Zirlaite leh awmdan mawi

Mizoram district hrang hranga school naupangte visit turin kan puten min tir a. Mizo naupangte dinhmun hre chiang turin hna lian tak ka kutah an nghat a. Naupangte nunah thil ṭha tam tak a awm laiin rilru tinatu tam tak ka hmu tel bawk.

Nu leh paten nei leh nei loin an fate school an kaltir a, mah se tam tak chu zir ṭha peih lo, chhungten school kal ngai an tih vanga ka ve mai mai te an ni. A ṭhen erawh chu tumruhna nei, hriat belh duh tam tak neite an ni. Ka rilru khawih em em chu Lawngtlaia school naupang pakatin zawhna min zawh hi a ni. A zawhna chu, Sir, India ram prime minister nih ka duh a, a nih theih dan min lo hrilh, tih hi ani.

A tumruhna leh India ram hmasawnna tura a phak ang tawka rilru a lo sen ve na khan min tihlim khawp mai. Hetih rual hian zirlaiten kan in enfiahna tur leh kan insiamṭhat ngai tlem han tarlang ila. Zirlaite zinga ka hmuh tam em em chu hengte hi an ni:-

1) Uniform ha chunga meizu: Zirlai naupang school kal­kawng leh ban hnua in lama haw kawngah te uniform ha chunga meizu kan va hmu tam em. Kan zirnain leh uniform-te hi zah nachang i hria ang u. Zirlaite tan chuan school hi kan hmun thianghlim a ni si a.

2) Uniform leh kuhva/ gutkha ei: Uniform ha chunga zirlai naupang te te in kuhva an ei sen huam hmuh hian rilru a na ṭhin. Gutkha te hi state dangah chuan mi vantlang pawh ni pha lo, mi hnuaihnung leh changkang lo zualin an ei tlangpui ṭhin. Tunlai khawvel changkang tawhah hian kuhva leh gutkha ei a zahthlakzia kan la man pha si lo.

3) Nu leh pa kan biak dan: Kan lehkha zirna senso min tumsaktu, min hringtu kan nu leh pate zah lo taka bia leh hnial pawng pawng ngam kan awm hi a mak ka ti. I sim vat ang u.

4) Zirtirtu kan en dan: Zirtirtute zah nachang hre lo, an thusawi pawh engah maha ngai lote hmuh tur kan la awm hi a va pawi em.

5) Rui chunga haw ngam: Naupang tlema zawng Zawlaidi leh grape wine te ina rui chunga haw ngam kan awm - a rapthlak a ni.

6) Latest general awareness: zirlai tam zawk hian general aware­ness kan tla­chham em em a, a hming chauha school kal ve mai mai kan tam. I in siamṭha ang u.

7) Ar insual tir: Rannungte hmangaih a humhalh tur kan nih laiin district ṭhen­khatah chuan school bana ar insualtir chingte kan la awm. Kan changkanna hian a va thleng thui lo em.

Zirlai zawng zawng ka sawichhiatna a ni lo, mah se a chunga kan tarlan ang chi zirlai tam tak hmuh tur an la awm - i sim ang u. Zoram hi state zawng zawng entawn tlakah i siam ang u.

Mizoram hi most literate state nih kan tum a, chumi rual rualin best character state kan nih theih chuan kei chuan rilru leh thinlung takin kan Zoram hi chibai ka buk ngei ang.