Khawpuia retheihna umbo

December 12, 2020 Vanglaini Editorial column lamah khan mimal taka ka lo vei ve em em ṭhin, mahse kan sawi (address) hlawh loh em em, kan ram buaina bul pakhat ka lo tih ve ṭhin chu a rawn ziak nawlh mai a. Ziak mi ni mah suh ila han tui hnih lovah chuan ka ui thlu ngang si a, mi nuih kan ti ang tih hlauhna nen ziah belh thui lovin khawpuia retheihna (urban poverty) chungchang tlem comment ka rawn pe ve zawk dawn a ni. 

Vanglaini lama inziak ka rawn thur chhuak dawn a, hetiang hian - "Mizoramah hian thingtlang mite re­theihna thu hi kan sawi nasa a, hei hi thudik a ni a, chutih rualin khawpuia retheite retheihzia leh an dinhmun hi zir chian lehzual a ṭha khawp mai. Thingtlangah chuan mi pangngai chin tan chuan lo neia eizawn theih a ni a, sum leh paiah harsa deuh mah se mahni ei leh in tur tal thar chhuah theih a la ni. Khawpuia miharsa leh rahbi tleu laklawh tawh tan chuan thil hi a harsa em em a; thingtlang leh khawpuia miretheite khaikhin thu a awm lo a, chutih rualin khawpuia retheite (urban poor) dinhmun hi sorkarin a ngaihsak zual a ṭul khawp mai." 

"Aizawl khawpui chuan enkawltu bik Aizawl Muni­cipal Corporation (AMC) a nei a, AMC hian kum 10 chhung sum ṭhahnem tak nen Aizawl khawpui leh a chhunga chengte a enkawl a ni. AMC sum sen ral zat aṭangin miretheite ta tur engzat nge tel veṭ AMC hi tute nge hlawkpui a, tute nge dinchhuah phah a, tute nge hausakpui tih hi ngun taka zir chian a ṭha hle. Khawpui enkawlna hna hi mihausa kawk (pro-rich) zawnga kalpui a nih chuan, khawpuia retheite hi an bet zual zel dawn a ni. 

Khawpui enkawltu department bik UDPA pawh hi sum a ngahin hna pawh a thawk nasa a, hnathawktute pawh an fakawm hle. Chutih rualin tun ai hian miretheite tan luang chhuak nasa zual se, mi hausa zawkte tana remchang tur thil an duang chhuak ang bawk hian mirethei hawi zawnga (pro-poor) thil kalpui uar deuh deuh se a ṭha ngawt ang. Khawpuia retheihna umbo tur hian building leh thil lian tham din thar zel hi a ṭangkai tawk lo thei a, miretheite thleng phaka sorkar a kûn hniam zel a ṭul takzet a ni" tih a ni. 

Kan khawpui ber en­kawl­tu AMC hian term hnih ro a rel chhungin khawpuia retheihna umbo zawngin hna a thawk em? Contract te tham a tam thei ang ber mahni party worker tan an sem rual mai mai zawk a ni lo maw? AMC pawisa zawng zawng zinga eng zat percentage nge mirethei kutah lut ang le? Construction work kalpui vak vak hi Aizawla retheite khai chhuahna atan a ṭangkai em? Khawpuia retheihna khai chhuaktu tura din a hmingah pawh Urban Development and Poverty Alleviation Department (UD&PA) tih ngat hian PWD hna ang mai thawkin construction leh contract hna ringawt a atchilh an ti hi a dik em? 

Retheite khai chhuahna lam aiin party worker con­tract hna hmuh theih dan zawngin an kalpui char char tih hi a dik em? Khawpuia miretheite hi i lainat ang u khai. Hmarcha kung khat phunna tur mahnia ram nei lo hi Aizawl mipui 80% zet hi an ni asin. 

- K Lalhmangaiha