Purunsen bakah dailuah leh alu pawh
Sorkarin New Economic Development Policy hnuaiah purun sen chin nan leh a enkawl nan Rs nuai 160, Agriculture Dept.-ah a dah thu a puang a. He thil hi kum tam tak ka lo vei ve tawh leh chanchinbu-ah te pawh ka lo ziak ve tawh ṭhin a ni. Chuvangin, a enga khawlawi lo hian ka lo lawm ve em em mai a ni. Hetianga kan sorkarin thil ṭha, hote anga lang, nimahsela pawimawh em em si ngaihtuah chhuah nachang a hriat rau rau chuan dailuah (dal) leh alu chin nan sum han sik chhuak leh law law sela ka va ti em!
Heng thil pathumte hi chhung tinin kan duh leh kan mamawh, nitina kan ei te an ni. Kan ramah an chin theihin an thar theih vek a rinawm. State pawn aṭangin kan lalut reng a, a mak ngawt mai. Kan naupan lai chuan Theiriat leh Sairep tlangah te alu an ching a, Lunglei khawpui chu an chawm thei. Tun hnu hian engtizia emawni an ching ta hauh lo a, hman aiin hlawk deuh deuh tur a nih a rinawm tehlul nen. Bazarah "hei Shillong alu" an lo ti a, ngaih ṭha deuhin kan lei mai a, a tlawm thlak ṭhin khawp mai! A dahṭhat dan te chu Agricultural Scientist heti zozai kan neihte hian min zirtir thei ang chu.
Kan sorkar hian hetiang thil te tham anga langah hian min intodelh tir hmasa phawt sela, chumi hnuah hralh chhuah tur thil min tih tir sela a ṭha ang. Intodelh si lo, hralh tur thar chhuak bawk si lovin kan vai hma a, kan hlawhchham
ṭhin a nih hi. Kuthnathawktute pawhin chutiang rilru pu chuan hma la sela; a enga mah hmain a hralh theih ang em? a hlawk ang em? kan ti phawt ṭhin a, a fuh lo a ni. Heng purun sen leh dailuah leh alu te hi chu kan tual chhungah hian hralhna a harsa dawn lo tih hriat sa reng a ni. Kan intodelh hmasa phawt ang a, a dawtah kan la neih chuan kan hralh ang.
Tun hmain kan sorkar hian heng kan nitin mamawha min intodelh tir hmasa lovin thil dang daih min sawi hmuh a; Entirnan - Tung te, fu te, aieng te, sawhthing te, kang damdawi te, pangbal leh adt. kan ching tam thei lova, kan nitin mamawhah kan buai tho bawk si. Kan thar chhun lah kan hralh ṭha thei bawk si lova, kan la hlawhchham zel a nih hi! Tun hnaiah grep, red oil palm, sapthei te an han sawi thar leh a, eng tak ang zel ang i maw.
Agriculture Dept.-te hian theihtawp takmeuh chhuah sela tih hi ka ngen duh a ni. Tunah kum 80 ral ka kai ve tawh. Kan naupan lai
aṭangin Agriculture Department hi an sawi an sawi tawh a, a thawktu demonstrator-te pawh thingtlangah kan hmu fo. An department hmalakna rah Zoram pumin kan chhawr leh hriat reng tur hi ka hmu tam mang lo tlat (ka en thiam loh leh ka hriat tlem vang a nih chuan min ngaidam sela). Demonstration farm an siam
ṭhin te kha entawntlak a awm mang lovin ka hria. Tuna Rs nuai 160 hmanga purun sen an chin tir tur hi chuan rah
ṭha chhuah tir mawlh teh se.
Tichuan, purun-sen chauh ni lovin dailuah leh alu min chin tir law law rawh se, tih hi ka rawtin ka ngen e.
- C.Lalsangliana