Group D lak dan
‘Chhung leh khat, mahni mi leh sa leh mi dang tute pawh duhsak bikna lakah ka inthiar fihlim ang’ ti rual dap daptute an sawrkar ta a, a thlamuanthlak hle. Mahse, mahse…
Kalphung thar zuartu, mipui sawrkar inti a lo piang a, ṭhalai za rualin beiseina thar nen group D an dil thar sup sup lai hi ka lo hmu reng. A lawmawm ka lo ti ve em em. Mahse, kalphung tharah hian IV grade lak danah kalphung thar a la thleng chuang lo a, sawipuitu nei lo tan beisei tur a awm chuang lo.
Sawrkar tharah hian minister thlengin group D laknaah leh zel pawh an inrawlh tho tih hi social media-ah thlalak nen a darh nghal a. Mahse, dan an bawhchhe lem lo. “Baffacos kha eiruk tura siam a ni lo a, eiruk theiha siam a ni,” an ti. Chutiang chiah chuan group D hi minister leh MLA leh official ten an duhsak zawng an lak theihna tura ruahman a ni ber.
Pawl 8 pass chin, dilna theh lut leh interview zinga mi hi IV grade atan an duh duh an thlang thei. Thil sual a ni lo, dan bawhchhiatna a ni lo. Mahse, dan bawhchhiat loh hi ṭanchhanah hmang lul suh se. Chuti lo chu, sawrkar hmasa hun lai ang chiahin (a aia nasa mahin) sawipuitu nei lo ṭhalai tam tak an tibeidawng chhunzawm zel ang a, party mi leh sa ni lo ṭhalai rual rilru nâin a siam tho dawn.
Kalphung thar, mipui sawrkar a lo lang a. Hna lak a nih hian ZPM party mi leh sa chu an lawm ngei ang; an induhsak thei tlat a lawm. ZPM ho induhsak ve turin mipui hian ZPM hi an vote lo. Mipui sawrkar a nih tak zet chuan mipui hi lawm ve tawh rawh se. Party mi ni lote hi lungawi ve tawh rawh se.
“Dan bawhchhiat lohte chuan kan induhsak ve ang chu…” an tih hian dan ang thlapin hna an la, sawisel theih kan nei lo a, dan an bawhchhe reng reng lo. Mahse, duhsak bik nei lo tura intiamte hian an intiam anga an awm loh hian dâwt an sawi a, kalphung tharin an kal lo a, mipui an bum tihna a ni thei.
Hna lakna dangah hi chuan he sawrkar hi a che ṭha chho hle. Heti ang thu hi sawrkar kal tawhteah kan sawi peih lo law law, beisei a bo. Chu tih rual chuan, ZPM chuan kalphung thar min tiam a, a intiam ang ngeiin he hna lak dan kalphung hi a siam ṭha phal dawn em? Nge, sawrkar hmasaa mite tih dan kalphung hlui hi a zui ve zel dawn? Kalphung thar duh inti, mi dang aia ṭha tura intiamtu ZPM sawrkar hi ka zawt e.
Kalphung thara an kal ngam bik lo a nih rau rau chuan inthlan leh hunah pawh ‘Duhsak bik kan nei lo ang’ ti loin, ‘A theihnaah chuan sawrkar hmasa ang bawkin kan party mi leh sate chu kan duhsak ve ang’ ti law law tawh se.
- Lalmuanzova Khiangte, Lunglei