New Aizawl kan mamawh tak tak ta!

Kan state khawpui ber Aizawl hi kan tawt lutuk ta, tih ngaihna a awm ta lo. Kawngpui lah hi a tihtlak awmchhun chu chhim leh hmar zawngin, zau lo tak hian pakhat chauh a kal ngawk a. A sirah foot path, kea kalna tur zimtein, in kal pelh theih ṭawk ṭawk a ni. Hei pawh hi a khaw tleng hian a zir loh vang a ni ang, kawng sir tawn tawnah a awm thei lova. Lirthei nena in tihpalh pawh awm ta se ‘mahni side lam’ tia sawi hleih theih lohna tur a tam hle. Kawngpui kanna tur (fly-over) lah chu te takte, kual kawi deuha siam a ngai a. Kawngpui zau ngil ṭha takah nalh tak leh ropui taka siamtu atan an itawm hle mai.

Kan Aizawl khawpui hi a tir aṭangin khawpui atana ruahman leh duan a awm lo niin a lang. Tunah chuan a rem laiah kan in ek-beng a, sawrkar lu pawh a hai a ni ang, an duh lo chung chung taxi-te pawh an intlan chhawk tir ta hial a. Heti chung pawh hian city bus leh taxi te hlawk lohna tham ngawtin traffic a jam deuh reng tho a. Kan mi hausa tam takte lah chuan in an sakin kawng an rawn nek emaw tih mai tur a ni a, an ram chin pawh nimahsela tlem han ip deuh hlawm sela chu kan kawng tawt zualpui hi chu a ziaawm deuh tur.

Tunah chuan kan khawpui hian min zo ta la. Khawpui han zauh leh zelna tur hmun rem a awm si lo. Fura lo thlenin ‘lei min’ leh ‘lei minin in a hnawl a, mi chuti zatin nunna an chan’ tih kan hre kumtin mai. In her danglam deuh chu kan ngai a ni. Pu Rokunga’n “A mawi mah ti ila, lunglai a dam lo” a lo ti tawh a. Kan Aizawl khawpui hi chei ṭhat han tum teh mah ila, a ṭha thei tak tak tawh lo. Sum sen tamin awmzia a nei tlem tawh khawp ang - New Aizawl kan mamawh a ni.

Pu Rokunga bawkin “Mahse aw, zawl hmun ṭha chu zawng ila, thinlai hnemtu tal ka tawng mahna” a tih lai hi ni awm takin New Aizawl atana hmun ṭha ber leh rem ber nia lang, Thenzawl hi Mizoram tan hmun laili a ni. A ram a zawl
ṭha a, Serchhip lamah khawpui dinna khawp turin ram rem tak mai thui takin a in pharh chho duai a. Aizawl lam aṭanga kalin Thenzawl khaw thlen hmain Ram Park zau ṭha pui a awm bawk. Thenzawl khaw chhim lam Lunglei kawng lam lah chutiang bawkin tuna Thenzawl khua tak pawh hi ‘veng sir’ dinhmuna ding daih thei khawpin a chhehvelah khawpui dinna atana rem a la zau a. Kawng atana remchang lai tur a buh thar pawh hi it lovin sawrkarin lei sak sela. Feet 100 in kawngpui kal tlang ruah mai sela, kawngpui bak chu inhmunah ṭhet se, sum tam tak a lut leh dawn tho a. Kawng chu a zau thei ang berin kal tir thluah thlauh sela, a hual veltu lah chu mual hniam te te, department hmun atana itawm tak tak an ni hlawm bawk. Tin, tui a ṭha bawk a, lui lian deuh a hla lo bawk a. Aizawl aṭang in a hla lova, Aizawl nen a inkar kawng hi phei vek a ni. Kawngpui lian takin laih tlang ruah nisela, Thenzawl aṭang hian Falkawn damdawiin lian a hla lo bawk a. Thlawhna ṭumhmun tur pawh van boruak a inhawng zau ṭha hle bawk. Chhum zin ve ngai lohna Lungrang tlang leh Zote tlangahte Thlawhna
ṭum hmun lian tak a awm thei ang. Upaho intihhlimna turin hmun zau ṭha leh thengthaw a siam thluah thluah theih bawk. Assam Rifles sawn chhuah hi chu i sawi tawh lo mai ang, mipui pawhin an ning zozai tawh ang. Hengte avang hian Thenzawl hi New Aizawl atan chuan a ṭha berin a lang.

Khua a tlai hma hian sawr-karin khawpui atan mithiamte fel takin ruahman tir se, nakin-ah chuan a buaithlak tawh ang. Electric hrui hi lei hnuaiah kal tir vek se, Sports Complex pawh lian takin ruahman se, chunglam aṭanga han thlir pawhin khawpui mawi leh nalh lutuk kan nei thei ang.

Hetianga New Aizawl dintu tur atan chuan ṭawngkam mai ni loa ram leh hnam hmangaih tak taktu thlang ila. Chuti a nih loh chuan sum tam em em seng si hian phuailuai tak, rintlak tak tak ni si lo, mipuite hnena in sawi mam chawp tumtute emaw, mi ṭhenkhatte hausakna lekah a chhuak mai ang tih a hlauhawm a, ram tan vanduaina lian takah a chang mai ang tih a hlauhawm. Tin, New Aizawl siamna sum hi Central Sawrkar aṭanga budget lo kal chauh hmang lovin, a tam zawk hi chu kan ram sawrkarin a lak luh leh a thar chhuah ngei ni thei sela. Kum 4 aṭanga kum 5 lekah tluk leh ding awn sawm chuang thar chhuak thei ngei turten buatsaih sela a ṭha hle ang.

- Lalchawiliana,

Chhinga Veng