ENG NGE PHYSIOTHERAPY CHU?
Khawvel a changkang zel a, Mizoramah pawh mithiam chi hrang an lo tam ta. A lawmawm viau rualin, damlo tan pan ber tur hriat a har ta hle mai. “Tu nge kan pan ang?” tih leh, “Engtin nge ka inenkawl ang?”’ tih hi zawhna tam pawl a lo ni ta a. He zawhna awlsam zawka kan chhan theih nan physiotherapy chungchang ka lo sawifiah dawn a ni.
Physiotherapy chu eng nge ni?
Physiotherapy (ram thenkhatah chuan physical therapy te pawh an ti) hi healthcare profession zinga pakhat a ni a. ‘Therapy’ tih hi natna emaw, taksaa dik lohna awm tihdam tuma enkawlna tihna a ni a. Physiotherapist doctor-te chuan physical hmanrua leh technique chi hrang hrang–kutin emaw, khawl hmangin emaw, exercise bikte hmangin kan enkawl ṭhin.
Heng kan enkawl dan leh hmanruate hi zirchianna (scientific proof) awm sa chauh hman a ni. Ruh leh tha lam natna te, nerve lam natna te, chuap leh lung lam natna te, nausen aṭanga tar upa natna thlengin kan enkawl a. Kan tum ber chu – hliam dam tur kaihruai a, a hma thei ang ber a tiche leh a, chet dan dik zawka che leh thei tura tuaihnûm a, a hliam nawn loh nana hman zui dan thlengin kan zirtir ṭhin a ni.
Physiotherapist ni turin eng engte nge paltlang ngai?
NCAHP Act 2021-in a duan angin, physiotherapist ni tur chuan pawl 12 science (PCB) 50% mark nena pass a ngai a. Chumi hnu chuan NEET exam-a inziah tling leh hnuah, Bachelor in Physiotherapy (BPT) a zir theih a. A zir hun chhung hi internship kum khat telin kum 5 zir a ni. Kum 2-na aṭang hian clinic leh damdawi inah te damlo en paha duty tur a ni.
Pass chhuah hnuah physiotherapist doctor niin, clinic hawngin emaw, damdawi inah te dam lo an enkawl thei tawh ang. Hming tirah Dr tih an dah ang a, a tawp lamah PT tiin chhinchhiah an ni ṭhin (NCAHP Act 3.2.3). Zir zawm duh tan Post Graduate – Master in Physiotherapy hi kum 2 dang a zir leh theih a, speciality langsar zualte chu – Cardio Respiratory (lung leh chuap), Neuro (nerve), Ortho (ruh leh thâ), Sports, Gynae (hmeichhe lam), Hand, Geriatrics (tar leh upa te), Pediatrics (naupang), Community Health, MSK (Musculoskeletal) te a ni. Thiamna sang lehzual duh tan PhD thleng pawhin a zir zawm theih. Heng bakah hian thiamna huang zauh nan certificate leh diploma course hrang hrang a zir belh theih bawk.
Physiotherapist chuan eng nge a thawh ṭhin?
A serh zinga mei ang hian nau piang hlim aṭanga tar upa enkawlnaah thlengin kan tel zel a. Dam loh vanga khum beta mu, ICU-a che ṭha thei tawh lote aṭanga khawvela mi chak leh infiam mi hrisel ber berte thlengin kan enkawl a. A huang hi a zau em em. Kan hnathawhna hmun langsar zualte chu:
o Damdawi in (sawrkar leh private hospital)
o Physiotherapy clinic
o Nursing home
o Occupational health center
o Out-patient clinic
o In lama damlo enkawl
o Sports centre leh sports club
o Fitness club, health club, gymnasium leh wellness centre
o Special school leh care centre
o Tar chawmna in
o Community based rehabilitation facilities/ disaster management and relief centre
o Ministry of Health and Family Welfare-ah
o Hospices leh palliative care center-ah
o Jail
o Office company leh corporate settings
o Integrated medical centre
o Women’s health centre
o Research centre
Physiotherapy chu tute’n nge mamawh ṭhin?
Tunlaiah chuan mamawh lo hi an awm lo emaw tih zawk tur a ni a. Nilenga office lama ṭhute aṭanga ram lama hnathawkte thlengin an mamawh a. Inzai hma (pre-operation) leh inzai zawh (post operation)-a physiotherapy lak hian a tidam (recovery) chak zual a. Pian tirh emaw, a hnu lam emawa rualban lohna neite pawhin nun dan phung ṭha ber an neih theih nan a ṭul a. Ruh leh tha lama natna neite tan a pawimawh hle a, zai (operation) a pumpelh emaw nghah hret nante a ṭangkai thei a. Zai a ṭul pawhin zai hnu lamah physiotherapy rehab kal ngei ngei tur a ni.
Stroke leh heart attack neih hlauhawmte’n him tak a taksa an sawizawi nan an mamawh a, a lo nei tawhte pawhin nunphung pangngai tak neih leh theih nan an mamawh hle ṭhin. Stroke-ah ngat phei chuan therapy lak hma leh hma loh kar a hla hle a. Nerve emaw, taksa peng hliam dam thei tawh lo tur neite pawhin taksa peng dang hmangin nunphung pangngai tak a neih leh theih nan an mamawh a ni.
Rai hmain taksa lo sawi zawi lâwkna atan tante physiotherapy hi a pawimawh a, rai lai emaw, nau neih hnua kawng leh khel na neite tan ṭhulh chi rual a ni lo.
Mizote’n kan mamawh zual nachhan
Mizote hi kan pi leh pute aṭangin taima, tlawmngai leh tuarchhel turin kan inzirtir ṭhin a, a ṭhatna a tam rualin a ṭhat loh châng a awm ve a. Nâ kan neihte hian khumbeta min siam hma chu kan tuar lui a, hna te kan thawhpui hram hram ṭhin a. A hliam a lo nasat hnuah chauh kan inentir a. A tir lama enkawl vak ngai loa dam mai tur kha, an lo tihhliam belh a, zai a ngaih thlengin an lo hmang ṭhin a. Kum 10 chuang hliam lo neih tawh, na chung chunga hna kan thawhpui char char te chu ni 10 chhunga damtir kan han tum leh ṭhin a. Pathian tan chauh lo chuan thil theih ni hek suh!
Hliam ṭhenkhat, amah a dam ve leh thei hi chu a awm tak meuh mai. Amaherawhchu, hman dan dik loh avanga hliam ṭhenkhat kan awm dam/ tawrh dam hian, kan hman dan dik lo chu kan thlak leh si loh chuan a hliam nawn leh ṭhin a, tihdam a harsat phah ṭhin a. Inentir vat zel hi a ṭha ber a ni.
Tlangkawmna
Physiotherapy-ah chuan a na lai chauh enkawl lovin, nâ rawn insiam leh thei turte thlengin kan chhui ṭhin a. Chu mai bakah, nun dan phung ṭha lo laite siam ṭhatpui a, nun dan ṭha zawka hruai lut leh turin kan infuih a, kan inzirtir ṭhin a ni. Physiotherapist-te hian damdawi chawh leh zai mite phurrit lutuk tur kan lo hui kiang thei a. First contact provider zinga mi kan nih angin, damlote’n refer kher nghak lovin, physio kaihhnawih lam nâ emaw, nuam lo emaw kan neih chuan a tlai hnu nghak lo ila. A hlimchhawna enkawl hian sum leh hun tam tak a chhanhim thei tih hriain physiotherapist hnai ber i lo pan vat ṭhin dawn nia.
- Dr. K. Lalnunsanga, MPT (Sports)