LTF/ VTF pek ve ngei ni rawh se

Covid-19 laka invènna damdawi (vaccine) an sawi hnai ta viau mai a, a nghahhlelhawm khawp mai. Hripui hi inkài chhâwn theih a nih miau avangin kan ramah a vei pakhat pawh an la awm chhung chuan thla­muang taka awm theih a ni lo a, inkhuah­khirhna awm map loa inthlah zalen theih a ni dawn lo. Chuvangin, hri kài a hlauhawm lohna turin a damdawi a awm hi a ṭul tak zet. Sorkar lam hotute sawi danin, Covid-19 vaccine hi India ramah hman thuai beisei a ni tawh a, January thlaah pawh sem chhuaha inpek hman a ni mahna le. India rama pek a nih chuan, Mizoramah pawh lâk theih thuai a nih a beiseiawm. 

Health department lam hotute'n vaccine pek hmasak turte pawh an sawi chiang viau tawh a, chanchin thar ngaihvente chuan an hre tlangpui tawhin a rinawm. Pek hmasak tur zingah hian Covid-19 donaa a hmatáwnga thawk (frontline worker)-te an tel a, mahse, Mizoram bika thawh hlâwk tak local/village task force-te erawh an tel lo. Hei hi sorkar laipui lamin a ruahman dan a ni a, Mizoram bik tana siam a nih miau loh avangin hriatthiam loh tur a awm lo ang chu. Chutih rualin, LTF/ VTF-te hi kan state bikah chuan Covid-19 donaa thawh hlâwk berte zinga mi an nih miau avangin, vaccine pek hmasak tur zinga tel awm ngawih ngawih an ni a; pek hmasak an nih ve theih nan sorkar pawhin kawng a zawng ngei tur ni àwm tak a nih bakah, telh a tum lui ve ngar ngar tur a niin ka hria. 

Central lamin a ngaih pawimawhte zinga force (para­military force) mite erawh chuan kan state bikah chuan an thawh hlâwk lutuk lo a, ngaih pawimawh hmasak an nihna tur a awm lo, kan ti thei ang. LTF/ VTF-te'n Covid-19 vaccine an dawn hmasak ve theih nan hma a lâk tur thu Health Minister Dr. R. Lalthangliana'n a sawi hi a lawmawm khawp mai. Hlawhtling ngei se a va ṭha dawn em. Covid-19 vaccine pek tur chung changah pawh, central-in pek hmasak tur a tih zingah tel lo mah se, municipal (AMC) hnuaia thawktute zingah emaw, state police hnuaiah emaw (police volunteer ang pawhin) thun luh dan a awm theih mai a rinawm. Sorkarin a tum tlat chuan kawng a awm ngei ang.

Task force-te hian an thawh hlâwk tak zet a, chu chu sor­kar pawh hian a hre chiang hle tur a ni. Hlawh emaw, lawm­man emaw nei loin, mahni inséngso zawk­in Covid-19 donaah nasa takin an thawk a, sorkarin a hmang ṭangkai nangiang rêng a. Vaccine pek hunah pawh hman ṭangkai a la tum leh zel niin a lang bawk. Chuvangin, duhsak theihna laiah chuan sorkar hian a duhsak ve tur a ni. 

- Kezo