

July 1 aṭanga hman ṭan turin Aizawl khaw­pui chhungah parking area a titlem a, parking fee 100%-in a tipung leh bawk. A insawifiah danah chuan parking fee sangin lirthei hawl chhuak a tihtlem phah a beisei ni awm tak a ni. AMC hian lirthei hawl chhuak ṭhinte hi nawmchenna leh incheina atan lirthei hawl chhuak ṭhin anga a hmu hi a vanduaithlak a, mipui hrem duhna rilru pua, ro a rel ta hi rorel tura mipui thlantlinte tih atana mawi lo a ni.

AMC leh sumo neitute inepna avanga mipuite tawrhna hi chinfel thuai a hun a, AMC leh sumo neitute hi inhriatthiamna nen mipuite tan remna siam thuai rawh se.