2021 ZORAM POLITICS THLIRNA (Ruling kan thlir lo thei lo...)

Kan nui hma zawk a, MNF kum 10 Term hmasa zawk kha chu an thawk ṭha thlawt. Term 2 na aṭang erawh chuan kan nui ta ham ham ringawt mai a nih kha.

Tunah Term khat chu sawi loh, Term chanve hma in kan nui lum hul hul a, nuih pawh za tawh lo thlengin kan awm. A chhan chu hri leng vanga ṭan hmun phet hle tih kan hriat karah awih awm loh lutuk thusawi kan hriat fo vang a ni. A tak tak aia a pehhel dawt thu ni awm tak kan dawn ṭhin vang a ni. Dik tak chuan mipui ai hian a zem zen pha chin hi nui duh se an nui hawk uar uar ngeiin ka ring. 

2021 ah hi chuan ṭawng­kam thiamna ringawt leh tehkhin thu hian min hmin zo tawh lo mai thei a, mipui nuihnaa Minister meuhin a thlavang a hauhsakna hi mipui thinrimna a chang chho a nih chuan ngai awh leh tur pawhin an beih rei a ngai fu tawh ang. A la ri par par mai si! 

NLUP dawng tawh thleng­in "Nuai 3 aia tlem lo in dawng dawn" a tih pâng pâng kha a tak ram kan beisei sang sawt dawn a, kawng chhawng 'kawh kual' ringawt lo kan beisei dawn. Traffic Jam Free kha kan bengkhawn a, khelmual chhawng kha chu sawi lo ila, Mizo buh chaw a rin pawh sawi lo ila kan ti zel tawh mai a niang chu! 

Heng beiseina hian tute emaw Politics hmakhua chu a pawt tawi ve dawn chiang a, GS pakhatin min hrilh chu "Mimi hrillawkna hi a thleng dik lovang tih a sawi theih loh" tih hi a ni. Inrintawkna hi tlakchham hret hret theih a ni kan hmalakna leh ṭawngkam thlir chian hian. 

Mau hisap mawlh mai hi a ni. IAS bansanna tur khawp, North East a hel nuaibona tur tia kan sawi tlawr hi Term chanve thleng hi chuan engruai kan la nihpui lo kan ti ngam a, "In chibai Term" ang mai khan a zuzi leh lo turah ngai ang. 

Ramri chinfel dan thuruk kha Home Minister meuh pawhin a la hre lo mai ni lovin a zawh pawh a la zawt lovah ngai ila. Thisen chhuak hiala kan beihna, ṭam huama kan tawrhna kha kawngpui tlang vangin 'ramri' a fel chuang si lo a, hmalakna hriat tur lah awm hek suh! Nakin lawkah inthlahdahte zar zovin kan in ep leh ang. 

AMC kan inthlang dawn a, tah chuan Sorkar mek hlimthla a lang chiang ber dawn. Invaivung sa teh mahse AMC-ah hian seat an la mang lova, an Sorkar zo lo a nih chuan reilote-ah Minister feh, huan kal mai mai hmabak an awm nual  dawn tih a chiang ang. Chuti ni lova Ruling hian Seat an la tam a, an Sorkar a nih chuan MNF hi inthlan lehah pawh rintlak ber, Party dang khin rual loh an ni ngei ang. VC/LC inthlan hi chu mimal ṭhatnaah thui tak a in nghata Ruling boruak hre rana Vote kan thlak hlawm avangin 2023 inthlan thlir nan a tlak loh. AMC hian a rawn ti chiang ber dawn. 

Serchhip Bial inthlan ṭhat tur hian kawngro a su pha dawn a, MLA bân tak hi a tling leh ngat a nih chuan tute emaw chuan lu thak lo pui an hiat dawn a, tu Party emaw chu a pâwr thar sawt bawk ang. Ruling an tling a nih erawh chuan hmabak beiseina an nei sang sawt ngei ang le. 

Kumin chhung hi chuan lut chhuak lian tham kan la hre lo mai thei. Kum tawp lam aṭang chuan bial fang thatchhe deuh pawh Thingtlang Politics an man miau avangin an Office-ah 'tour' tih hmuh tur an tam leh ṭan ang a, mahni bialah hri leng chhuanlamin an tih chin ang ang sawi tlawr thiam tak turin an feh chhuak sung sung tawh ang. 

Worker lungawilo leh vui bui bui mek te thawi lungawi a hun ṭan dawn a, a tak ram thleng lo thutiam vanga lungawi leh mai mai ṭhinte hian ram hnuk an khawih pha tih hre tawh se, Term chanve chuang thle ngulh thinte hi thlek ngulh san ve ngam hlawm tak maw? 

Congress boruak a dai a, hruaitu thar hmel kan hmu har. Hotu thar an nei dawn a nih chuan insiamremna hun nen a hun viau tawh. Hruaitu ngai atang chuan beisei a bo. ZPM hi chu Serchhip Bial leh AMC ah thui tak a in nghat. MPC hi chuan 'thawhpui' tur chiah an mamawh.

Heng hi thlir ila, Term chanve ah hian 'thutiam' eng anga tih­hlawh tlin nge a nih thlirin i ngaih­ven zui zel ang u. 

- David Sailo