Zirtirtu ropui Pu H Lalkhuma (L) nghilh loh nan

Sailo lal Saiṭhuama khua Hnahlan hian hmingthanna hrang hrang a nei ve a, Mizoram khawvelah hian a lo te ber bik tawp lo mai a. International boundary-a awm a nih vang te, grep chinna leh winery awmna hmasa a lo nihnate hian hriat a tihlawh lehzual awm e.

Aw le, tun ṭumah chuan a khaw chanchin kan luhchilh hman lo ang a, a khua leh tuite zinga mi ropui, Hnahlan Primary Sikul-I headteacher aṭanga chawl ta leh tahrik ni 13.10.2021-a hun lo taka he khawlvel aṭanga chatuan chawlhna ram min pansan tawhtu Pu H. Lalkhuma chanchin tam tak zinga tlemte ka han pho lang ve dawn ang e.

Khatih hun lai khan (ti ve khanglang ila) primary sikulah khan ‘A’ pawl aṭanga pawl 3 a awm a, pawl 3 kha Mizoram School Education hnuaia board exam a ni ṭhin.

‘A’ pawl aṭanga pawl 3 zirlai zawng zawngte hi hmun khatah min koh khawm chang a tam ṭhin khawp mai. Kan han ṭhutkhawm ṭhep ṭhawp laiin kan headteacher Pu Lalkhuma a rawn lut a, “Pawl khat ding rawh, ‘A’ pawl bâng rawh,” a rawn tih chuan kan phu nghal suau suau mai a. Thu a sawi lo ang tih mawlh hi kan hlau tlang ṭhinin ka hria.

Zirtawp chawhma ban dawna kan luh khawm chang phei chuan chawhnuah ‘Game’ min puansak hi kan ring ru deuh fur mai ṭhin a. Rinna leh beiseina nung nei chunga kan lo ngah fan fan lai chuan ‘Chawhnuah in game’ a ti chiah mai chu, ring tak leh uar tak main, “Heeeiiii’ kan lo ti a. Kan thawm a reh ta maw tih rual hian a han sawi chhunzawm ta a, ‘… lo vang’ a han ti leh mai chu thehmeh ai pawhin a reh zawk awm asin. Nimahsela, kan rin leh beisei ang thu hmu lo mah ila, lunglohah kan la ngai lo, kan hlim em em tho mai!

Sikul dar vaw tura naupang a han tir te hi vuak a chakawm ṭhin asin. “Mawia, lo kal teh, Thanga, dar vaw rawh.” Pawl pumpui hi mi pakhat ang hian a be thiam a, “B pawlin dar vaw rawh’ te a han tih chuan ‘B’ pawl naupang ho kha dar vuak inchuha tlan chhuah suau a ni mai.

Sikul compound tihfai leh hna han thawh changa zelthel deuh a hmuhte hian a hau ve mai mai lo. An bul hnaiah a va kal a, “E, in ṭhiante’n an thawh zawh san ang che tih a va hlauhawm ve, thawh tur i nei ve lo ang tih hi ka hlau lutuk,” a va ti ṭhin a, thawh ṭhat loh theih a ni tawh ngai lo.

Kum tawp result puan a hun a, pawl sawn tur ho kha chu, “Anni ho hi kan ngai tawh lo a, pawl dangah kan sawn daih dawn,” a han ti a. Pawl sawn ve lo tur ho hnenah, “Nangni chu kan la ngai em mai che u a, la awm turin kan duh che u a, kan la awmtir dawn che u a ni,” a ti leh daih mai a; tu mah lungngai hmel pu an awm ngai lo.

Pawl 3 kan zirlai khan ‘Thuvawn Bu’ kha subject pakhat a ni a. Kan lehkhabu kha min khuptir vek a, amah chauhin a bu a keu a, a sawi zawhah kan sawi rual dual dual mai ṭhin a, a va nuam ṭhin tak em. Ṭum khat chu chutia a sawi zawha kan sawi rual dual dual lai chuan hmeichhe ṭhenkhat khan hrik an lo inensak alawm le. Ani chuan engtin danga ti ta lo chuan kan sawi turah a rawn telh hmiah mai a, “A tujite chu ri hum humin phul bulh bulh mah se la, a fawn nasat avangin tlangte hi nghing dur dur mah se la…” kan tih dual dual zawhah, “Hrikte an inensak a,” a han ti a; keini’n ring tawkin, “Hrikte an inensak a,” kan han ti ve nghal a, hmeichhe ho khan an sim chiang teh asin! Sikul naupang pakhat insual huai ve deuh mai kha ani chuan sual a ti ve miah lo, ‘A rum a ni,’ a ti mai a, a sual zui thei vak miah lo.

Pawl 3 board kan han exam chu leh, lehkhapuan rul rin lohah ngei mai kan han ziak ve ta a, mahni lehkhapuan pangngai rul rin pawha ziak ngil hlei thei lo kha chuan ka ziak kawi em em ringawt mai a. Ka answer paper a rawn en vang vang a, “Hrangchhuana te pawh an ziak ngil nalh tawh khawp mai,” a rawn ti a, a kal leh mai a. Kha thu ka hriat khan ka lawm em em mai a, ṭhahnemngai takin exam chhung zawng khan ka theihtawp ka chhuah ve sauh sauh mai a, result ṭha tak ka nei ve ta nghe nghe a ni. Ka va han lawm tak em.

Primary ka kal lai khan min awmtute nena sikul kal tlang kha kan nih avangin ka naupang fâl deuh viau mai a, infiamnaahte hian ka tel pha ve ngai lo. Ṭum khat chu Tualcheng P/S football team indaih loh vangin an goal veng atan min hnawh lut alawm le. Ka ban phak loh avanga an rawn pet goal chung khan pencil kan hûm haw ve ta tho. Khami ṭuma ka lawmzia kha aw, tun thleng hian ka la lawm a, ka thinlung chhungril hi a la hlim veng veng mai. Professional footballer ni lo mah ila, football-a prize Money tih tham ve tak leh medal ka dawn vete hi kha pencil ai khan an hlu thei tawh lo a ni.

High sikul kan luh hnu khan primary zonal sports kan va thlir ve a. Vapar P/S naupangah khan hmeichhe lian tawh tak, nula deuh uaih tawh hi a tel ve a. Pu Lalkhuma chuan fiamthu a han rawlh leh ta zauh mai a, “Primary sikul naupang tawh phawt chu, mikhual tiat tiat pawh a tel theih vek,” a han ti mai chuh, boruak hi a zângkhai vah mai a ni.

Zirna hi kawng engkima hmasawnna tih ṭawngkamin a hranpa taka min hrilh ka hre hran lo, mahse, amahah khan hawrawppuiin chhiar theihin a inziak kulh mai si a ni. Pu H. Lalkhuma ang zirtirtu hi Mizoram khawvelah hian an lo awm ve ang em le.

- Hrangchhuana Sailo

Mob. No. 9436352280

Email: hsailo_pg@yahoo.com