Kan thil tih hian mi dangte a tina em?

Kan kawngkhar rawn kikin, duhsakna thu thlum min hnutchhiah a, hmangaihna der min hlan a, beiseina mita min en chungin bul min ṭanpui a. Chu candidate ngei mai chu a tling ta ngei mai. Duhsak taka ka vote tlin ngei chuan tu nge ka nih a hre tawh lo va, thîknain bul kan ṭan a. A thu min tiam chuan, mangânna thlipuiin a nuai vel a, hriat ngai loh daina ramah chuan min lêntir leh si.

Mi dang hmalakna hmu ṭha thei miah lo, sorkhar chu a lo ding a, sorkhar hmasate hmalakna chu a ṭha em, tia enkawl zui reng tum ta lo chuan, tuiekin, hluihlâwn thil mai an chang zo leh si a. Thil ṭha hmu thei miah lo, sorkhar hmasateah khan fiah takin kan hmuin kan hria a. Tuna sorkhar mekte hi eng nge an an dawn, tih chu Zoram mipuite mit fûkna a ni. Sorkhar hmasate’n an lo tih tawh chu eng party pawh lo sorkhar se la, kan ram leh hnam tân a ṭhat phawt chuan chhunzawm mai tûr a nih laiin, MNF leh Congress sawrkharna inchhawk zak zakte khan an inhnawlsak ve ve a. Hma thar an la a, an sawrkhar chhungin, an thawk zo leh hman si lo va, chutiang zel chuan, kum 38 chuang zet kan ram an lo hruai tawh a nih kha.

An sum hman ral zozaite kha aw. Tuirial Hydel Project thawh zawh theihna khawp chu a ni asin maw le. Kawlphetha intodelhna kha an âuhla ber a ni a, mahse, an kuta a awm veleh Hydel Project chu sum siam nan mai an hmang leh si. Kawlphatha intodelhni rêng kan nei thei ta lo a ni hi maw. Ram hmangaihtu hi kan lo nei chau em a lo ni. Kan ram hian kawlphetha kan intodelh hma chu hmasawnna hi a kal tur angina a kal chak thei lo vang.

He khawvel indona ramah hian dingchang zawk an awm a ngai a, Zoramah ngei pawh dâwt hmanga politic indonain min chîmpil zo ta. Ralthuam nena indona hi a thleng mek a, a lo la thleng zel ang. Lei leh vân siamtu Pathian ṭhuthmuna ngei pawh vân indona a thleng tawh a, mahni chan tawka lungawi lo, arsite chung lama chhûm aia sang zawka ṭhut tum, zing lam fapa, varparh arsi, mawina tinrênga thuam meuh pawh paihthlakin a awm ta zawk a nih kha. Mahni dinhmuna lungawi thiam mi hi mi vânnei an lo ni e.

Intihhmuh hnam kan ni a, ṭhalai tam tak ruihhlo laka tâlbuai an awm mek laiin, ṭhalai tam zawkte erawh mahni intodelh tumin, zirna lama pawh ṭan an la a, theihtawp tak meuh an chhuah a. Lehkhathiam pawh kum tin a sang telin kan nei ta. A lawmawmin, kan ram hma lam hun pawh a êng hlein ka hria.

HSLC, HSSLC, degree result-te a lo chhuak a, MZP, MSU ten Aizawlah a lawmna huaihawtin hman a ni a, chutah district-ah, sub-division-ah, mahni khuaah lawmna kan siam leh a. Kan MLA-te pawh kâng kai zelin, lawmpuina laptop pek an intihhmuh a, sum leh hun a va hek tak em. A dawngtu tân a hluin a lawmawm. He thil hi thil ṭha tak angin lang mah se, dawng âwm dawng ta lo, kan MLA-te hian bial hran an nei ṭheuh a, an bial chhunga mi ṭhenkhat an lawm viau laiin, ṭhenkhat an vui viau thei. Mi dang lawmna lawm thiam ve lo tûr chu, result ṭha tak nei, laptop dawng ve si lote an ni ang. Pass lawmnaa khualliante’n bengsika ngaihtuahna kan sen a hun lo maw? I sem ṭhat viau lai khan, ram tana i thawhpui, i MLA-puite zakin an awm thei asin.

Thil ṭha kan tih mek lai hian, hnung lam kan hawi a ngaih chang a awm ve bawk a nia. Mahni bial chhunga mite tihlawm loh hlauh luata hian mi dang kan tina thei asin. Laptop duhsakna kan inpek fo hian rah ṭha a chhuah em? Sorkhar hmasate’n an lo kalpui tawh a ni a, chu mite sorkhar lai chuan laptop an dawng asin le, tih hlauh vang maia laptop hi sem tûr a ni lo; chung ai chuan dawmkân ngai an awm em?

Tihian an sawi ka hre ṭhin. Chakma MLA-te chuan an bial chhunga lehkha thiam thei, zir zawmna nei si lote an dap chhuak a, khaw tin, VC leh unit hruaitute kaltlangin an dap chhuak a; chung mite chu an zirna tur an tumsak vek zel an ti. Laptop inpek ai chuan a hlu zawk fê hian ka hria. Tunah chuan khawvel hriat hlawh scientist pahnih ngawt an awm ta. Hetiang lam hawi hian kan ram hruaitute hian mit siai ve tawh se la, ram hmasawnna tur rilru pu mi, zirlai zingah hian tam tak an awm a, hengho hi kan tibeidawng palh ang, tihte pawh a hlauhawm a nia.

Ruihhlo avanga kan ṭhalai tam tak kal mekte hi chhan chhuak tûrin tih theih kan nei chau khawp mai. A la ti ve lo rawlthar zawkte hi kan vên a, kan humhalh a, an rilru tibeidawng zawnga kalhlên kût laptop sem hi tihtawp ni se ka va ti em.

- Zothansanga, Chhiahtlang Kawn Veng. 9612333536.