Ṭawngṭai tihtawpna

Ka ziah thui chuan ṭhenkhatin in chhiar chhuak peih lo vang tih ka hlau va, tawi têin ka'n ziak leh ang e.

Pathian pakhata mi nung pathum–Pa leh Fapa leh Thlarau Thianghlim (Trinity in the God Head) ringtute chuan, "(Kan Lalpa, Lal) Isua (Krista) hmingin ka/kan dil a che" tia ṭawngṭai tihtâwp hi a dik ber mai. A chhan chu:

1. Pathian thu takin (Biblically & theologically)-in a dik.

2. Ṭawng dik zirna aṭanga thlirin a dik (grammatically correct).

3. A grammar zâwnga thlîrin ṭawngkam indawta chheh dan dik a ni (rules of syntax nen a in hne rem).

Kan Lalpa Isua'n, "Ka hminga Pa hnena in dil apiang a pekna tur che uin" a ti [(...that whatsoever ye shall ask of the Father in my name, he may give it you (KJV); ...that whatever you ask the Father in My name, He may give you (NKJV); ...so that the Father will give you whatever you ask him in my name [NRSV]–Johana 15:16).

Kan ṭawngṭai a, a tira kan/ka biak/hrilh (address) kha a tawpah pawh kan (ka) biak/hrilh (address) leh ngei a ngai alawm.

A chunga mi zui khian "... Isua hmingin ka/kan dil e" tih hi a hman theih tho bawk; Kristian Hla Bu tawpah pawh inkaihhruaina anga kan hmuh hi. Amah Isua hminga dil a nih avangin hman theiha ngaih a ni; mahse, thil chu Isua hminga Pa hnena dîl kan nih miau avangin, a tawpah pawh Pa ngei chu hrilh (address) leh a ngai a ni.

Thu belh

"Isu, i hmingin ka/kan dil a che" tih hi chu 'a Pathian thu zawngin a dik e' tia mi a ṭan tlat chuan, ama ngaihdan ni mai se; grammar rules erawh chu a kalh a ni. Tu emaw hminga thil kan dil reng reng ('re re' ni lovin) hi, kan han dîla/dïli hming kan hrilh nghal (direct) emaw ngai lo va, 'hmingin' a nih miau avangin a kual (indirect) tawh ṭhin a ni. Hei hi a grammar zawnga sawi a ni.

- Dr J.T.Vanlalngheta, 9436198502