Traffic Police - Kan mi chhuante
Mizoram kawngpui a chêp si, a bikin Aizawl phei chu kawng a chêp mai bakah motor a tam si a, a karah two wheeler chak tak takin an tlân reng bawk.
Heti chunga buai lo leh intipalh awm hauh loa kan khawlaia motor leh mihring kan kal theihna chhan chu kan traffic police-te vang liau liau a ni a, anni hi fak phu leh chawimawi phu, hah thikula beite an ni.
Traffic police-te hi fak an phu tehreng nen hian kan fak tâwk lo deuhin ka hria. K rilru hnehtu deuh mai pahnih ka hmu tawh. Zarkawt traffic point lunlaiah naupang têtê school bâng traffic police-in a ṭanpui a, kawng an kân tur a pui lai ka hmu a, ka chhuang hle mai. Hnam dangte hian hmu ve se ka lo ti hle a ni. Millenium Centre bula kawng kânna laiah kum upa lam pakhat, a chetsual palh hlau taka traffic police-in kawng a kânpui lai ka hmu bawk. Traffic police-te hi an chhuanawm hle a ni.
Mi ṭhenkhat hian sawiselna tur hrim hrim an zawng deuh ṭhinin ka hria. Thla tawp lam leh Krismas dawn hnaihah te traffic police hian mi man tur an zawng deuh ni ten an sawi a, hmeichhe scooty khalh an zuam deuhten an sawi bawk. Hei hi chu an ngaihbel deuh mai mai a nih ka ring. Traffic police pakhatin police lama an hotu, wrong side-a a tlân avanga a dintir a, a tlân lêttir leh ngat lai ka hmu tawh a, kan kawngpui enkawltute hi miin an sawi ang mai mai an ni lo tih a chiang hlein ka hria. Dân dik loa lirthei khalh chu hmeichhia an ni emaw, police officer an ni emaw an man mai a ni.
Traffic tawt takah nilengin, nisa leh ruah-sur pawh pawisa loin an duty a, mi chi hrang hrang an hmachhawn a, chuti chunga biak nuam lo leh thinrim âwma an awm miah lote hi Nagaland aṭanga kan traffic kalhmang zir tura an rawn kal nal nal pawh kha a âwm hliah hliah mai.
Ṭum khat chu Mi-llennium Centre bula traffic point ka tlân pelh dawn laiin ka rilru kal ding lutuk chuan traffic signal en miah loin ka lo tlân tlang palh hlauh mai a, traffic police chuan min tiding thuai a, min hau a, "In himna tur kan ngai pawimawh a, nangmahni lamin in himna tur i ngai pawimawh lo lutuk mai," min ti a. A thu-sawi kha a dik hle mai. Traffic police-te hian mi tin kan him tlânna an ngaihtuah laiin keini mipuite hian kan himna tur te, midangte him zawkna turte kan ngaihtuah lo a, midang mai ni loin mahni himna atana pawi turin lirthei kan khalh fo.
An hnathawh hah-zia te, kan himna tur ngai pawimawh dân an siam hrang hrang leh lirthei tlan dan tur an ruahman aṭang ringawt pawh hian traffic police te hi kan ram timawitu leh kan chhuante an ni. Dân hi zawm ila, kan him tlang ang.
- Rochungnunga