Chief Minister thusawi lâk kawih thu

Congress ṭhalai MPYCC hotute chuan August ni 21, 2025 khan Aizawl Press Club-ah press conference an nei a, BSF atana Mizo ṭhalai 300 lak tur chungchanga Chief Minister Pu Lalduhoma'n social media-a a tarlan kha an thupui ber a nih hmel a. Pu Lalduhoma chu thu dik lo sawiah an puh a, dâwt sawi a chîn bansan turin an chah a ni ber maiin a lang. MPYCC hian CM thusawi an la kâwi lui nia ka hriat avangin thil nih dan nia ka hriat ka'n sawi ve teh ang.

MPYCC hovin Chief Minister an beihna chungchang media hrang hranga ka lo hmuh veleh CM Pu Lalduhoma social media account-te ka en vat a. BSF sipai atana Mizo ṭhalai 300 lak tur chungchang a ziah dan chu, "Union Home Minister Pu Amit Shah hnena ka dil angin Mizo ṭhalai 300 Border Security Force (BSF) a lakna tur Advertisement chu vawiin khan tihchhuah a ni ta a. Mizo mipa 255 leh hmeichhia 45 lak an ni ang," tih a ni a. A post ni chu August ni 18, 2025 zan dar 6:18 a ni.

BSF sipai lak chungchanga kan CM thusawi hi Congress ṭhalaite chuan 'dâwt a ni' an ti a ni ber mai a, dâwt a nia an hriat dan pawh an sawi. Vanglaini ziah dan chuan, "Kan Chief Minister Pu Lalduhoma'n ama mimal ngen chhuah ang hiala thu a post hi thu dik lo hulhual niin, dâwt chiang tak a sawi," tiin MPYCC Senior Vice President chuan a sawi a ni.

MPYCC hotute'n CM-in dâwt a sawi dan an sawifiah zui dan chuan, kum 2023-ah MHA-in ram pumah BSF constable 3,588 lak phalna a pe a. Mizoram tan pawh BSF 300 lak phalsak a ni a, advertisement a chhuak tawh a. Mizoram rual hian Meghalaya tan pawh BSF sipai 300 lakna tur advertisement a chhuak ve mek tih a ni.

MPYCC-te khan Mizoram tana BSF sipai 300 lak tur chu CM Pu Lalduhoma’n ama mimal dil chhuah angin a sawi a, chu chu dâwt a ni e, an ti a ni ber mai a. Mahse, kei chuan CM Pu Duha hian 'dâwt a sawi lo' tih hi a ṭawngkam hman aṭanga ka ngaihdan a ni thung.

A chhan chu maw, CM Pu Duha hian 'Ka dil chhuah' a ti lo a, 'Ka ngen AVANGIN' pawh a ti lo a, 'Ka ngen ANGIN' a ti a. 'Ka ngen avangin' emaw, 'Ka dil chhuah' emaw ti se chu a sawi dik lo tihna a ni ang, mahse, a ti si lo. Pu Amit Shah-a hnenah a lo zuk sawi ve ngei a, a ngen ve ngei a (a sawi leh sawi loh chu ka hre chuang lo a nia). Chu a ngen ang tak chuan (a ngen VANG ni lovin) a hlawhtling ve miau sia lawm le.

CM Pu Duha'n social media-a a tarlan dan hi dik lo a awm hauh lo, MPYCC-te hian kan CM beihna tur an zawnna lamah lâk kawih tur an zawng mai mai a ang deuh ber zawk e.

- Lalhlanpuia