Mobile phone leh Holy Bible

Khawvelah hian kan Pathian hmanrua leh Setana hmanrua kan hman pawlh nawk nawk reng dawn a nih hmel a; kan hman hlen tur zawk erawh kan hriat a ṭul hle dawn a ni. Chumi hre tur chuan thinlung thlarauva khat, kan rilru leh kut hmawr thlenga thununtu nei nih a ngai a ni.

Ṭhenkhat chuan Setana hmanrua kha Pathian hmanruaah kan let thei ang a, ṭhenkhat erawh chuan Pathian hmarua kha Setana hmanruaah kan let fo awm e. Chutianga hman tawn velna khawvelah chuan thil pakhat chauh, mobile phone hi a va ṭha tawk lenlawn em aw...

Tunlai thiamna hmangin an han thuam tak tak mai chu, "Mobile phone-a thuziak aiin Holy Bible chhiar tam rawh" tia hrilhtu chu mi â, tunlai lo, nih a va han awl ta em. A awlsam a, a tunlai a, a zângkhai a, zawn a awl a, ah bo a awl a, a hnawk lo a, a ziak a tihlen theih a. He thu hi a dik vek, mahse, ringtu nun chu kawng awlsam a ni lo, a inrem thei lo phawt mai a.

Zing ṭawngṭai inkhawmah te, birthday lawmnaah te, mitthi vui nikhuaah te, etc. Bible aiah mobile phone chu kan han lek chhuak ta zawk a. "Eng nge a danglamna, a chhunga awm chu Pathian thu vek alawm," Hei pawh hi a dik vek mai. Hei hi pawmin, dika ngaiin, lo hmang zui zel dawn ta ila, a hnuaia kan sawi hi a ngai tawh lo vang a, Holy Bible kan ngai tawh lo vang.

Heti hian aw… Holy Bible hmun thuma ṭhen hmun khat chauh tiat mobile phone hi kan hmang zawk dawn a nih chuan, emaw, Bible Society atana kan thawh khawm/ chhun luh hi Bible chhut a ngaih tawh dawn loh chuan, mobile phone company lamah chhung lut ta thung ila. Mobile phone handset siam belh ṭeuh ta zawk se la. Bible Society ti lovin, Mobile Phone Society ti ta zawk ila. Kan pulpit tlangah mobile phone chhawp ta mai ila. Eng nge kan ang le?

I mobile phone-ah khan Pathian thu chauh a awm ve em? Awm lo, Setana hmanraw chi hrang hrangin a hual vel, thu lawilo tak tak, milem thianghlim lo leh ennawm ṭha lo te hial, politics ṭawngkam bawlhlawh leh Pathian rawngbawlna atana ṭangkai lo rem khawm zingah, kan Lalpa thu chu a awm ve a. "Leilung pian hmain thu chu a awm. Pa Pathian nen chatuanin a inzawm." He hla siamtu thinlungin a sawi, thu hi, kan Holy Bible nen hian a inzawm a ni.

Holy Bible-ah chuan eng nge awm ve? Khawvel lam thu dang reng rengin a pawlh ve loh, Pathian thu nung hlang awmna lehkhabu a ni. Engin nge a ai awh zo ang le?

"Bible Bible aw Bible ka ngaina che. Ka Lalpa chanchin ziahna i ni si a. A chhunga thil awmte chu, chatuan nun kawng min hrilhtu a ni si."

Thil awlsam hi ringtute harsatna thlentu a ni thei L alpa hmanrua chu Lalpa tan i hmang u. Lalpa'n malsawm rawh se.

- Lalrinhluna Ralte, Ratu