BEIHRUAL… BEIRUAL

September thla kan lo thleng leh ta a, kohhran pawlte’n mahni kohhranah ṭheuh kan beirual leh mup mup dawn ta a ni. A thu leh a kawh thuhmun reng mah se la, kohhran ṭhenkhatin Beihrual kan tih laiin thenkhatin Beirual kan ti a, kan hriat tlan angin hei hi chu pawl hrang lam dan inang lo (church/denominational variation) a ni mai e.

Kohhran hote’n Beihrual/Beirual kan hmang hi a tir aṭangin vawiin thlengin a ṭha hlein a lang a. Kuminah pawh hian kohhran pawl hrang hrangte’n hlawk takin kan hmang tlang leh ṭheuh tur ah ngai ila. September thla a ral hi chuan kan ramah sualna hrang hrang leh thihna ṭha lo thawm kan hriat ṭhinte pawh awm tawh lo deuh turah ngai ang.

Mizorama Beirual hman ṭanna nia hriat chu Champhai bul Hmunhmelṭha khuaah kum 1918 khan a ni. A kohhran ang zawngin Mizorama kohhran lian ber Presbyterian Kohhran chu Beirual hmang hmasa ber an ni. Hemi hnu kum 1926-ah rêlin, 1927-ah Serkawn/Lungleiah hman ṭan a ni ve leh a, Lunglei lama Beirual hmangtute hi Baptist Kohhran an ni ve thung. Beihrual hi a tira hman dan ber chu, mahni hnampui Kristian ni lote Lal Isua ringtu ni ve tura thlêm/beihna a ni a, a sâwt hle bawk. Hun a kal zel a, tunah chuan ringtu vek kan lo nih tak avangin thu zir nan te, ringtu nun chak lo indâwmkan lehna leh thlarau bo manna (mission) lama infuih thar leh nante hman a ni ta a ni.

Kumin Beirual hi Presbyterian Kohhran chuan 'Kohhran inpumkhatna' Rev. R. Lalrosiama ziak hmangin thla pumin thu an zir ang. BCM lamin 'Kohhran' tih thupui ṭhen hrang hrang mi paruk ziak hmangin thu an zir ang a, tualchhung kohhran eng emaw zatin camping leh crusade programme an nei zui ang. ECM kohhran hian 'Dikna leh rinawmna' tih thupui ṭhen hrang hrang hmangin an Beirual ang a, LIKBK-te’n 'Thusawm pek' an zir thung dawn.

Kohhran dangte: UPC NEI hian an ti ṭha hle ṭhin a, 'Ringtu leh kohhran' tih Rev. VL Dika Sailo ziak an zir dawn a, EFCI kohhrante'n 'Pathian kan inhumhimna' tih Rev. Lunzamang ziak an zir ang. Chhandamna Kohhrante’n 'Pathian biak inkhawm pawimawhna' Upa RC Lalthangpuia ziak an zir ang a, UPC (MZ) hian tualchhung kohhranin ṭha an tih angin an hmang ṭheuh bawk dawn a ni.

Aw le, Mizoram kohhran pawl hrang hrangte kumin Beirual thla thu zir leh programme te hi a ṭha tlangpui hle a, kohhran hote’n ṭha takin hmang ila, sâwtpui nan hman ṭheuh i tum ang u.

-Rev. Lalbiaksanga Chinzah