THE BIBLE SAYS SO!
Kan Lal Isua hi i lal nge a niha chhandamtu? Nge a ni ve ve? Hetah hian i Kristianna tihchian a ni ang! Isaia buah chuan “Rorelna chu a kokiah a chuang ang” a ti (Isaia 9:6). Naupang lo pianga chu i chunga rorel tur a nih chu! Davida lalṭhutthlengah a ṭhu ang a ti bawk (Luka 1:32). Kan Lal Isua lo pian ni khan “In tan Davida khuaah Chhandamtu a piang ta, Lal Krista chu” tih a ni (Luka 2:11). Chutichuan, Lal Isua chu “Pathianin lalah leh chhandamtua awm atan a ding lamah a chawimawi ta” tiin Bible chuan a sawi leh (Tirh 5:31).
Kohhran hun (church age) chhunga sarmon hmasa berah chuan “Isua in khenbeha ngei kha, Pathianin lal leh Krista ni fawmin a siam ta” tiin Apostol hmatawng Petera’n a sawi (Tirh 2:36). Tirhkoh Paula meuh pawhin “Krista Isua chu Lalpa a nih kan hril zawk ṭhin” a lo ti bawk (II Kor 4:5). Thessalonika khua ring lotute pawhin, “A hming Isua, lal dang a awm tiin Kaisara thu kalhin an awm ṭhin a,” tiin Paula leh Sila kha an hêk a nih kha (Tirh 17:7).
Tichuan, Lal Isua hi a pian hma aṭangin, a pian lai meuh pawhin Tirhkoh Paula te thlengin lal a nih thu hi a lo ni, puan leh sawi lansarh ber ni ṭhin chu. Tunlai Bible ring mi (evangelical) mithiam tak Rev. John RW Stott chuan thuhriltu ṭhenkhatte’n Lal Isua lal nihna hrilh tel lova hremhmun laka chhandamtu ang chauha chhandamna thu an sawi thin dik lohzia sawiin, “Isua hi lal a nih vang chauha chhandam thei a nia sin,” tiin a sawi (Issues Facing Christians Today).
Thinlung chhung ril bera lal a nihna hi alawm piantharna chu! Chu chu alawm Pathian lalrama luhna chu. Ringtu tam takte hi chu chhandamna kawngah kan bo ta! Isua hi lal tura puan, lal tura piang, lal tura rawngbawl leh khawvel pumpuia lal tura lo kal leh tur a ni e!
Mihring chhunga a lalna din a lo nih khan piantharna a lo thleng ta, nun danglam a lo thleng ta (Johana 3:3,5: Eph 4:24: II Kor 5:17). Heng mite hi alawm chhandamna changtute chu. Lal Isua lalna hmun hi chhandamna hmun a ni e!
Lal Isuan min chhandam nana a thawhte hi awih mah la i Lal atana i lak luh loh chuan Setana lalna hnuaiah i la awm e! Pathian thunur i chungah a la awm reng a ni Lal Isuan’ a ti a che! (Johana 3:36). Lal Isua hi lal leh chhandamtu a ni. I lal a nih chuan i sual, bulpui kha i paih thla ta, i sim ta tihna a ni! Mahni thua awm tlatna (It’s my life!) kha a tlawm ta. Hla phuahtu pakhatin “Isua tlawm kha an chawimawi a, chhandamna hmunah min lawm a” a tih angin (Hla No.171) Isua tlawm taka lo kala kha lalna han pe la, chu chu chhandamna hmun a ni e!
- F. Lal Thanzuala, 9436141242