Dan ang zela rorelna kalpui hi a lo ṭha ber zel
Isua Krista khawngaihna chanchin ṭha eng aṭanga thlir loh chuan mihring rilru chuan thil sual tite hi hremna pek ve nghal hmiah hmiah kan duh ṭhin. Hetiang rilru hi Thuthlung Hlui rilru a ni a, Thuthlung Thar khawngaihna thuthlungin min zirtir, Pathian ram nun zia nen chuan inpersan tak a niin a lang. Thuthlung Thar khawngaihna chanchin ṭhain min zirtir, Pathian ram hi chu lal ram linglet, thlarau thianghlim ṭanpuina aṭang lo chuan hriatthiam harsa tak a ni.
Lal Isua’n hmeichhe pakhat uire den hlum nghal tura lehkha ziaktute leh Pharisai hote’n a hnena an rawn hruai chungchanga a kam chhuak kha i hre reng ang u khai! Engtin nge Isua’n a sawi kha, uire nu den hlum tuma lung lek uaih tawhtute hnenah khan, "In zinga sual nei lo apiangin amah chu deng hmasa rawh se," a ti a nih kha (Johana 8:7).
Hemi ṭuma Isua thusawi hi a rilin a ropui tak zet a ni. Den hlum tumtute kha an inngaihtuah let a, sual nei lo tu mah an lo awm bik si lo va; uire ve kher lo mah se, thil dangah sual nei vek an ni tho si a, mahni inthiam lohna neiin pakhat tê têin an ṭîn darhsan ta a nih kha maw le.
Kristianna dik chuan thil sual titu, misual huat dan chin tâwk a hria a, ‘sual’ a haw zawk ṭhin (hate the sin, not the sinner). Kan India ram dan hrang hrangte leh dan rorelna kalphung, criminal & civil justice administration system bulpuite hi a ṭhain a changkang tâwk hle a ni. Hun rei tak India ram lo awp tawhtu British sorkar chhûlchhuak a nih bakah, Bible tlawhchhana duan leh siamte an ni tiin sawi ila kan sawi sual lovin ka ring.
Sorkarin kan zavai atana ṭhat tlanna atan leh him tlanna atan mumal taka dan hrang hrang a duan leh siamte ang hian hma la ṭhin ila, dan ang takin rorelnate hi kalpui thei zel ṭhin zawk ila; a lo him ber a, a lo ṭha ber a, belhchian a dawl ber zawk zel a ni.
Mahni kutzâla action lo lak ve mai zel hi dan bawhchhiatna dang a nih theih tho avangin pumpelh i tum zel teh ang u khai. Dan rorelna (Rule of Laws) lalna hmun apiang hi ram nuam a ni ṭhin; dan ang zela rorelna kalpui hi a lo ṭha ber zel e.
- C. Lalthanmawia, IPS (Rtd)