Kan ram Krista kan pe

Mizote Kristian kan nih hlim khan, kan pi leh pute chuan, Pathian thu an awih hle a, Pathian thu awihte tih an ni reng a, Kan ram pawh hi Krista hnenah an pe tawp mai a. "Kan ram Krista kan pe, Kan rilru pawh kan hlan, A thu kan ring," tiin. Rinna lamah pawh an ṭhang chakin sual an nek tawm tawk tawk mai a, "Chanchinṭhain kan ramah ramhuai a um bo ta," an ti thei hial a. Kan Bible-in, "He rama mi rinawmte chungah hian ka mit a fu ang, ka hnenah an awm theih nan, Kawng ṭha famkim zawhtu chu, chu mi chuan ka rawng a bawl ang. (Sam 101:6) a tih ang hian an awm a ni. Ni tinin Pathian khawngaihna an hmu mawlh mawlh mai a, "Kan ram Krista tan chauh kan pe, Kan Lal ropuibera tan chuan, Kan bei hram hram zel ang" tiin Krista tan an inpumpek mai a. An tum ber chu thlarau bo chhandam a ni a, chumi titur chuan an neih eng mah an ui hek lo. Khawvel thilah pawh hma an sawn chak em em a, rei loteah ziak leh chhiar thiam tam tak an awm reng a ni.

Nimahsela, kan ramah politic a lo lut a, Politician-te kutah kan ram a tlukluh meuh chuan, kan polician-te hian kan ram Krista hnenah an pe ta si lo a, an mahni duh dan danin kan ramah ro an rel ta a, "Ram chu Lalpa ta a ni a, Hnam tin chunga roreltu a ni.(Sam 22:28) tihte chu ngai pawimawh hek lo, an mahni chhungkua inlaklen nan leh an party-a in ziak lutte hamṭhat nan chauha roreltu emaw an inti a, Hlemhletna chi hrang hrang Kristiante tih atana mawi lo tak tak pawh an ti ta pawp pawp mai a, kan ramah sual a lo ngampain, a lo pung nasa leh ta em em a ni, zu leh ruihhlo avanga buai te, sex avanga buai te, kut tling loa sum neih tumte kan tam ta em em mai a nih hi. Tunah phei chuan Mizote hi Pathian duh dana kan awm loh vang ni ngei tur a ni, kan hnam hi pun beih lam pan thei loin, mipa kan thi zawih zawih ta mai a ni. Hei hi kan ram hruaituten Krista duh zawnga ro an rel loh a, mahni tana hamhai tak ro an rel a, lal an hrawt vang a, Pathian min hremna a ni tih hi i pawm ang u.

Mi ṭhenkhat chuan hausakna te changkannate hi hlimna leh lawmna emaw an ti a, Nimahsela, Kristian Hla bu No 586- na hla phuahtu chuan Sam 144: 15-na "Lalpa Pathiana neih mite chu lawm takin an awm ṭhin." tih thu hian a rilru a hneh em em a, Chuvangin, hlim leh lawmna tak tak chu hausakna te, changkannaahte ni loin Pathian ringtute chauhin an nei thei a ni tih hriain, "Kan ram Krista kan pe, Kan rilru pawh kan hlan, A thu kan ring" a ti a ni. A ni tak a, kan pi leh pute Kristian an nih hlim khan an hausain an changkang lo, Nimahsela, an hlimin an lawm em em tho a ni. Leilung leh a chhunga thil awm zawng zawng hi, Lalpa ta a ni tih hi kan hriat a ṭul tak zet a ni, kan Pathian chuan, "Ramhnuaia sa tinrengte hi ka ta an ni si a, Tlang sangkhat lai chunga ran awmte pawh chu," (Sam 50:10) a ti a ni. Ram leh hnam a ni emaw chhungkua leh mi mal pawh ni se, Pathianin hriat loh pakhat mah a nei lo a ni. Chuvangin, "Lalpa chu ring la, thil ṭha ti rawh, He ramah hian awm la, rinawmna um zel rawh. (Sam37:9) Khawvelah hian a chuhhelh leh a huamhap hap dinchhuahna emaw ti reng reng suh, Heng anga ngaite hian lalna leh thuneihnate an chan pawhin huamhap taka rorel an ching ṭhin a. Chu chu ramin a chhiat phah hle ṭhin a ni.

Tuna kan ram dinhmun han en hian, sualna avangin mi tam tak kan rum vawng vawng a, Zu leh ruihhloa buai kan tam em em a ni, smuggling thila hausak lah kan pawisa hek lo, eirukna kawng chi hrang hrang a hluar hle bawk a, hmeichhiat mipat hman sual avangin HIV/AIDS kai tamna kan ni bawk si a. Hetia kan rama sualna lo pun chhanah hian mi ṭhenkhat chuan Kohhranten an tih tur an tih tawk loh vangah an puh a, mi ṭhenkhatte erawh chuan sawrkar kan dem bawk a, sualna pun chhanah pawh kan inpuh tawn luai luai mai a nih hi. A bul berah chuan kan ram Krista kan pek loh vang a ni, Kan ram hi Krista hnenah pe ila chuan, tuna sual avang kan rumna leh kan natna tam takte hi kan tuar lo ang a, kan tan van lawmna hlu, mita hmuh ngai loh chu, kan hmuh mai dawn a ni. Heng sualna chi hrang hrang Mizote min timualphotu hi kan ram aṭangin kan um bo ngei ang.

Chuvangin, Hawh teh u, Mizo Kristiante hian, Kan ram leh hnam hmangaitu der, dawt hmanga mite bum ṭhin, mahni pumpui chauh hmangaitute hnenah kan ram hi pe tawh loin "Kan ram Krista kan pe, Kan neih zawng zawng kan hlan, Inthurulin, Ni tin pual hlen turin Mi thlarau hruaiin Kan lawm zel ang" tih hla hi a sak mai duh tawk lo hian, "Kan ram Krista tan chauh kan pe, Kan Lal ropuibera tan chauh, Kan bei hram hram zel ang," tiin kan ram hi Krista i pe teh ang u. Chutichuan, ruihhlo avanga kan ṭhalai tam tak, mi a ang maia awm tawhte hi an lo dam leh ang a, Mi sual, sual chhuahsanten, Pathian khawngaihna an hmu thar leh dawn a ni, Mizote hi kan va lawm nasa dawn em.

- Hausanga Hauzel