City bus ding rei ta lo; ZPM sawrkar chungah lawmthu ka sawi e

Miten engah maha an ngaih ve loh thil ho te te ngaihmawh ching ka ni. City bus-te stand-a an ding rei ṭhin lutuk pawh hi ka veina a rei tawh. State dangte tih ve loh, hnam dang hmuhah pawh a zahthlak thute, smart city nen a inhmeh loh thute, traffic jam a tih zual thute, public transport man tlawm ber hi rintlaka siam a ṭul thute leh, nikhat thil thua ban theih driver leh conductor-ten nikhat thil thua hlep ruk tur an duham vang mai mai a nih thute ka lo sawi fo tawh a ni. ACBOA lam pawh ka be tawh. Mahse, a sawt lo.

Tun ZPM sawrkarah pawh hian ka sawi tam leh tawh na a, ka beidawn leh ṭep hnuin, August ni 13 zinga video viral, Durtlang sikul naupangte city bus hnunga an bet far ka hmuh aṭanga ka thu ziahah chuan, a tawp nan tiin ka'n sawi tel leh hram a, rin loh takin a tuk lawkah sawrkar, STA chuan passenger chhuk leh lawn chhung bak city bus-te stand-a din phal a nih tawh lo thu a rawn puang ta mai chu, ka lawm kher asin. Durtlang tan city bus dang 3 tlan belhtir a nih tawh dawn thu ACBOA lamin an puang nghal bawk. ZPM Sawrkar chungah lawmthu ka sawi e. Kha video leh a ti-viraltu kha i ṭangkai lutuk, i ti ṭha lutuk e. Kha thil kha thleng lo se, awmzia a la awm chuang lo ang. Kei lahin sawi ka lo tum tawh si lo.

Mahse, eng vangin nge thla hnih chhung enchhin tih hi a ṭulna? Stand-a rei tak din reng ṭhin kha tihdan tur ve reng pakhatah kan ngai em ni? Tih dan thar ṭha zawk leh dan dik zawk, hmasawnna a awm dawn chuan thil danglam leh khawii maw laiah eng nge maw nghawng chu a awm zel ang chu. Mahse, dan dik zawk chu kan kaltlangpui zel tur a ni. Reiloteah thil ṭha tih chu ngaiah kan nei leh mai dawn a ni.

Mipui tan leh khawpui tana thawvenna leh ṭhat zawkna, hmasawnna leh changkanna tih hriat reng leh hmuh theih reng hi enchhin a ṭulna ka hre lo a ni. Ni reilote chhung pawhin traffic police-ten a ṭhatna an sawi theih nghal tawh hi.

An tihdan pangngaiin thil ṭha sawisel tum hrim hrim ṭhenkhatte leh bus lam pawhin eng eng emaw sawi nawi kual tur chu an nei ngei ang. Mahse, tute emaw hlawkna tur ringawt ai chuan khawpui leh mipui engthawlna leh hmasawnna hi a pawimawh zawk a ni.

Engti zawng pawha ngaihtuahin, bus-te hian a hma ang thoin an mi phurh turte hi an chân phah dawn hek lo, phurh tur an hmu hnem telh telh zawk ang. Tunah chuan bus-in mipui nghak chhuak tawh lovin, mipuiin bus an nghak chhuak ve thung dawn a ni mai. Chu chu tih dan dik leh kawng engkima ṭha zawk a ni. Thui tak chuang tur tan stand tina din veng veng chu hun tam tak paihna a ni a, bus-a chuan loh mai a ngaih phah ṭhin a ni.

He thupek hman ṭan ni, September ni 1-khan tum lawk reng vang ni lovin keima pawimawhah bus ka chuang kual vak mai a, Upper Bazar-Ramhlun North-AMC Office-Ramhlun North-Bara Bazar, cheng 80 man ngawt ka chuang a ni. Mahse, bus-ten thupek an zawm leh zawm loh hriat nan a ṭha khawp mai. Ka chuanna bus bakah kan hmaa mite leh min tawk zawnga lo kalte chu stand tinah ka en ru ṭhin a, an stand dinna leh an din rei zawng te, an bus number te, ka hmuh hun darkar leh minute-te ka chhinchhiah vek a ni. Ka chuanna pawh ka chhuk hnuah kal bo mai lovin ka en ru zel. Tlem té tih loh chuan thu an awih hlawm viau, mahse, din rei chu an la chak hlawm khawp mai. Conductor pakhat ka zawh chuan, "Din rei pawh tum ila traffic police-ten min um chhuak zel alawm, " a ti. Zemabawk aṭanga Aizawl pan, Ṭhuampui AMC office bul stand-ah erawh an la innghak chhuak zel. Hun remchangah ka la chuang kual leh ang a, thu awih lo zual chu a hmaa ka chhinchhiahte nen hian ka tilang vek tawh ang.

Thil lian leh ropui tak tak sawi leh hawn fo karah hian, thil ho te anga lang, mahse, mipui hne hnai, mipuite awlsamna leh thawvenna lam, thil ṭul tih awlsam si hi sawrkar hian ngaihtuah leh tih nachang hi hre ṭhin se la, fak an hlawh zawk ngei ang. Mipui pawhin sawrkarin kan awlsamna, kan thawvenna, kan himna, kan tana ṭha tur leh hmasawnna tur thil ṭha a tihte hi hre rengin sawrkar chungah lawm nachang i hre ṭhin ang u.

- K. Hmingthankaia