SILAI A HLAUHAWM

Kum 2021 chawhma lam khan Myanmar ramah buaina a chhuak a, Myanmar aṭangin Mizoramah mi tam tak an rawn raltlan mek a ni. Kum 2023 May thla tirah Manipur-ah buaina a chhuak ve leh bawk a, heng avangte hian Mizoram mipui chu kan inpawlh sawp nasa ta hle. Mipui chi hrang hrang inpawlhsawp lutukin a hrin chhuah chu buaina a ni tlangpui ṭhin.

Heng rambuaiin a rawn ken tel chu puak thei thil leh silai lêngvâk a titam a ni. Rambuai mek Manipur leh Myanmar lamah silai a luh ruih ruih chuan a chhehvela awm Mizoramah pawh hian silai leh puak thei thil tam tak hi a lut ve ngei niin a lang a. Hetiang silai leh puakthei thilte thuneitu lamin an man thawm hriat tur a awm reng a, chanchin thar a luah deuh reng ṭhin bawk.

Tunlai social media hrang hrang thlalak velah hian Mizoram chhungah pistol leh silai keng leh kap lai thlalak hmuh tur hi a awm ta nual zel mai a. Heng pistol leh silaite hi dan ang taka an nei a nih chuan a sualna a awm lem lo. Mahse, dan ang taka neih loh hi thil awm ve theih a nih avangin kan ram a lo him zel theih nan kan thuneitu lamte hian hma han la zel teh u khai.

Silai hi dan ang taka neih leh dan lova neih pawh ni se, a hlauhawm dan a ngai reng a. Mi tin hian silai hlauhawmzia kan hriat a pawimawh hle. Keini Mizoram ralmuang lutuka silai leh pistol pai chhuak ṭhinho hian eng rilru puin nge an pai chhuah ṭhin ang le?

Ni 29-8-2025 zana Bawngkawn kawngpui hmun lûn lai takah Rochhingpuia s/o Haitinsanga chuan Lalhriatrenga chu a kap ringawt mai a; a va rapthlak em! Khatianga râwvâ taka silai chelek a, mahni mihringpui kâptu Rochhingpuia kha a phu tawk ang ngeiin a chungah na taka hremna lekkawh ni se a ṭha hle. Tin, a pistol kha dan ang taka a neih a ni rêng em tihte chanchin thar lamin an puang lo niin a lang a; kha a pistol kha dan ang taka a neih a ni em tihte hriat a châkawm hle. Ram changkang zawkahte chuan silai hmanga pawi khawihna a thlen châng hian silai an neih dan a felfai nge felfai lo tihte chanchin thar lam hian an rawn chhuah vat ṭhin.

Tunlaiah pistol neihte hi mahni invennan a ṭhat rualin, pistol nei chuan mi dang nen an intihthinrim satliah pawhin an pistol an ngaihtuah chhuak ṭhin a, pistol chu an chuh ta ṭhin a. Chu chuan pawi nasa tak a khawih ta ṭhin a ni.

Chuvang chuan, ram changkang USA meuh pawhin an thunun theih loh, mi dang nunna hlu tak suat vak vak ṭhintu silai leh pistol hi neih ve loh ngam Mizo mipuite’n intihhmuh i tum zawk ang u. I thinrimin i pistol i hre chhuak ṭhin, chu chu mi dang nunna atan thil hlauhawm thlentu rapthlak tak a ni si.

Social media vela pistol leh silai kenga thla kan lak ṭhin hian naupang zawk rilruah silai leh pistol ngaihsanna leh neih ve châkna rilru ṭha lo a tuh theih avangin, mihring nunna atana hlauhawm tak, USA pawhin an thunnun hleih theih loh pistol leh silaite chelek chunga thlalak vel uar lo thei ila a va duhawm tehlul em! Mizoram him zelna atan.

-Lalhminghlua