THE BIBLE SAYS SO!

Pathianin A mi Israel-te hi kum 400 zet zu be lo va! Zawlnei hnuhnung ber Malakia hnu aṭang khan Pathian chu Israel fate lakah A ngawi ta vang vang mai a! AD 28-ah khan Baptistu Johana chu thlalerah a rawn au ta a, kha kha kum 400 hnua zawlnei aw an hriat leh hmasak ber chu a ni.

Eng nge a chhan? A miten A thu awih lovin an ring an tih khawng tlat avang khan A hawisan rih ta! Anmahni tih tihin an sakhua chu an kalpui ngei mai, mahse Pathianin A be tawh lo. Pathian Hun Bi, A Fapa A tirh chhuahna hun chu a lo thleng dawn ta. A hmahruai Baptistu Johana chuan Simna Baptisma a lo hril a, an tun hma sualte simin Jordan luiah simna baptisma an chang ta. He baptisma hi Messia an hmuh theih nana intihthianghlimna a ni.

An Messia chuan misualte aiawh tur a nih avangin sual simna baptisma pawh chu A chan ve a ngai. Amahin sual thenfai tur A nei tihna ni lovin. Chu hun ropui takah chuan van aṭangin “Hei hi ka Fapa duh tak, ka lawm em em a chu a ni, ” tiin Pa Pathianin A rawn puang a, Thlarau chu ṭhuro angin van aṭangin A lo thlawk thla a (Math 3:13-2). Diabola chu hneh hmasa turin thlalerah Thlarauin A hruai lut ta (Math 4:1). Setana'n a hneh lo vai vai hle, a thlawk bo ta rih (Math 4:10, 11). Tunah chuan mihringte hmaah a che tla tawh ang. Mihringte Lal Isuan A hmachhawn hmasak bernaah chuan thu mawi tak, ngaihno bei tak, ngaihnawm tak em ni A chhak chhuah le! Ni lo tlat! Thu khal tak, huata lak mai theih thu “(In sual) sim rawh u, Van lalram (lo thleng tur kha) a hnai tawh e, ” A ti (Math 4:17). Engti zia nge, a enga mah hmaa in sual sim rawh u, Van lalram in kai theihna turin, A han tih nghal rawt mai le!

Eden huanah khan Pathian thu awih duh lohna thinlung kha Setana aṭangin an rochun tawh a, kha sualna kha alawm tun thlenga mihringte tihsualtirtu chu, hei hi sual bul chu a ni. Pathian thu hnuaia awm tura in-surrender duh lohna hi mi tam berte pianthar theih lohna chhan hi a ni. Chuvang chuan rawng A bawlna thupui ber chu “Pathian lalram din” a ni a, hei hi A thusawi hmasak ber leh A van lawn dawn thlenga A sawi a ni (Marka 1:15: Tirkoh 1:3).

Pathian thu thu ni lova mahni thu thua nun kha sual bulpui a nih avangin, Pathian lalram lut tur chuan “kha rilru kha” sim, bansan, leh tukkhum chhah chhawn hmiah tur a ni a, chu chu rinna dik pianna chu a ni (Marka m1:15). Hei hi Lal Isuan mahni nun chana chatuan nun neihna a ni A ti. He should deny himself A tih pawh kha amah kha a inhnawl a ngai tihna a ni. Chhandamna chu mahni nun (self) hnawla Lal Isua Lal atana neih tak zawk kha a ni.

- F. Lal Thanzuala, 9436141242