Digital India leh Digital Mizoram
Digital India hian a tum ber chu India khua leh tuite tunlai thiamna, Information Technology hmang ṭangkai thei tura chher chhuah leh he thiamna hmanga India ram kalphung thara kaltir hi a ni. Digital India-ah hian ruahmanna hlawm lian tak pathum a awm a chungte chu:
1. Information Technology hmanraw hrang hrangte India khua leh tuite tana ṭangkai taka hman
2. Sorkar hnathawh dan kalphung mipuite mamawh dan a zir zela IT hmanga her rem
3. India khua leh tui zawng zawngte IT literacy lama hma kan sawn theih nana theih tawpa hma lak
Prime Minister Narendra Modi sorkar hian tunah hian Information Technology ram hmasawnna atan hman a tumin ṭan a la nasa a. Hemi tihhlawhtlin nan leh mipui huapa in hrilh hriat nan Digital India Week hi July 1st - 7th 2015 ah hman a ni. Digital India program a langsar zualte chu:
Mitin huap zo tura hmun tina internet hman theiha siam. Ooffice hrang hrang broadband hmanga thlun zawm. School leh University zawng zawng Wi-fi connection pek. 2019 ah khawpui pawimawh zawng zawnga Public wi-fi hotspots siam. Heng bakah hian Digital locker, e-education ,e-health etc. a awm bawk.
Prime Minister Narendra Modi chuan Digital India-a a hma thlir hrang hrang a sawite hi a ropui hle mai. Tlem han tar lang ila.
1. IT lama India ṭhalaite suangtuahna a tak ngeia chan tir. Digital India-ah hian Rs. 4.5 lakh crore ruahman a ni a, he sum hmang hian hna thar nuaih 18 lai siam a ni ang.
2. Tunhma chuan naupangte han bia ila, an zahzelah tarmit emaw pen emaw an seh niap niap ṭhin, tunah erawh chuan zahzelah mobile an khawih niap niap tawh. Hei hian a entir chu naupangte pawhin Technology leh digital thiltihtheihna an hrethiam hle tawh tihna a ni.
3. Tunah chuan engkim mai hi mobile leh internet khawvel a nih tawh avangin optical fibre hrui thlunna huam chhungah mipui tam zawkin khawsak kan duh vek tawh ang.
4. Tunah hian India-ah hian 25 maktaduai aia tamin internet kan hmang mek a ni.
5. Tunah hian naupangten anmahni aia rit daih mai school bag an ak par par ṭhin. Tunah chuan an kutphah tiat lekah an zirlaibu leh syllabus zawng zawng a awm thei vek tawh.
6. Nakin lawkah chuan India hian IT lamah America kan lehpel ngei ang.
7. Mobile vawikhat hmeh leh mouse vawikhat click ringawt pawhin a ṭha lam leh pawi a khawih theih dan hi nasa tak a ti ta.
8. India khua leh tui zawng zawngten IT literacy lama theih tawpa hma lak hi kan mawhphurhna a ni.
Mizoramah pawh 2nd July 2015 khan chief minister pu Lal Thanhawla pawhin e-Services hrang hrang 6 lai mai a hawng bawk. Heng zingah hian CM Online leh State portal leh state service delivery gateway (SSDG) hi mipui tan a ṭangkai hle dawn a. CM Oline hmang hian tu pawhin mobile leh internet hmangin Chief minister Office kan be thei tawh dawn a ni. Amaherawhchu, kalphung fel tak nei a nih avangin fimkhur taka kan hman a ngai dawn a ni. Tin, State portal leh state service delivery gateway (SSDG) kaltlang hian Job card, scholarship, ration card, ITI training, grant in aid, B.Ed admission, Un employment Certificate leh kan mamawh hrang hrang a tih theih dawn a ni.
Hetih lai hian sorkar department ṭhenkhatten website update kan ngaihsak lo lutuk hi chu a pawi hle. Mipui hnena hriat tur ṭangkai taka tak lakchhawn nan kan chanchinbu miten website hi an hmang vek tawh sia. Sum tam tak senga website ropui taka hawn satliah ngawt a, update lam hlamchhiah leh si hi a pawi hle a ni.
Digital week hawnnaa Chief minister meuhin website update lama hmalak a ngaihzia a sawi te hi ngaipawimawh ila a ṭha hle mai. Mizo mipui zingah mobile tower radiation hlau em em te, Optical Fibre Cable ruk ching te, mobile leh internet hman sual avanga nupa inṭhen, chhungkaw buai leh mimal intihmualphona te a la tam hle mai. Aw le, Digital India week hial kan hmang ve ta. He Digital India week aṭang hian Digital Mizoram a taka kan neih theih nan IT literacy-ah ṭan la ila. Sorkar hmalakna thlawp ila, mobile leh internet hman chungchangah fimkhur ila, cyber crime awareness ngai pawimawh ila, sorkar leh mipuite hian ṭangkai takin mobile leh internet hi i hmang ang u.