Forest (Conservation) Amendment Act 2023: Mob rule leh social media a inang riau!

Mob rule kan tih mai, haw hâwa mipui chêtna leh lungawi loh lantirna a thlen tawh chuan a pàwr pàwr, a ṭawng ring ringte thu hian thil a kal duh khawp a, mipuiin an zui dual tawh mai ṭhin! Khawtlang hruaitute'n zaizâp taka chêt duha hma an lak viau pawhin awmzia a nei thei tawh lo fo a, an thunun thei tawh lo ṭhin a ni. Social media hian mob rule anna riau a nei! Social media-ah hian a ṭawng tam tamte thu leh hla hi miin an hmu tam a; hmuh tam na nâ nâ chuan, hmin chin pawh a nei lo thei lo. Mahse, social media-a ṭawng tam apiangte ngaihdan leh an thu hi a dik zel tihna erawh a ni lo. FCAA 2023

Tunlaiin Forest (Conservation) Amendment Act 2023 (FCAA 2023) a lâr hle mai a, a chhan ber chu August 27, 2025-a Assembly Session-ah Mizorama FCAA 2023 hman vena tur Resolution pawm a nih vang a ni. FCAA 2023 leh Mizoram Assembly Resolution ṭha tih lohna thu social media lamah a tam a, mi ṭhenkhat chuan 'Mizoram hralhna' ang hialte'n an sawi. Social media-a FCAA 2023 duh lohna thu sawi a tam avangin chu’ng thute chuan mi tam tak, thil nihna tak hre chiang lo leh ngaihtuah chiang vak lote rilru hmin chin pawh a nei âwm e.

Hetih lai hian, Mizo ukil lâr leh senior pakhat chuan Facebook-ah hetiang hian a ziak a: "India Danpui (Constitution) kalh apiang chu dan thi (Ultra Vires) a ni. The Forest (Conservation) Amendment Act, 2023 hian Article 371G a kalh a nih chuan Ultra Vires (dan thi) a ni a, Article 371G a kalhna apiangah kha dan kha a thi a ni zawk e. FCAA 2023-in Article 371G a kalhna apiangah Article 371G kha a ding chang ang," tiin. Gurkha tana OBC pek insawiṭhaih chiam te, zu zawrh insawiṭhaih te, BJP insawiṭhaih chiamte chu Mizote 'Phungpui Nu' vena riau ṭhin a nih thu a ziak bawk. Ukil pakhatin a sawi ang hian, India rama dan (act & rules) zawng zawng ai hian India Danpui (Constitution) a lal zawk tih hi kan hriat reng a ṭha. Danpui kalhin dan tê siam theih a ni lo a; Danpui leh dan tê-ah inkalh a lo awm palh a nih chuan, Danpui a lal zawk.

Mithiamte sawi danin, India ram dante hi peace accord hnu lama mite chu Mizoram sawrkarin Mizorama hman tura a lak luh (a pawm) ve phawt loh chuan hman mai theih a ni lo a, Article 371G hmangin lo dan theih a ni a; peace accord hma lama mite erawh chu 371G hmangin lo dan theih a ni lo, an ti.

Mi ṭhenkhat chuan FCAA 2023 principal act Forest Conservation Act 1980 pawh peace accord hma lama mi a nih avangin FCAA 2023 pawh Mizoramin a pawm (adopt) tawh chuan Article 371G hmanga dan theih a ni tawh lo turah an ngai niin a lang. Hei hi Chief Minister pawhin Assembly House-a a sawi kha a ni a, FCAA 2023 hi a principal act (FCA 1980) peace accord hmaa mi a nih avangin 371G hmanga dan theih a nih leh nih loh inhnial theih tak a nih thu a sawi a nih kha.

Forest Conservation Act aiin India Danpui a lal zawk a, FCAA 2023 aiin India Danpuia Article 371G a chungnung zawk. Dan lam thiam ṭhenkhatte ngaihdan chuan, FCAA 2023 hi Mizorama hman turin kan State Assembly-in a pawm (adopt) avangin Article 371G hi hman theih a ni tawh lo tihna a ni lo. Kan ram (Mizoram) leh hnam tana thil pawi tur emaw, harsatna thlen turah chuan Article 371G hi hman theih reng tho a ni. Chutih rualin, dan lam thiamte zingah vek hetiang ngaihdan pawm lo hi an awm thei bawk âwm e.

Mizo ukil zinga thleng sang leh thiam berte zinga mi pakhat chuan, FCAA 2025 hi a principal act–FCA 1980 hi peace accord hmaa mi pawh ni se, Article 371G hmanga dan theih a ni tura a ngaih thu a sawi.

Heng thilte hi dan lam kaihnnawih a ni a, hriatthiam vek a har; kei pawhin ka hrethiam vek bik lo a, he thuziak pawh hi mi dang tan hriatthiam a har ang. Dan lam thiamte ka biak ve aṭanga ka hmuh dan chuan, FCAA 2023 principal act FCA 1980 hi peace accord leh Mizoram state nih hnua mi a nih avangin, Article 371G hmangin kan lo dang thei lo ni ta se, kan state Assembly-in a lo hnâwl emaw, a lo pawm emawin awmzia a nei lo tihna a ni ang.

A lehlam zawngin, Article 371G-in awmzia a nei a nih chuan, FCAA 2023 adopt a nih avanga han hlauh chiam tur a awm lo tihna a ni; a ṭha lo lai emaw, Mizoram tana him lo tura hmalakna emawte a awm a nih chuan Article 371G hmanga dan theih a nih dawn avangin.

Engpawhnise, kan State Assembly-in resolution hmanga FCAA 2023 lak luh (adopt) tâkah hian, Mizoram leh hnam tana a hlauhawm leh hlauhawm chungchangah ngaihdan a inang lo tih a chiang a, a la inang lo zui zel pawhin a rinawm. Mi ṭhenkhatin Mizoram tana ṭha lo leh hlauhawm turah an ngaih karah hian, a ṭhatna lai tam tak a awm ve bawk a; chuvang chuan kan State Assembly pawhin an la lut ta a ni rêng a.

Social media vela duhthawh lutuk avanga ṭawngkam uchuak leh mawi lo lam hawi hman mai maite hi a ṭha lem lo a; Mizoram hralh ta ang hiala han insawi chiamte phei hi chu a uchuak viau mai. Kei chuan, FCAA 2023 adopt avang hian kan ram hruaitute hian kan ram – Mizoram hi an hralhah ka ngai ve lo a, hralh pawh an hralh hek lo. FCAA 2023 hi Mizoramah hman ni mah se, Mizoram hi kan ram, Mizote ram a ni zel ang.

Ram venhimna lam

Mizoram Mizote zingah ruihhlo leh sualna dang dang vangin Myanmar lama kan unaute ngaitheilo an tam sawt viau a, ramri hung duhna thâwm pawh a ring sâwt hle. Ramri hung kan duh hian India mi kan ni tih nghet takin kan pawm tihna a ni.

Mizoram hi India ram a nih miau avang leh, ramri depa awm kan nih tlat avangin India hian ramri venhimna leh hmasawnna lamah pawh Mizoramah hian thil pawimawhte a rawn bun ve tur a ni a; chu chu kan hriatthiam a ngai. Mizoram a râlmuan avang leh Myanmar leh Bangladesh te hi India tan an hlauhawm lutuk loh avangin Mizoramah hian defence installation a awm vak lo mai mai zawk a. Engtikah emaw chuan international border-a awm Mizoramah hian Army hmun lian tham deuh emaw, Air Force hmun lian zawk emawte pawh an la rawn din duh ang; rawn din an tum a nih pawhin lo dodal chiam tur kan ni lêm lo, rawn din hi a âwm em em zawk a ni. India ram tan chauh ni loin, Mizoram bik himna atan pawh a pawimawh bawk.

Chief Minister ngaihdan sawhsawn

FCAA 2023 chungchanga Chief Minister-in a ngaihdan a thlak chungchang hi mi ṭhenkhatin an sawi duh viau a, political party mite’n an sawi nasa lehzual. CM Pu Lalduhoma’n a ngaihdan a thlak chhan chu chiang takin Assembly House-ah a sawi tawh a, sawi zui ka tum lo. Ka sawi duh zawk chu, mihring hian ngaihdan kan sawhsawn ṭhin tih hi a ni. Ngaihdan kan sawhsawn ṭhin a, mi ngaihdan sawhsawn tumin kan bei bawk ṭhin. Thil ṭha zawk turah chuan kan ngaihdan te, kan duh dante kan thlak ngam tur a ni a, mi dang ngaihdan ṭhate kan pawm ṭhin tur a ni. Ngaihdan thlak tum lo leh duh lo nih hi a ṭha lo a, a hlauhawm deuh roh bawk; mi dang tan an hnawksak duh viau nia!

A tawp nan – social media

A tir lama kan sawi angin, mob rule leh social media hian inanna tak an nei. Social media-ah hian thâwm nei ring tak tak an awm a, thil engkimah inrawlh an tum ta emaw tih mai tura thil eng emaw a awm apianga sawi ve thlazente pawh an awm. Mob rule-a a pàwr pàwr, a luruh ring ringte duh dana thil a kal leh ṭhin angin, social media-ah pawh a sawi tam tam, a au ring ringte ngaihdan hi mipuiin an zui dual fo. Mob rule-ah chuan khawtlang hruaitu lungfing zawkte’n mipui an thunun zo tawh lo ṭhin a; social media-ah pawh mi pangngai leh fing zawkte’n thil an sawi ve pawp pawp tawh si lo a, an ngaihdan ṭha tak takte miin an hre thei lo ṭhin a ni.

Social media-a au ring tak takte zingah ṭawngkam duhtui lo tak tak an awm nawk ṭhin. Ram veina vang te, ram leh hnam tana ṭha tur an duh vangte a ni ang a, ṭhahnemngaihna vangte ni mah se, thil an sawi tam si a, kawng dik loah mipui an hruai a hlauhawm ṭhin. Social media-a au peih tak takte thu leh hla hi a dik vek lo a, a ṭha ber vek kher lo tih mipuiin kan hriat a ṭha a; lo pawm duak duak loa thil kan chîk ve a ngai a ni.

- K Zothanpara