Mikhual tê tê si

Hmanlai hunah khan zokhua ṭhenkhatah chuan mikhual leh tualchhung mite inkarah intihbuaina a chhuak fo va. Khaw hran aṭanga va leng emaw, va châm emaw kha an va awmna tualchhung mite hmuh nuam lo khawpa engthâwl taka an va awm khan an lo ngaithei lo va, ‘Mikhual tê tê si’ tiin bul an ṭan a, tlangvalho zingah intihbuaina a chhuak fo ṭhin. Chutiang boruakah chuan khaw khawmna hmun grouping centre-ah khan tlangvalho zingah intihbuaina a chhuak fo a ni.

Tunah erawh chuan mihring nun a lo changkang tawh a, hmanlaia mihring nun zîm takah ngaihdan zîm takte kha kan bânsan tawh a. Kan ramah hian ram dang aṭanga lo lut an tam tial tial a, chung mikhualte chu, ‘Mikhual tê tê si’ kan ti ngai tawh lo. Mikhual leh mikhual lo pawh inhre tawn tawh lovin kan inkal pêl suau suau ta mai.

Ram pawn aṭanga lo lutte hian ram hmangaihna te, siam ṭhat tumnate an nei kher lo vang, chung mite chu kan ram leh hnam a lo him nan te, hringnun kal sual vengtuah te, Zo fate nun chawisangtuah te, dikna venghim tur te, inunauna nghet zawk kan neih theih nante hmalakpui atan kan kaihhruai an ṭul.

Thlahthlam leh ngaihsak loh an nihin, mikhual anga en an nih reng chuan rei lo têah kan ram hi thing ngêt angin min kher chhe thei dawn a ni. Ram pawn aṭanga lo lutte hian kan chet zia leh nun ziate hi min thlir reng a, keimahniah thil ṭha an hmuh a, an entawn turin kan khawsak dante kan uluk a, kan fimkhur a ṭul hle.

Tun hma chuan Mizoramah hian Zo fate nun kha a la thianghlim a, ram pawn lam mite nunin a la tihchhiat loh nun hlui ngaihawm, nun thianghlim kha a va ngaihawm tak em! Tawn leh an châkawm ṭhin. Ram pawn aṭanga lo lut nun dik lote chuan kan ramah hian suahsualna chi tinrêng an rawn thlen a, ruih theih thil chi hrang hrang te, rûkrûk te, thisen chhuahna leh tualthahnate bakah, nun sualna chi hrang hrang an rawn thlen a. Hmanlai ngaihdan chuan, heng mite hi ’Mikhual tê tê si’ tih phu ngawih ngawihte an ni. Heng nun ṭha lote hi kan ṭhalaite’n an ti ve ta zel a, kan ram hi sualna hmunah an rawn chantir ta a ni.

Ram pawn aṭanga lo lut zinga a tam berte chu Zo fa, Zorama awm nghette angin zirtirna ṭha leh inkaihhruaina ṭha dawng ve lote an ni. An ramah chuan thil ṭha tih aiin thil ṭha lo tih chu nuam an tiin an ṭhanlenpui tawh a. Chutiang thinlung pute chuan kan ramah hian thil dik lo an rawn tih chhunzawm zel lohna turin veng tina awmte hi an nun kan ven uluk leh zual a ṭul ta hle mai.

- H. Neihchungnunga