PHEIKHAWK

Eizawnna lamah chuan pheikhawk siam mai mah ni se la khawvel mihring hmun thuma ṭhena hmun khat hnena chanchinṭha thlentu WILLIAM CAREY (1760-1834) hian chanchin ṭha a ngah khawp mai. A naupan laiin ṭum khat chu sava bu lak a tumna lamah thingler aṭangin a tla a, thi lova ruangin in a thleng thei hram a ni. A nuin a hliamte chu ṭhuisakin a pem te chu a tuamsak a, ni eng emaw zat khumah a mut a ngai ta a ni. Nimahsela a dam ṭhat hmain William Carey chuan a hmaa a hlawhchhamnaa mi ngei sava bu chu a la leh a lo ni a. A naupan lai aṭang rengin mi tumruh leh hrat khawkhenga sawi a ni.

Kum 12 mi a nihin sikul a chawlhsan a, KTP Member ni thei rual kum 14 a nihin a pain pheikhawk siam a zirtir a, hetih lai hian tunlai a tleirawl tam tak ang hian sakhuana lamah tuina a nei mawlh lo va, kristian chhungkua aṭanga lo piang phei zawng a ni. Nimahsela a hnathawhpui ṭhin, a ṭhian pakhat Warr kristian nun chuan a rilru a tawk ru viau a. Pathian hnenah chuan a ṭawngṭai ve ta zauh zauh a. Chumi hnuah phei chuan an Pastor kaihhruaina azarah Carey chu a lo piangthar ta a ni. Pheikhawk chhe siam hna chu thawk zui zel thoin a hnu zelah phei chuan England rama khaw pakhat Pastor a ni zui ta nghe nghe.

Ka hnathawh pui ber chu Krista Lalna ram tih zau hi a ni ti chungin Pastor nih leh pheikhawk siam hna chu a la kawp ta fan a. A pheikhawk siamna hmunah chuan lehkhabu eng lai pawhin a inchhawp reng a, hun awl a neih apiangah lehkhabu a chhiar ziah ṭhin a ni. Chutiang dinhmun aṭang chuan Greek ṭawng te, Latin ṭawng te, Hebrai ṭawng te, French ṭawng te, Italian ṭawng te, leh Dutch ṭawng te a zir a ni.

Carey hian thil pakhat chin dawklak lawh a nei a. A sim theih si loh chu Pathian hnen a ṭawngṭai a ni. Tuk tin mai hian ṭhutthlengah a ṭhingṭhiin a banga khawvel map a tar chu a en a, Kristian la hre lo ramte tan Pathian hnenah a ṭawngṭai ziah ṭhin a ni.

William Carey chanchin aṭang hian ṭhalaite hian zir tur kan ngah khawp mai. A tumruhna te, a huaisenna te, leh krista tana a inpekna zawng zawngte hi kan entawn atan a ṭha hle mai. Krista Lalna ram atana a thawhna zawng zawngte hi he khawvel hian a theihnghilh thei dawn lo va, mite thinlungah a nung reng dawn a ni. Krista tana thawktu ṭhalaite hian miin eng ti zawngin nge min hriatreng ang tih pawh hi ngaihtuah fo ila. I hming hlutna ngaisang i nih phawt chuan mi ṭhate kawm ṭhin la, ṭhian sual kawm aiin mahnia tal hran a duhawm zawk.

- George L.Ralte, Vaivakawn